ପ୍ରସନ୍ନଙ୍କ ପ୍ରଶ୍ନବାଣରେ ପାଣ୍ଡିଆନ୍‌ ଘାଇଲା

ଉତ୍ତର ଦେବାକୁ ସାହାସ ଅଛି କି ?
।। ପ୍ରଭାନ୍ୟୁଜ୍‌ ।। ଭୁବନେଶ୍ୱର  : ବିଜୁବାବୁଙ୍କୁ ଭାରତ ରତ୍ନ ଦେବା ପାଇଁ ମୁଁ ସଂସଦରେ ଦାବି କଲି  । ପାଣ୍ଡିଆନ୍‌ ରାଗିକି ଫୋନ୍‌ କଲେ, ଏମିତି ନକହିବାକୁ ତାଗିଦ୍‌ କଲେ  । ଗୀତା ମେହେଟ୍ଟାଙ୍କୁ ରାଜ୍ୟସଭା ପଠାଇବାକୁ କହୁଥିଲି  । ପାଣ୍ଡିଆନ୍‌ ଫୋନ୍‌ କରି ତାଗିଦ୍‌ କଲେ  । ଠାକୁରଙ୍କୁ ଅନେଇ କହୁଛି, ମୁଁ ସତ କହୁଛି  । ବାବା ପ୍ରସନ୍ନ ପାଟ୍ଟଶାଣୀଙ୍କ ଏହି ବିସ୍ଫୋରକ ମନ୍ତବ୍ୟ ଏବେ ରାଜ୍ୟ ରାଜନୀତିରେ ଚହଳ ସୃଷ୍ଟି କରିଛି  । ହେଲେ ବାବାଙ୍କ ଏହି ପ୍ରଶ୍ନର ଉତ୍ତର ଦେବାକୁ ପାଣ୍ଡିଆନଙ୍କର ସାହାସ ଅଛି ତ ? ସେ ନିଜେ ଗଣମାଧ୍ୟମକୁ ଆସି ଏହାକୁ ଖଣ୍ଡନ କରିପାରିବେ ତ ? ନାଁ ନିଜ ଚେଲାଚାମୁଣ୍ଡାଙ୍କ ଜରିଆରେ ବାବାଙ୍କ ଗୋହି ଖୋଳିବେ ? ଏବେ ଏହି ପ୍ରଶ୍ନ ରାଜନୀତିକ ଅଳିନ୍ଦରେ ଘୂରିବୁଲୁଛି  । 

ପ୍ରସନ୍ନ ପାଟ୍ଟଶାଣୀ ଏକ ଟିଭି ଚ୍ୟାନେଲକୁ ସାକ୍ଷାତକାର ଦେଇ ପାଣ୍ଡିଆନଙ୍କ ଗୋହି ଖୋଳିଛନ୍ତି  । ସେ କହିଥିଲେଯେ, ଦିନେ ସେ ସଂସଦରେ ବିଜୁବାବୁଙ୍କୁ ଭାରତ ରତ୍ନ ଦେବାକୁ ଦାବି ଉପସ୍ଥାପନ କରିଥିଲେ  । ହେଲେ ପାଣ୍ଡିଆନ୍‌ ମୋତେ ଫୋନ୍‌ କରି ତାଗିଦ୍‌ କଲେ  । ତୁମେ କାହିଁକି ଏକଥା ଉଠାଇଲ ବୋଲି ପଚାରିଲେ  । ସେହିପରି ଗୀତା ମେହେଟ୍ଟା, ବିଜୁବାବୁଙ୍କ ଝିଅ  । ଜଣେ ଓଡ଼ିଆ ଲେଖିକା ଭାବେ ତାଙ୍କର ସୁନାମ ରହିଛି  । ତାଙ୍କୁ ରାଜ୍ୟସଭା ପଠାଯାଉ ବୋଲି କହିଲି  । ପୁଣି ପାଣ୍ଡିଆନ୍‌ ତାଗିଦ୍‌ କଲେ  । ସେ ବିଜୁବାବୁ ଭାରତ ରତ୍ନ ପାଆନ୍ତୁ ବୋଲି ଚାହୁଁନଥିଲେ  ।

ପାଣ୍ଡିଆନଙ୍କୁ ନବୀନଙ୍କ କ୍ଳିନଚିଟ୍‌ ପ୍ରସଙ୍ଗରେ ପାଟ୍ଟଶାଣୀ କହିଲେଯେ, ଦିନେ ନବୀନ ଦୋଷୀକୁ ତୁରନ୍ତ ଦଣ୍ଡ ଦେଉଥିଲେ  । ଏମିତି ଅନେକ ନେତା ଓ ଖୋଦ୍‌ ପ୍ୟାରୀବାବୁଙ୍କ ଉପରେ ବି କାର୍ଯ୍ୟାନୁଷ୍ଠାନ ନିଆଯାଇଛି  । ହେଲେ ପାଣ୍ଡିଆନଙ୍କ ବେଳକୁ ଏମିତି କାହିଁକି କରୁଛନ୍ତି  । ନବୀନ ଆଉ ପୁରୁଣା ନବୀନ ହୋଇନାହାନ୍ତି  । ପାଣ୍ଡିଆନଙ୍କୁ କ୍ଳିନଚିଟ୍‌ ଦେଇ ସେ ଭୁଲ କାମ କରିଛନ୍ତି  । ସେହିପରି ବିଜେଡ଼ି ପାଇଁ ଆମେ କଷ୍ଟ କଲୁ  । ପରିଶ୍ରମ ଆମର ହେଲେ ଫାଇଦା ପାଣ୍ଡିଆନଙ୍କର  । ବିଜୁବାବୁଙ୍କ ଅମଳରୁ ଦଳ ପାଇଁ କାମ କରୁଥିବା ଅନେକ ନେତାଙ୍କୁ ସେ ତଡ଼ି ଦେଇଛନ୍ତି  । ପ୍ୟାରୀ ଓ ପାଣ୍ଡିଆନଙ୍କ ମଧ୍ୟରେ ବହୁ ଫରକ ରହିଛି  । ପ୍ୟାରୀବାବୁ ବିଧାୟକ ଓ ଅନ୍ୟ ନେତାଙ୍କ ସହ ଭଲ ସମ୍ପର୍କ ରଖୁଥିଲେ  । ଭଗବାନ ସବୁ ସହନ୍ତି ହେଲେ ଗର୍ବ ସହନ୍ତି ନାହିଁ  । ଯାହାର ପ୍ରତିଫଳନ ନିର୍ବାଚନରେ ଦେଖିବାକୁ ମିଳିଛି ବୋଲି ପାଟ୍ଟଶାଣୀ କହିଛନ୍ତି  ।

ନିକଟରେ ମଧ୍ୟ ପାଟ୍ଟଶାଣୀ ବିସ୍ଫୋରକ ମନ୍ତବ୍ୟ ଦେଇଥିଲେ  । ସେ କହିଥିଲେଯେ, ପାଣ୍ଡିଆନଙ୍କ ପାଇଁ ମୁଁ ବିଜେଡ଼ି ଛାଡ଼ିଥିଲି  । ତାଙ୍କରି ପାଇଁ ଏକ ଲୋକପ୍ରିୟ ସରକାର କ୍ଷମତାରୁ ଚାଲିଗଲା  । ଲୋକେ ଥରେ ପ୍ରତ୍ୟାଖ୍ୟାନ କରିଥିବା ଦଳକୁ ପୁଣି କ୍ଷମତା ଦେବେବୋଲି କି ଗ୍ୟାରେଣ୍ଟି ରହିଛି  । ଯେ ପର୍ଯ୍ୟନ୍ତ ପାଣ୍ଡିଆନ୍‌ ବିଜେଡ଼ିରେ ଥିବେ ସେପର୍ଯ୍ୟନ୍ତ ବିଜେଡ଼ି କ୍ଷମତାକୁ ଆସିପାରିବ ନାହିଁ ବୋଲି ସେ କହିଛନ୍ତି  ।