ନାଗପୁର ଦିନିକିଆ ଜିତି ବି ୩ ବଡ଼ ଭୁଲ କରିଛି ଟିମ୍ ଇଣ୍ଡିଆ: ପୁରୁଣା ଭୁଲ ସୁଧାରିବ ?
Rasmita Behera
ନାଗପୁର ଦିନିକିଆରେ ଭାରତ ଇଂଲଣ୍ଡକୁ ୪ ୱିକେଟରେ ପରାଜିତ କରିଛି । ବିଜୟର ନାୟକ ଥିଲେ 'ପ୍ଲେୟାର ଅଫ୍ ଦି ମ୍ୟାଚ୍' ଶୁଭମନ ଗିଲ୍ । ସେ ୯୬ ବଲରେ ୮୭ ରନର ଇନିଂସ ଖେଳିଥିଲେ । ଏହା ବ୍ୟତୀତ ଶ୍ରେୟସ ଆୟର ଏବଂ ଅକ୍ଷର ପଟେଲ ମଧ୍ୟ ସେମାନଙ୍କର ଅର୍ଦ୍ଧଶତକୀୟ ପାଳି ବଳରେ ଭାରତକୁ ବିଜୟ ଦ୍ୱାରରେ ପହଞ୍ଚାଇ ଦେଇଥିଲେ । ତାଙ୍କର ଡେବ୍ୟୁ ମ୍ୟାଚ୍ରେ, ହର୍ଷିତ ରାଣା ମଧ୍ୟ ୩ ୱିକେଟ୍ ନେଇ ନିଜର ଦକ୍ଷତା ଦେଖାଇଛନ୍ତି । ରବିନ୍ଦ୍ର ଜାଡେଜା ମଧ୍ୟ ତାଙ୍କ ସ୍ପିନର ଯାଦୁ ବିସ୍ତାର କରିଥିଲେ । ଟିମ୍ ଇଣ୍ଡିଆ ଏବଂ ଇଂଲଣ୍ଡ ମଧ୍ୟରେ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜର ପ୍ରଥମ ମ୍ୟାଚ୍ ଗୁରୁବାର ନାଗପୁରରେ ଖେଳାଯାଇଥିଲା । ପ୍ରଥମ ମ୍ୟାଚ୍ ଜିତି ଭାରତ ସିରିଜରେ ୧-୦ରେ ଆଗୁଆ ହୋଇଛି । ଏବେ ଉଭୟ ଦଳ ଫେବୃଆରୀ ୯ ତାରିଖ ଅର୍ଥାତ ରବିବାର କଟକର ବାରବାଟୀ ଷ୍ଟାଡିୟମରେ ମୁହାଁମୁହିଁ ହେବେ ।
ଯଦିଓ ଭାରତୀୟ ଦଳ ଏହି ମ୍ୟାଚ୍ ଜିତିଥିଲା, ତଥାପି ଏଥିରେ ତିନୋଟି ବଡ଼ ଭୁଲ ମଧ୍ୟ କରିଥିଲା । ପ୍ରଥମତଃ, ରୋହିତ ଶର୍ମାଙ୍କ ଖରାପ ଫର୍ମ । ବର୍ଡର ଗାଭାସ୍କର ଟ୍ରଫିରେ ଖରାପ ଫର୍ମକୁ ପଛରେ ପକାଇ ନିଜର ପ୍ରିୟ ଫର୍ମାଟ (ODI)ରେ ଚମକିବା ନେଇ ଅଧିନାୟକ ରୋହିତଙ୍କଠାରୁ ଆଶା କରାଯାଉଥିଲା । କିନ୍ତୁ ସେ ନାଗପୁରରେ ସେଥିରେ ମଧ୍ୟ ବିଫଳ ହୋଇଥିଲେ । ସେ ୭ଟି ବଲ୍ ଖେଳିଥିଲେ, କିନ୍ତୁ କେବଳ ୨ରନ୍ ହିଁ କରିପାରିଥିଲେ । ହିଟମ୍ୟାନ୍ ରୋହିତ ଶର୍ମାଙ୍କୁ ଦ୍ରୁତ ବୋଲର ସାକିବ ମହମ୍ମଦ ଇନସୁଇଙ୍ଗ୍ ବଲରେ କ୍ୟାଚ୍ ଆଉଟ୍ କରାଇଥିଲେ । ଦିନିକିଆ ସିରିଜ୍ ପରେ, ଭାରତକୁ ସମାନ ଫର୍ମାଟରେ ଚାମ୍ପିୟନ୍ସ ଟ୍ରଫି ମଧ୍ୟ ଖେଳିବାକୁ ପଡିବ । ଏପରି ପରିସ୍ଥିତିରେ, ରୋହିତଙ୍କ ଖରାପ ଫର୍ମ ଚିନ୍ତାର ପ୍ରମୁଖ କାରଣ ହୋଇ ରହିଛି ।
ରୋହିତ ଶସ୍ତାରେ ଆଉଟ୍ ହେବା ପରେ, ଏହାର ସିଧାସଳଖ ପ୍ରଭାବ ଭାରତର ନୂତନ ODI ଓପନିଂ ଯୋଡ଼ି ଉପରେ ଦେଖିବାକୁ ମିଳିଥିଲା। ନାଗପୁରରେ ପ୍ରଥମ ୱିକେଟ ପାଇଁ ରୋହିତ ଏବଂ ଯଶସ୍ୱୀ ଜୟସ୍ୱାଲ ଦଳୀୟ ଖାତାରେ ମାତ୍ର ୧୯ ରନ ଯୋଡିଥିଲେ । ଏପରି ପରିସ୍ଥିତିରେ, କଟକରେ ପ୍ରଶ୍ନ ଉଠିବ ଯେ ଭାରତୀୟ ଦଳ ଓପେନିଂ ଯୋଡ଼ିରେ କୌଣସି ପରିବର୍ତ୍ତନ କରିବ କି ? କାରଣ ଏପର୍ୟ୍ୟନ୍ତ କେବଳ ଶୁଭମନ ଗିଲ ଏବଂ ରୋହିତ ଶର୍ମା ଦିନିକିଆରେ ଓପେନିଂ କରୁଥିଲେ । ଏହି ସିରିଜରେ କେଏଲ ରାହୁଲଙ୍କ ସହିତ ରିଷଭ ପନ୍ତଙ୍କୁ ମଧ୍ୟ ୱିକେଟକିପର ଭାବରେ ସାମିଲ କରିଛି ଟିମ୍ । ଦିନିକିଆରେ ରିଷଭଙ୍କ ଅପେକ୍ଷା ରାହୁଲଙ୍କୁ ଅଧିକ ପସନ୍ଦ କରାଯାଉଥିଲା । କିନ୍ତୁ ଜଣେ ବ୍ୟାଟର ଭାବରେ, ରାହୁଲ ନାଗପୁର ଦିନିକିଆରେ କେବଳ ୨ ରନ୍ ହିଁ କରିପାରିଥିଲେ । ଏପରି ପରିସ୍ଥିତିରେ ବାରବାଟୀ ଦିନିକିଆରେ ଏହି ସବୁ ଦିଗରେ ଧ୍ୟାନ ଦେଇ ମ୍ୟାଚ୍ ଖେଳିବା ଆବଶ୍ୟକତା ରହିଛି । ତଥାପି, କେଏଲ ରାହୁଲ ଜଣେ ୱିକେଟକିପର ଭାବରେ ଉତ୍କୃଷ୍ଟ ପ୍ରଦର୍ଶନ କରିଛନ୍ତି ।
