ଶାରଦା ଛାନିଆ ବଦଳିଯିବ କି ଟିକେଟ୍ !
Naveen Pattanaik Dillip Ray Rourkela Politics Odisha Politics
Ramachandi Prasad
ଭୁବନେଶ୍ୱର : ରାଉରକେଲାର ଲୋକପ୍ରିୟ ନେତା ହେଉଛନ୍ତି ଦିଲ୍ଲୀପ ରାୟ । ଏବେବି ତାଙ୍କର ହଜାର ହଜାର ସମର୍ଥକ ନିର୍ବାଚନ ଲଢ଼ିବା ପାଇଁ ଚାପ ପକାଇ ଆସୁଛନ୍ତି । ସେପଟେ ଏହା ତାଙ୍କର ଶେଷ ବିଧାନସଭା ନିର୍ବାଚନ ହୋଇପାରେ ବୋଲି ଦିଲ୍ଲୀ ହାଇକୋର୍ଟରେ ଦିଲ୍ଲୀପଙ୍କ ପିଟିସନ ରାଜ୍ୟ ରାଜନୀତିକ ମାହୋଲକୁ ସରଗରମ କରିଦେଇଛି । ବିଶେଷକରି ରାଉରକେଲା ବିଧାନସଭା ଆସନ ପାଇଁ ବିଜେଡ଼ି ଟିକେଟ ପାଇଥିବା ଶାରଦା ପ୍ରସାଦ ନାୟକଙ୍କ ଶିବିରରେ ଛନକା ପଶିଯାଇଛି ।
୨୦୧୯ରୁ ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକଙ୍କ ସହ ଦିଲ୍ଲୀପଙ୍କ ଭଲ ସମ୍ପର୍କ ଗଢ଼ିଉଠିଛି । ଏପରିକି ବିଜେଡ଼ି ପକ୍ଷରୁ ତାଙ୍କୁ ବାରବାର ଟିକେଟ ବି ଯଚାଯାଇଛି । ହେଲେ ଦିଲ୍ଲୀପ ରାଜନୀତିକ ଭବିଷ୍ୟତ ଯୋଜନା ସମ୍ପର୍କରେ ସମସ୍ତଙ୍କୁ ଅନ୍ଧାରରେ ରଖି ଆସିଛନ୍ତି । ନିକଟରେ ବିଜେଡ଼ି ପୁରୁଣା ନେତାଙ୍କୁ ଖୋଜିଖୋଜି ଘର ବାହୁଡ଼ା ପ୍ରକ୍ରିୟା ଆରମ୍ଭ କରିଦେଇଛି । ବିଜୟ ମହାପାତ୍ରଙ୍କ ପୁଅ ଓ ଦିବଂଗତ ନେତା ନଳିନୀ ମହାନ୍ତିଙ୍କ ପୁଅ ମଧ୍ୟ ବିଜେଡ଼ିକୁ ଆସିଥିବାରୁ ଦିଲ୍ଲୀପ ବିଜେଡ଼ିକୁ ଫେରିପାରନ୍ତି ବୋଲି ଚର୍ଚ୍ଚା ଜୋର ଧରିଥିଲା । କିନ୍ତୁ ସେଭଳି କିଛି ଘଟିନଥିଲା । ତଥାପିବି ରାଉରକେଲାରେ ଦିଲ୍ଲୀପଙ୍କର ବୈଠକ ଅନେକ କିଛି ପ୍ରଶ୍ନବାଚୀ ସୃଷ୍ଟି କରୁଥିଲା ।
ଦିଲ୍ଲୀ ହାଇକୋର୍ଟରେ ସେ ବିଧାନସଭା ନିର୍ବାଚନ ଲଢ଼ିବା କଥା ଉଲ୍ଳେଖ କରିଥିବାରୁ ତାଙ୍କର ଦଣ୍ଡାଦେଶ ସ୍ଥଗିତ ରଖାଯାଇଛି । ଫଳରେ ଦିଲ୍ଲୀପ ନିର୍ବାଚନ ଲଢ଼ିବା ନେଇ ପୁଣି ଚର୍ଚ୍ଚା ଆରମ୍ଭ ହୋଇଯାଇଛି । ଯଦି ଦିଲ୍ଲୀପ ବିଧାନସଭା ନିର୍ବାଚନ ଲଢ଼ିବେ ତେବେ ରାଉରକେଲାରୁ ହିଁ ଲଢ଼ିବେ । ସେ ଆଉ ବିଜେପିକୁ ଫେରିବେ ନାହିଁ ବୋଲି ସ୍ପଷ୍ଟ କରିଥିବାରୁ ବିଜେଡ଼ିରୁ ଲଢ଼ିବା ସମ୍ଭାବନାକୁ ଅସ୍ୱୀକାର କରାଯାଇପାରିବ ନାହିଁ । ଯଦି ସେଭଳି ହୁଏ ତେବେ ଶାରଦା ପ୍ରସାଦ ନାୟକଙ୍କ ଟିକେଟ ବଦଳିବାର ଯଥେଷ୍ଟ ସମ୍ଭାବନା ରହିଛି । ଯାହାକି ଏବେ ଶାରଦାଙ୍କ ଶିବିରରେ ଛନକା ପୂରାଇ ଦେଇଛି । ଦିଲ୍ଲୀପ କେବେ ଆଗାମୀ ନିର୍ବାଚନ ନେଇ ସ୍ପଷ୍ଟ ସଂକେତ ଦେଉଛନ୍ତି ତାହା ଉପରେ ସମସ୍ତଙ୍କ ନଜର ରହିଛି ।
