ଭ୍ୟାନ-ଟ୍ରକ ଧକ୍କା, ୬ ମୃତ
Rasmita Behera
ଗୁଜରାଟ: ଗୁଜରାଟର ଭରୁଚ ଜିଲାରେ ଭ୍ୟାନ୍-ଟ୍ରକ୍ ମଧ୍ୟରେ ଧକ୍କା ହୋଇ ୬ ଜଣଙ୍କ ମୃତୁ୍ୟ ଘଟିଛି । ମଙ୍ଗଳବାର ପୁଲିସ ପକ୍ଷରୁ ଏନେଇ ସୂଚନା ମିଳିଛି । ଘରୋଇ ଭ୍ୟାନ୍ ଓ ଟ୍ରକ ମଧ୍ୟରେ ଧକ୍କା ହେବା ପରେ ସେଥିରେ ଥିବା ୬ ଜଣଙ୍କ ମୃତୁ୍ୟ ହୋଇଛି । ଦୁର୍ଘଟଣାରେ ଅନ୍ୟ ୪ ଜଣ ଆହତ ହୋଇଛନ୍ତି । ଜମ୍ବୁସର ଥାନା ଇନ୍ସପେକ୍ଟର ଏଭି ପାନାମିଆ କହିଛନ୍ତି ଯେ ସୋମବାର ରାତି ପ୍ରାୟ ୧୧ଟା ବେଳେ ମଗନାଦ ଗାଁ ନିକଟ ଜମ୍ବୁସର-ଆମୋଦ ରାସ୍ତାରେ ବେଦାଚ ଗ୍ରାମର ୧୦ ଜଣ ଲୋକ ଶୁକ୍ଳତୀର୍ଥ ଅଭିମୁଖେ ଯାଉଥିବା ବେଳେ ଏହି ଦୁର୍ଘଟଣା ଘଟିଥିଲା ।
ମଗନାଦ ଗାଁ ନିକଟରେ ରାସ୍ତାର ବାମ ଗଳିରେ ଛିଡ଼ା ହୋଇଥିବା ଏକ ଟ୍ରକକୁ ଯାତ୍ରୀବାହୀ ଭ୍ୟାନ୍ ଧକ୍କା ଦେଇଥିଲା । ଦୁର୍ଘଟଣା ପରେ ଘଟଣାସ୍ଥଳରେ ୬ ଜଣ ଯାତ୍ରୀଙ୍କ ମୃତୁ୍ୟ ଘଟିଥିବା ବେଳେ ୪ ଜଣ ଆହତ ହୋଇଛନ୍ତି । ସେମାନଙ୍କୁ ଜମ୍ବୁସରର ଏକ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି ବୋଲି ପାନାମିଆ କହିଛନ୍ତି । ମୃତକମାନେ ହେଲେ ଜୟଦେବ ଗୋହିଲ (୨୩), ସରସ୍ୱତୀ ଗୋହିଲ (୨୧), ହଂସା ଯାଦବ (୩୫), ସନ୍ଧ୍ୟା ଯାଦବ (୧୧), ବିବେକ ଗୋହିଲ (୧୬) ଓ କୀର୍ତ୍ତି ଗୋହିଲ (୬) ।ଏହି ଘଟଣା ପରେ ଜମ୍ବୁସର ପୁଲିସ ଟ୍ରକର ଅଜ୍ଞାତ ଡ୍ରାଇଭରଙ୍କ ବିରୋଧରେ ଭାରତୀୟ ନ୍ୟାୟ ସଂହିତାର ଧାରା ୧୨୫ (ମାନବ ଜୀବନକୁ ବିପଦରେ ପକାଇବା ଭଳି ବେପରୁଆ କିମ୍ବା ଅବହେଳା) ଏବଂ ୨୮୫ (ସାର୍ବଜନୀନ ରାସ୍ତା କିମ୍ବା ଯାତାୟାତ ରେଖାରେ ବିପଦ କିମ୍ବା ପ୍ରତିବନ୍ଧକ) ଅନୁଯାୟୀ ଏକ ମାମଲା ରୁଜୁ କରିଛି । ସେ ଆହୁରି ମଧ୍ୟ କହିଛନ୍ତି ଯେ ଡ୍ରାଇଭରକୁ ଏପର୍ଯ୍ୟନ୍ତ ଧରାଯାଇନାହିଁ ।
