ବିଜେପି ୪ ଫାଳ ହୋଇଯିବ : ସସ୍ମିତ
Rasmita Behera
ଭୁବନେଶ୍ୱର : ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାମ ଘୋଷଣା କଲେ ବିଜେପି ୪ ଫାଳ ହୋଇଯିବ । ବିଜେପିକୁୁ କଟାକ୍ଷ କରି ଏଭଳି କହିଛନ୍ତି ରାଜ୍ୟସଭା ସାଂସଦ ତଥା ବିଜେଡ଼ି ମୁଖପାତ୍ର ସସ୍ମିତ ପାତ୍ର ।
ଆଜି ସକାଳୁ ସେ ଏକ୍ସରେ ସୂଚନା ଦେଇ କହିଥିଲେଯେ, ଆଜି ବିଜେପି ନେତାମାନେ ସାମ୍ବାଦିକ ସମ୍ମିଳନୀରେ ଜଣେ ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାମ ଘୋଷଣା କରିବାକୁ ଯାଉଛନ୍ତି । ଜଣେ ମହିଳା ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାଁ ଘୋଷଣା କରାଯାଉଥିବା ଉକ୍ତ ସୂତ୍ରରୁ ଜାଣିବାକୁ ମିଳିଛି । ଏହା ଭଲକଥାଯେ, ସେମାନେ ଜଣେ ମହିଳାଙ୍କ ନାଁ ପ୍ରାର୍ଥୀ ଭାବେ ଘୋଷଣା କରୁଛନ୍ତି । କିନ୍ତୁ ପରେ ପରେ ସେ ବିଜେପିକୁ କଟାକ୍ଷ କରି କହିଥିଲେଯେ, ଦଳ ଭିତରେ ନେତାଙ୍କ ମଧ୍ୟରେ ଲଢେ଼ଇ ଯୋଗୁଁ ସେମାନେ ପ୍ରାର୍ଥୀ ଘୋଷଣା କରୁନାହାନ୍ତି । ଆଶାୟୀଙ୍କ ଭିତରେ କଳି ହେଉଛି । ଏଭଳି ସ୍ଥିତିରେ ବିଜେପି ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାମ ଘୋଷଣା କଲେ ଦଳ ଚାରିଫାଳ ହୋଇଯିବ ବୋଲି ସେ କହିଥିଲେ ।
ପୂର୍ବରୁ ବିଜେଡ଼ି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ମଧ୍ୟ ଅନୁରୂପ ଢଙ୍ଗରେ ବିଜେପିକୁ ସମାଲୋଚନା କରିଥିଲେ । ସେ କହିଲେଯେ, ଏକ ମିଳିତ ସାମ୍ବାଦିକ ସମ୍ମିଳନୀରେ ବରିଷ୍ଠ ନେତାମାନେ ଏକାଠି ହୋଇ ବିଧାନସଭା ନିର୍ବାଚନ ପାଇଁ ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରିବାକୁ ଯାଉଛନ୍ତି ।
