ମନୋଜ ଆହୁଜା ହେବେ ମୁଖ୍ୟ ସଚିବ !
Manoj Ahuja
Ramachandi Prasad
ଭୁବନେଶ୍ୱର : ବରିଷ୍ଠ ଆଇଏଏସ ଅଫିସର ମନୋଜ ଆହୁଜା ଓଡ଼ିଶା ଫେରିବେ । ଏବେ ସେ କେନ୍ଦ୍ରରେ କୃଷି ଓ କୃଷକ କଲ୍ୟାଣ ବିଭାଗର ସଚିବ ଅଛନ୍ତି । ଓଡ଼ିଶା ସରକାରଙ୍କ ଅନୁରୋଧରେ ତାଙ୍କୁ ଓଡ଼ିଶା କ୍ୟାଡ଼ରକୁ ଫେରାଇ ନେବାକୁ କ୍ୟାବିନେଟରେ ଅନୁମୋଦନ ମିଳିଛି । ଫଳରେ ଆହୁଜାଙ୍କୁ ଏକ ଗୁରୁ ଦାୟିତ୍ୱ ମିଳିବ ବୋଲି କୁହାଯାଉଛି । ସେ ମୁଖ୍ୟସଚିବ ହେବେନା ମୁଖ୍ୟମନ୍ତ୍ରୀଙ୍କ ପ୍ରମୁଖ ସଚିବ ଭାବେ ତାହାକୁ ନେଇ ପାୱାର କରିଡ଼ରରେ ଚର୍ଚ୍ଚା ଜୋର ଧରିଛି ।
ଚଳିତ ମାସରେ ମୁଖ୍ୟ ଶାସନ ସଚିବ ପ୍ରଦୀପ ଜେନାଙ୍କ କାର୍ଯ୍ୟକାଳ ଶେଷ ହେଉଛି । ୨୦୨୩ ଫେବୃଆରୀ ୨୬ରେ ସେ ମୁଖ୍ୟ ଶାସନ ସଚିବ ହୋଇଥିଲେ । ତେବେ ୨୦୨୩ ଡିସେମ୍ବର ୩୧ରେ ତାଙ୍କର କାର୍ଯ୍ୟକାଳ ଶେଷ ହୋଇଥିଲା । କିନ୍ତୁ ଜଣେ ଦକ୍ଷ ଅଫିସର ହେବା ସହ ମୁଣ୍ଡ ଉପରେ ସାଧାରଣ ନିର୍ବାଚନ ଥିବାରୁ ତାଙ୍କର କାର୍ଯ୍ୟକାଳ ଆଉ ୬ ମାସ ବୃଦ୍ଧି କରାଯାଇଥିଲା । ଏହାକୁ ଅନୁଶୀଳନ କଲେ ଜୁନ୍ ୩୦ରେ ତାଙ୍କର କାର୍ଯ୍ୟ ଅବଧି ପୂରଣ ହେବ । ତେଣୁ ପରବର୍ତ୍ତୀ ମୁଖ୍ୟ ସଚିବ ପଦକୁ ନେଇ ଚର୍ଚ୍ଚା ଜୋର ଧରିଥିଲା । ଅନେକ ଆଇଏଏସଙ୍କ ନାଁକୁ ନେଇ ବି ଚର୍ଚ୍ଚା ହେଉଥିଲା । ତେବେ ପ୍ରଦୀପଙ୍କ କାର୍ଯ୍ୟକାଳ ବୃଦ୍ଧି ପାଇଁ ରାଜ୍ୟ ସରକାର ପୁଣିଥରେ କେନ୍ଦ୍ରକୁ ପତ୍ର ଲେଖିଥିବା ଜାଣିବାକୁ ମିଳିଛି । ଯଦି ସେଭଳି ହୁଏ ତେବେ ଆହୁଜାଙ୍କୁ ମୁଖ୍ୟମନ୍ତ୍ରୀଙ୍କ ପ୍ରମୁଖ ସଚିବ କରାଯାଇପାରେ । କେନ୍ଦ୍ର ସରକାରରେ କାମ କରିଥିବାରୁ ଦିଲ୍ଲୀରେ ବି ତାଙ୍କର ଭଲ ଭାବମୂର୍ତ୍ତି ରହିଛି । ଫଳରେ ଡବଲ ଇଞ୍ଜିନ ସରକାରରେ ଓଡ଼ିଶା ଲାଭବାନ ହୋଇପାରିବ ।
୧୯୯୦ ବ୍ୟାଚ ଆଇଏଏସ ମନୋଜ ଏବେ କେନ୍ଦ୍ର ସରକାରଙ୍କ କୃଷି ଓ କୃଷକ କଲ୍ୟାଣ ବିଭାଗର ସଚିବ ଭାବେ କାର୍ଯ୍ୟ କରୁଛନ୍ତି । ତାଙ୍କର କେନ୍ଦ୍ରୀୟ ଡେପୁଟେସନ ଅବଧି ସମାପ୍ତ କରି ଓଡ଼ିଶା ଫେରାଇଦେବାକୁ ଓଡ଼ିଶା ସରକାର କେନ୍ଦ୍ରକୁ ଅନୁରୋଧ କରିଥିଲେ । ଜଣେ ଦକ୍ଷ ଅଫିସର ଭାବେ ତାଙ୍କର ସୁନାମ ରହିଛି । ଆସନ୍ତା ଡିସେମ୍ବରରେ ସେ ଚାକିରୀରୁ ଅବସର ନେବେ ।
