ବଢ଼ିଲା ସାଂସଦଙ୍କ ଦରମା ଓ ଭତ୍ତା
Rasmita Behera
ନୂଆଦିଲ୍ଲୀ: ୨୪ ପ୍ରତିଶତ ବଢ଼ିଲା ସାଂସଦଙ୍କ ଦରମା ଓ ଭତ୍ତା । ପୂର୍ବରୁ ସେମାନେ ମାସିକ ୧ଲକ୍ଷ ଟଙ୍କା ଦରମା ପାଉଥିବା ବେଳେ ଆସନ୍ତା ଏପ୍ରିଲ୍ ୧ରୁ ପାଇବେ ୧.୨୪ଲକ୍ଷ । ସଂସଦୀୟ ବ୍ୟାପାର ମନ୍ତ୍ରାଳୟ ଜାରି କରିଥିବା ଏକ ବିଜ୍ଞପ୍ତିରେ ଏହି ଘୋଷଣାନାମା କରାଯାଇଛି । ସେହିପରି ଦୈନିକ ଭତ୍ତା (ଡେଲି ଆଲାୱେନ୍ସ) ଓ ପେନ୍ସନ ମଧ୍ୟ ବୃଦ୍ଧି କରାଯାଇଛି । ସାଂସଦମାନଙ୍କ ଦୈନିକ ଭତ୍ତା ୨ ହଜାର ଟଙ୍କା ଥିବା ବେଳେ ଏହାକୁ ୨୫୦୦କୁ ବୃଦ୍ଧି କରାଯାଇଥିବା ବେଳେ ପେନ୍ସନ୍କୁ ୨୫ହଜାର ପରିବର୍ତ୍ତେ ୩୧ହଜାରକୁ ବୃଦ୍ଧି କରାଯାଇଛି । ଏହାସହ ପ୍ରତିବର୍ଷ ସେବା ପାଇଁ ୫ ବର୍ଷ ବାଦ ସେମାନଙ୍କ ଅତିରିକ୍ତ ପେନ୍ସନ୍କୁ ୨ହଜାରରୁ ୨୫୦୦କୁ ବୃଦ୍ଧି କରାଯାଇଛି । ସାଂସଦଙ୍କ ଦରମା, ଭତ୍ତା ଓ ପେନ୍ସନ୍ ଆକ୍ଟ ଏବଂ ୧୯୬୧ ଆୟକର ଆଇନରେ ନିର୍ଦ୍ଦିଷ୍ଟ ମୂଲ୍ୟ ଓ ମୁଦ୍ରାସ୍ଫୀତି ସୂଚକାଙ୍କ ଅଧୀନରେ ଏହି ପରିବର୍ତ୍ତନ କରାଯାଇଛି । ତେବେ ଦୀର୍ଘ ୭ ବର୍ଷ ପରେ ଅର୍ଥାତ ୨୦୧୮ ପରଠାରୁ ସାଂସଦଙ୍କ ଦରମା ଏବଂ ଭତ୍ତା କ୍ଷେତ୍ରରେ ଏହା ପ୍ରଥମ ସଂଶୋଧନ ବୋଲି ଜଣାପଡ଼ିଛି । ସୂଚନାଯୋଗ୍ୟ ୨୦୧୮ରେ ହୋଇଥିବା ଶେଷ ସଂଶୋଧନରେ ସାଂସଦମାନଙ୍କ ମାସିକ ଦରମା ୧ଲକ୍ଷ ଟଙ୍କା ସ୍ଥିର କରାଯାଇଥିଲା । ନିର୍ବାଚନମଣ୍ଡଳୀସ୍ତରୀୟ ଭତ୍ତା ଓ ଜନସେବା ପାଇଁ ୭୦,୦୦୦ ଟଙ୍କା ଏହାର ଅନ୍ତର୍ଭୁକ୍ତ । ସେହିପରି ୨୦୧୮ ସଂଶୋଧନ ଅନୁଯାୟୀ ସାଂସଦମାନଙ୍କୁ ଫୋନ୍ ଏବଂ ଇଣ୍ଟରନେଟ୍ ବ୍ୟବହାର, ନିଜ ପାଇଁ ଓ ପରିବାର ପାଇଁ ପ୍ରତିବର୍ଷ ୩୪ଟି ନିଃଶୁଳ୍କ ଘରୋଇ ବିମାନ ଯାତ୍ରା, ପ୍ରଥମଶ୍ରେଣୀ ଟିକେଟ୍ରେ ଟ୍ରେନ୍ୟାତ୍ରା (ଅସୀମିତ) ଏବଂ ପାଇଁ ସଡ଼କ ଯାତ୍ରା ପାଇଁ ମାଇଲେଜ୍ ଭତ୍ତା ଭଳି ଅତିରିକ୍ତ ବାର୍ଷିକ ଭତ୍ତା ଯୋଗାଇ ଦିଆଯାଉଛି । ଏହାସହ ବାର୍ଷିକ ୫୦,୦୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଜୁଳି, ୪,୦୦୦ କିଲୋଲିଟର ପର୍ଯ୍ୟନ୍ତ ପାଣି ଏବଂ ନୂଆଦିଲ୍ଲୀରେ ସରକାରୀ ବାସଗୃହ ମଧ୍ୟ ସୁବିଧା ଯୋଗାଇ ଦିଆଯାଉଛି । ଯେଉଁମାନେ ସରକାରୀ ବାସଭବନରେ ନ ରହିବେ ସେମାନଙ୍କୁ ବାସଗୃହ ଭତ୍ତା ବି ପ୍ରଦାନ କରାଯାଉଛି ।
