ରାଜ୍ୟରେ ବାବୁ ପଦବୀ ଖାଲି: ୬୭ ଆଇଏଏସ୍ , ୬୯ ଆଇପିଏସ୍ ,୨୫୩ ଓଏଏସ୍ ପଦବୀ ଖାଲି
Rasmita Behera
ଭୁବନେଶ୍ୱର : ରାଜ୍ୟରେ ପ୍ରଶାସନିକ ଅଧିକାରୀ ଙ୍କ ବହୁ ପଦବୀ ଖାଲି ପଡିଛି । ଯାହା ଫଳରେ ସେବା କ୍ଷେତ୍ରରେ ପ୍ରମୁଖ ଅମଲାତାନ୍ତ୍ରିକ ପଦବୀ ଖାଲି ପଡ଼ିଥିବାରୁ ଓଡ଼ିଶା ସରକାର ପ୍ରଶାସନିକ ସଙ୍କଟରେ ପଡ଼ିଥିବା ଦେଖିବାକୁ ମିଳିଛି । ଓଡ଼ିଶା ବିଧାନସଭାରେ ଏହି ଚିନ୍ତାଜନକ ପରିସ୍ଥିତି ପ୍ରକାଶ ପାଇଛି । ମୁଖ୍ୟମନ୍ତ୍ରୀ ମୋହନ ମାଝୀ ବିଧାୟକ ଟଙ୍କଧର ତ୍ରିପାଠୀଙ୍କ ଦ୍ୱାରା ରାଜ୍ୟରେ ପ୍ରଶାସନିକ ଖାଲି ପଦବୀର ସ୍ଥିତି ସମ୍ପର୍କରେ ଉଠାଯାଇଥିବା ଏକ ପ୍ରଶ୍ନର ଆନୁଷ୍ଠାନିକ ଉତ୍ତର ଦେଇ ଏଭଳି ସୂଚନା ପ୍ରଦାନ କରିଛନ୍ତି । ସରକାରୀ ଅଧିକାରୀଙ୍କ ଅଭାବ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସେବାରେ ମଧ୍ୟ ପରିଲକ୍ଷିତ ହେଉଛି । ଉପସ୍ଥାପିତ ତଥ୍ୟ ଅନୁଯାୟୀ, ଓଡ଼ିଶାରେ ବର୍ତ୍ତମାନ ୬୭ଟି ଭାରତୀୟ ପ୍ରଶାସନିକ ସେବା (ଆଇଏଏସ୍) ଏବଂ ୬୯ଟି ଭାରତୀୟ ପୁଲିସ ସେବା (ଆଇପିଏସ୍) ପଦବୀ ଖାଲି ଅଛି । ସରକାରୀ ତଥ୍ୟ ଅନୁଯାୟୀ, ରାଜ୍ୟରେ ବର୍ତ୍ତମାନ ୬୯ଟି ଭାରତୀୟ ବନ ସେବା (ଆଇଏଫଏସ) ପଦବୀ, ୨୫୩ଟି ଓଡ଼ିଶା ପ୍ରଶାସନିକ ସେବା (ଓଏଏସ) ଏବଂ ଓଡ଼ିଶା ପୁଲିସ ସେବା (ଓପିଏସ) ପଦବୀ, ୨୭୪ଟି ଓଡ଼ିଶା ଅର୍ଥ ସେବା (ଓଏଫଏସ) ପଦବୀ, ୬୧୧ଟି ଓଡ଼ିଶା ବନ ସେବା (ଓଏଫଏସ) ପଦବୀ ଖାଲିପଡ଼ିଛି । ସେହିପରି ୨୬୩ଟି ଓଡ଼ିଶା ରାଜସ୍ୱ ସେବା (ଓଆରଏସ) ପଦବୀ ଖାଲିପଡ଼ିଛି । ଏଥିସହ ବର୍ତ୍ତମାନ ୨୨ ଜଣ ଭାରତୀୟ ପ୍ରଶାସନିକ ସେବା (ଆଇଏଏସ୍) ଏବଂ ୨୪ ଜଣ ଭାରତୀୟ ପୁଲିସ ସେବା (ଆଇପିଏସ୍) ଅଧିକାରୀ ଡେପୁଟେସନରେ ଥିବା ସରକାର ମତ ରଖିଛନ୍ତି । ଏତେ ସଂଖ୍ୟକ ପ୍ରଶାସନିକ ପଦବୀ ଖାଲି ପଡ଼ିବା ଫଳରେ ବିଭିନ୍ନ ଜିଲ୍ଲା ଏବଂ ବିଭାଗରେ ପ୍ରଶାସନିକ କାର୍ଯ୍ୟ ପ୍ରଭାବିତ ହେବାର ଆଶଙ୍କା ରହିଛି । ଓଡ଼ିଶାରେ ଅମଲାତାନ୍ତ୍ରିକ ଅଭାବ ସମସ୍ୟା ଦୀର୍ଘ ଦିନ ଧରି ଚିନ୍ତାର ବିଷୟ ହୋଇଆସିଛି । ପ୍ରଶାସନିକ କାର୍ଯ୍ୟରେ ବାଧା ଏଡାଇବା ପାଇଁ ରାଜ୍ୟ ସରକାର ଯଥାଶୀଘ୍ର ଏହି ଖାଲି ପଦବୀ ପୂରଣ ପାଇଁ ଆବଶ୍ୟକୀୟ ପଦକ୍ଷେପ ଗ୍ରହଣ କରିବେ ବୋଲି ମତ ପ୍ରକାଶ ପାଇଛି ।
