ଜିଲ୍ଲା ଗଠନକୁ ୩୩ ବର୍ଷ : ବିକାଶ ଠୁ ଦୂରରେ କେନ୍ଦ୍ରାପଡ଼ା

କେନ୍ଦ୍ରାପଡ଼ାରୁ ସ୍ୱତନ୍ତ୍ର ପ୍ରତିନିଧି ଉକôଳ କେଶରୀ ପାହାଡସିଂ : ୧୯୯୩ ମସିହା ଆଜିର ଦିନରେ ଅର୍ଥାତ୍ ଏପ୍ରିଲ୍ ୧ ତାରିଖରେ ତତ୍କାଳୀନ ରାଜ୍ୟ ସରକାର ଅବିଭକ୍ତ କଟକ ଜିଲ୍ଲାରୁ ପୃଥକ୍ କରି କେନ୍ଦ୍ରାପଡ଼ାକୁ ସ୍ୱତନ୍ତ୍ର ଜିଲ୍ଲା ମାନ୍ୟତା ଦେଇଥିଲେ । ଆଜିର ଦିନରେ ଜିଲ୍ଲା ଗଠନକୁ ୩୨ ପୁରି ଛୁଇଁଲା ୩୩ ବର୍ଷ । ଜିଲ୍ଲା ଗଠନ ହେବା ପରେ ବିକାଶର ବେଗ ତ୍ୱରାନ୍ୱିତ ହେବ ବୋଲି ଜିଲ୍ଲାବାସୀ ଅନେକ ସ୍ୱପ୍ନ ଦେଖିଥିଲେ କିନ୍ତୁ ଏବେ ମଧ୍ୟ ବିକାଶ ଭୂଇଁରୁ ଉଠିନଥିବା ଅଭିଯୋଗ ହେଉଛି । ଅର୍ଥାତ୍ ବିକାଶ ସ୍ୱପ୍ନ ଏବେ ବି ରହିଯାଇଛି ଅଧୁରା । ଏ ସଂକ୍ରାନ୍ତରେ କେନ୍ଦ୍ରାପଡ଼ା ସେବା ସମିତିର ସଭାପତି ମନୋଜ ନାୟକ କୁହନ୍ତି ଅବିଭକ୍ତ କଟକ ଜିଲ୍ଲାକୁ ଭାଗ କରାଯାଇ ଏକ ସଙ୍ଗରେ ଯାଜପୁର ଓ ଜଗତସିଂହପୁର ଜିଲ୍ଲା ଗଠନ କରାଯାଇଥିଲା । କିନ୍ତୁ ବିଡ଼ମ୍ବନାର ବିଷୟ ଏହି ପଡୋଶୀ ଦୁଇ ଜିଲ୍ଲା ତୁଳନାରେ କେନ୍ଦ୍ରାପଡ଼ା ଜିଲ୍ଲା ବିକାଶ କ୍ଷେତ୍ରରେ ପଡ଼ିଯାଉଛି ଅନେକ ପଛରେ । ଏହି ଦୁଇ ଜିଲ୍ଲାରେ ଏକାଧିକ ଶିଳ୍ପ କାରଖାନା ଗଢି ଉଠୁଥିବା ବେଳେ ଅଦ୍ୟାବଧି କେନ୍ଦ୍ରାପଡ଼ା ଜିଲ୍ଲା ରହିଯାଇଛି ଶିଳ୍ପ ବିହୀନ ଜିଲ୍ଲା ତାଲିକାରେ । କର୍ମ ନିଯୁକ୍ତି ଓ ଦାଦନ ସମସ୍ୟା ଏବେ ମଧ୍ୟ ଜିଲ୍ଲାର ଏକ ବଡ ସମସ୍ୟା ହୋଇ ମୁଣ୍ଡ ଟେକିଛି । ସେ ଆହୁରି ମଧ୍ୟ କହିଛନ୍ତି ଜଗତସିଂହପୁର ଜିଲ୍ଲାରେ ମେଡିକାଲ୍ କଲେଜ୍ ପ୍ରତିଷ୍ଠା ହେବା ପାଇଁ ଘୋଷଣା ସରିଥିବା ବେଳେ କେନ୍ଦ୍ରାପଡ଼ା ଜିଲ୍ଲାରେ ମେଡିକାଲ୍ କଲେଜ୍ ପ୍ରତିଷ୍ଠା ଦାବି ନେଇ ବିଗତ ଦିନରେ ଜିଲ୍ଲାବାସୀଙ୍କ ବୃହତ୍ତର ସ୍ୱାର୍ଥ ଦୃଷ୍ଟିରୁ ପାଖାପାଖି ଦୁଇମାସ ଧରି ବିଭିନ୍ନ ସଙ୍ଗଠନ ମାନଙ୍କ ପକ୍ଷରୁ ବିକ୍ଷୋଭ କରାଯାଇଥିଲେ ମଧ୍ୟ ଏହି ନାର୍ଯ୍ୟ ଦାବିକୁ ପୂରଣ ନ କରିବା ନିହାତି ଦୁଃଖର ବିଷୟ । ପ୍ରଶାସନିକ ପଦାଧିକାରୀ ଓ ଜିଲ୍ଲାର ଜନ ପ୍ରତିନିଧି ମାନଙ୍କ ସମନ୍ୱୟ ଅଭାବରୁ ଜିଲ୍ଲାବାସୀଙ୍କ ଏହି ଦାବି ପୂରଣ ହୋଇପାରୁନଥିବା ଶ୍ରୀ ନାୟକ ଅଭିଯୋଗ ବାଢିଛନ୍ତି । ସେହିପରି ମାନବଧିକାର କର୍ମୀ ସାଗର ଜେନା କୁହନ୍ତି ଜିଲ୍ଲା ଗଠନକୁ ତିରିଶ ବର୍ଷରୁ ଊଦ୍ଧ୍ୱର୍ ସମୟ ବିତିଯାଇଥିଲେ ମଧ୍ୟ ଏବେ ବି ଜିଲ୍ଲାବାସୀ ଅନେକ ମୌଳିକ ସୁବିଧା ପାଇବାରୁ ବଞ୍ଚିତ ହୋଇ ରହିଛନ୍ତି । ରାଜ୍ୟର ଏକାଧିକ ଜିଲ୍ଲାମାନଙ୍କରେ ଆମ ବସ୍ ସେବା ମିଳୁଥିବା ବେଳେ କେନ୍ଦ୍ରାପଡ଼ା ପୌରପାଳିକା ରାଜ୍ୟର ସର୍ବ ପୁରାତନ ପୌରପାଳିକା ହୋଇଥିଲେ ମଧ୍ୟ ଜିଲ୍ଲାବାସୀ ଏପର୍ଯ୍ୟନ୍ତ ଏହି ସେବାରୁ ବଞ୍ଚିତ ହୋଇରହିଛନ୍ତି । ସମସ୍ତ ଭିତ୍ତିଭୂମି ଥିଲେ ମଧ୍ୟ ଏହି ସୁବିଧାର ସୁଯୋଗ ନ ମିଳିବା ଜିଲ୍ଲାବାସୀଙ୍କୁ ବ୍ୟାଥିତ କରୁଛି ଏବଂ ଆଗାମୀ ଦିନରେ ଏହା ଆନେ୍ଦାଳନାତ୍ମକ ରୂପ ନେଇପାରେ ବୋଲି ସେ ଚେତାଇ ଦେଇଛନ୍ତି । ତେବେ ଜିଲ୍ଲାର ବିଭିନ୍ନ ଯୁବ ସଙ୍ଗଠନ ଏବଂ ସାଂସ୍କୃତିକ ଅନୁଷ୍ଠାନ ମାନେ ଅଭିଯୋଗ ଆଣି କୁହନ୍ତି ସ୍ଥାନୀୟ ରାଜନେତା ଓ ପ୍ରଶାସକଙ୍କ ଆନ୍ତରିକତା ଅଭାବରୁ ଜିଲ୍ଲା ଗଠନ ଦିବସକୁ ସ୍ମରଣୀୟ କରି ରଖିବା ନିମନ୍ତେ ଆଜିର ଦିନରେ କୌଣସି ବର୍ଷ ଜିଲ୍ଲା ମହୋସôବ ପାଳନ ହେଉନଥିବା ନିହାତି ଦୁଃଖର ବିଷୟ । ଜିଲ୍ଲାବାସୀଙ୍କ ଏସବୁ ଦାବି ପୂରଣ ଦିଗରେ କେବଳ ନିର୍ବାଚନୀ ପ୍ରତିଶ୍ରୁତି ନ ଦେଇ ପ୍ରଶାସକ ଓ ରାଜନେତା ମାନଙ୍କ ମଧ୍ୟରେ ସମନ୍ୱୟ ରକ୍ଷା କରାଯାଇ ଆନ୍ତରିକତା ସହିତ ଜିଲ୍ଲା ବିକାଶ ଦିଗରେ କାର୍ଯ୍ୟ କରାଗଲେ ବିକାଶ ରଥ ଭୂଇଁରୁ ଉଠି ଶିଖର ଛୁଇଁ ପାରନ୍ତା ବୋଲି ସାଧାରଣରେ ମତ ପ୍ରକାଶ ପାଉଛି ।