ଆନିମଲ୍ ଲୁକରେ ନଜର ଆସିଲେ ମାହି

 ଇଣ୍ଡିଆନ୍ ପ୍ରିମିୟର୍ ଲିଗ୍ ୨୦୨୫ ର ଶୁଭାରମ୍ଭ ମାର୍ଚ୍ଚ ୨୨ ତାରିଖରୁ ହେବାକୁ ଯାଉଛି । ସବୁ ଟିମ୍ ପଡ଼ିଆରେ ଭଲ ପ୍ରଦର୍ଶନ କରିବା ପାଇଁ ଅଣ୍ଟା ସଳଖିଲେଣି । ଚେନ୍ନାଇ ସୁପର୍ କିଙ୍ଗ୍ସ ଟିମ୍ ମଧ୍ୟ ମୈଦାନରେ ଓହ୍ଲାଇବା ପାଇଁ ପ୍ରସ୍ତୁତି ଆରମ୍ଭ କରିସାରିଲାଣି । ୟେଲୋ ଜର୍ସି ଟିମର ଅନ୍ୟ ଖେଳାଳିଙ୍କ ସମେତ ପୂର୍ବ ଅଧିନାୟକ ମହେନ୍ଦ୍ର ସିଂ ଧୋନୀ ମଧ୍ୟ ଜୋରଦାର୍ ପ୍ରସ୍ତୁତିରେ ଲାଗିଛନ୍ତି । ଟ୍ରେନିଂ ସେସନରେ ନିଜ ଫର୍ମର ଝଲକ ଦେଖାଇ ସମସ୍ତଙ୍କୁ ଚକିତ କରିଛନ୍ତି ଥାଲ୍ଲା  । ତେବେ ଏହାରି ଭିତରେ ମାହିଙ୍କ ଏକ ଭିଡିଓ ସୋସିଆଲ୍ ମିଡିଆରେ ଖୁବ୍ ଭାଇରାଲ୍ ହେଉଛି । ଯାହାକୁ ନେଇ ଏବେ ଚାରିଆଡ଼େ ଚର୍ଚ୍ଚା ।କ୍ରିକେଟ୍ ଜଗତର ମହାନ୍ ଖେଳାଳି ମହେନ୍ଦ୍ର ସିଂ ଧୋନୀ ସବୁବେଳେ ଚର୍ଚ୍ଚାର ପରିସରକୁ ଆସିଥାନ୍ତି।

କେତେବେଳେ ପଡ଼ିଆରେ ହେଲିକପ୍ଟର ସଟ୍ ମାରି ତ ଆଉ କେତେବେଳେ ଚାଷଜମିରେ ଚାଷ କରି ; ସେନା ଶିବିରରେ ୟୁନିଫର୍ମ ପିନ୍ଧି ବୁଲିବାଠୁ ଆରମ୍ଭ କରି ବାଇକ୍ କଲେକ୍ସନକୁ ନେଇ ମଧ୍ୟ ଖୁବ୍ ଚର୍ଚ୍ଚାରେ ରହିଛନ୍ତି ମାହି । ସବୁବେଳେ ହଟକେ ଅନ୍ଦାଜରେ ନଜର ଆସୁଥିବା ପୂର୍ବତନ କ୍ୟାପଟେନ୍ କୂଲଙ୍କର ଏବେ ଆଉ ଏକ ଅନ୍ଦାଜ୍ ବେଶ୍ ଚର୍ଚ୍ଚା ସାଉଁଟିଛି । ନିକଟରେ ଏକ ବିଜ୍ଞାପନରେ ବଲିଉଡ୍ ଅଭିନେତା ରଣବୀର କପୁରଙ୍କ 'ଆନିମଲ୍' ଫିଲ୍ମର ଚରିତ୍ରର ଅନୁକରଣ କରି ସମସ୍ତଙ୍କୁ ଚକିତ କରିଦେଇଛନ୍ତି ଥାଲ୍ଲା । ଏହି ବିଜ୍ଞାପନଟି ଏକ ଇଲେକ୍ଟ୍ରିକ୍ ସାଇକେଲ୍ କମ୍ପାନୀ ପାଇଁ ତିଆରି କରାଯାଇଛି । ଯେଉଁଥିରେ ଧୋନୀ ଲମ୍ବା କେଶ ରଖି ରଣବୀର କପୁରଙ୍କ ପରି ଦେଖାଯାଉଛନ୍ତି ।

ବିଜ୍ଞାପନରେ ଧୋନୀ ନିଜର ଦାମୀ କାରରୁ ଓହ୍ଲାଇ ହାତରେ ଏକ ଇ-ସାଇକେଲ୍ ଧରି ରାସ୍ତା ପାର୍ ହେଉଥିବାର ନଜର ଆସୁଛନ୍ତି । ଫିଲ୍ମରେ ଯେପରି ରଣବୀର କପୁର ବନ୍ଧୁକ ଧରି ଚାଲୁଛନ୍ତି ଠିକ୍ ସେମିତି ନକଲ କରୁଛନ୍ତି ମାହି । ଫିଲ୍ମ ନିର୍ମାତା ସନ୍ଦୀପ ରେଡ୍ଡୀ ଭାଙ୍ଗା ମଧ୍ୟ ବିଜ୍ଞାପନରେ ଅଭିନୟ କରିଛନ୍ତି । ଭାଙ୍ଗା କହୁଛନ୍ତି, "ମାଇଣ୍ଡ-ବ୍ଲୋଇଙ୍ଗ୍, ଫାଣ୍ଟାଷ୍ଟିକ୍, ମଜା ଆସିଗଲା ସାର୍  ।  ଲୋକେ ଅଭିନୟ ଦେଖି ସିଟି ମାରିବେ ନିଶ୍ଚୟ ।"ଧୋନୀ 'ଆନିମଲ୍' ଚରିତ୍ରରେ ଅଭିନୟ କଲା ପରି ଉତ୍ତର ଦେଉଛନ୍ତି, " ଶୁନାଇ ଦେ ରହା ହେ ମୁଝେ , ବେହରା ନହିଁ ହୁଁ ମେ ।" ଭାଙ୍ଗା ଉତ୍ସାହର ସହିତ କହୁଛନ୍ତି, "ଅବ୍ ହୁଆ ନା ମେରା ହିରୋ ରେଡ଼ି ।"

ଏହି ବିଜ୍ଞାପନଟି ସୁଟ୍ ହେବା ପରେ ଅନଲାଇନରେ ଖୁବ୍ ଭାଇରାଲ୍ ହେଉଛି । ଲୋକେ ଧୋନୀଙ୍କ ଅଭିନୟ ଏବଂ ବିଜ୍ଞାପନର କନସେପ୍ଟକୁ ଭୁରି ଭୁରି ପ୍ରଶଂସା କରୁଛନ୍ତି । ଜଣେ ସୋସିଆଲ୍ ମିଡିଆ ୟୁଜର୍ସ ଲେଖିଛନ୍ତି, "ଇମୋଟରାଡ୍ ସାଇକେଲ୍ କମ୍ପାନି ଥାଲ୍ଲା ଏବଂ ଭାଙ୍ଗାଙ୍କୁ GTA 6 ପୂର୍ବରୁ ଏକାଠି ଆଣିଦେଲା , ୱାଃ !" ଅନ୍ୟ ଜଣେ ୟୁଜର୍ କହିଛନ୍ତି, "ଏହା ପ୍ରଥମ ବିଜ୍ଞାପନ ଯାହାକୁ ମୁଁ ନିଜେ ଗୁଗଲ୍ କରି ପାଞ୍ଚ ଥର ଦେଖିଲିଣି !" କହିବାକୁ ଗଲେ , ଖେଳ ଏବଂ ସିନେମା ଭାରତର ଦୁଇଟି ବଡ଼ ମନୋରଞ୍ଜନ ଇଣ୍ଡଷ୍ଟ୍ରିରେ ଧୋନୀଙ୍କ ପରାକାଷ୍ଠା ଏବଂ ଯୁଗଳବନ୍ଦୀକୁ ଦର୍ଶକ ଖୁବ୍ ପସନ୍ଦ କରୁଛନ୍ତି । 

ବର୍ତ୍ତମାନ ସମସ୍ତଙ୍କ ନଜର ମହେନ୍ଦ୍ର ସିଂହ ଧୋନୀଙ୍କ ଉପରେ ରହିଛି, କାରଣ ସେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ୧୮ ତମ ସିଜନ୍ ପାଇଁ ପ୍ରସ୍ତୁତି କରୁଛନ୍ତି ।ସିଏସକେ ତାଙ୍କୁ ୪ କୋଟି ଟଙ୍କାରେ ରିଟେନ୍ କରିଛି । ଧୋନୀ ସିଏସକେକୁ ପୂର୍ବରୁ ପାଞ୍ଚଟି ଆଇପିଏଲ୍ ଟାଇଟଲ୍ ଜିତାଇଛନ୍ତି ଏବଂ ବର୍ତ୍ତମାନ ତାଙ୍କ ପାଖରେ ତିନୋଟି ବଡ଼ ରେକର୍ଡ଼ କରିବାର ସୁଯୋଗ ଅଛି ଯାହା ବୋଧହୁଏ କେହି ଭାଙ୍ଗି ପାରିବେ ନାହିଁ ।