ଜଳନ୍ତା ବିମାନରେ ନିଆଁ : ଥିଲେ ୧୭୯ ଜଣ ଯାତ୍ରୀ
Rasmita Behera
ଦି ବର୍ଣ୍ଣିଂ ଟ୍ରେନ ସିନେମା ଆପଣମାନେ ଦେଖିଥିବେ। ହେଲେ ଏବେ ବର୍ଣ୍ଣିଂ ଫ୍ଲାଇଟ ବା ଜଳନ୍ତା ବିମାନର ଭୟଙ୍କର ଦୃଶ୍ୟ ସାମ୍ନାକୁ ଆସିଛି। ଉଡ଼ାଣର ୧୦ ମିନିଟ ପରେ ଏୟାର ଇଣ୍ଡିଆ ଏକ୍ସପ୍ରେସର ଗୋଟିଏ ଇଞ୍ଜିନରେ ଲାଗି ଯାଇଥିଲା ଭୟଙ୍କର ନିଆଁ।
ନିଆଁ ଜଳୁଥିବା ବେଳେ ବିମାନ ଆଗକୁ ବଢ଼ି ଚାଲିଥିଲା। ଏଥିରେ ୧୭୯ ଜଣ ଯାତ୍ରୀ ମଧ୍ୟ ରହିଥିଲେ। ବିମାନର ଇଞ୍ଜିନ ଜଳୁଥିବା ବେଳର ଭିଡିଓ ମଧ୍ୟ ସାମ୍ନାକୁ ଆସିଛି।
ଶନିବାର ପୁଣେରେ କୋଚି ଯାଉଥିବା ଏୟାର ଇଣ୍ଡିଆ ଏକ୍ସପ୍ରେସ ଧାର୍ଯ୍ୟ ସୂଚୀ ଅନୁସାରେ ପ୍ରଥମେ ବେଙ୍ଗାଲୁରୁ ଏୟାରପୋର୍ଟରେ ଅବତରଣ କରିଥିଲା। ସେଠାରୁ ୧୭୯ ଜଣ ଯାତ୍ରୀଙ୍କୁ ନେଇ ବିମାନଟି କୋଚି ଅଭିମୁଖେ ବାହାରି ଥିଲା। କିନ୍ତୁ ଉଡ଼ାଣର ୧୦ ମିନିଟ ପରେ ବିମାନର ଗୋଟିଏ ଇଞ୍ଜିନ ହୁହୁ ହୋଇ ଜଳିବାକୁ ଲାଗିଥିଲା।
ଏହା ଦେଖି ପାଇଲଟ ତୁରନ୍ତ ବେଙ୍ଗାଲୁରୁ ଏୟାରପୋର୍ଟରେ ବିମାନର ଜରୁରୀ ଅବତରଣ କରାଇଥିଲେ। ଇଞ୍ଜିନ ଜଳୁଥିବା ବେଳେ ସେ ବେଶ ସାହାସର ସହ ଏହାକୁ ସଫଳ ଲ୍ୟାଣ୍ଡ କରାଇବାକୁ ଗୋଟିଏ ବଡ଼ ବିପଦ ଟଳି ଯାଇଛି।
ବିମାନରୁ ସମସ୍ତ ୧୭୯ ଜଣ ଯାତ୍ରୀଙ୍କୁ ତୁରନ୍ତ ଉଦ୍ଧାର କରାଯାଇଥିଲା। କିନ୍ତୁ ସେମାନଙ୍କୁ ବେଙ୍ଗାଲୁରୁରେ ପ୍ରାୟ ୧୩ ଘଣ୍ଟା ଧରି ପରବର୍ତ୍ତୀ ବିମାନ ପାଇଁ ଅପେକ୍ଷା କରିବାକୁ ପଡ଼ିଥିଲା।
ଏୟାର ଇଣ୍ଡିଆ ଏକ୍ସପ୍ରେସର IX-1132 ବିମାନରେ ୬ ଜଣ କ୍ରୁ ସଦସ୍ୟ ମଧ୍ୟ ରହିଥିଲେ। ଏତେ ବଡ଼ ଘଟଣାରେ ସମସ୍ତେ ସୁରକ୍ଷିତ ରହିଛନ୍ତି।
