ଅବସରପ୍ରାପ୍ତ ଶିକ୍ଷକ କର୍ମଚାରୀ ସଂଘର ବୈଠକ
Rasmita Behera
ପୁରୀ : ପୁରୀ ଜିଲ୍ଲା ଅବସରପ୍ରାପ୍ତ ଶିକ୍ଷକ କର୍ମଚାରୀ ସଂଘର ଏକ ସାଧାରଣ ବୈଠକ ସଂଘର ସଭାପତି ପ୍ରଫେସର ଲକ୍ଷ୍ମୀଧର ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଏହି ବୈଠକରେ ପେନ୍ସନ୍ ଭୋଗୀ ଶିକ୍ଷକ କର୍ମଚାରୀମାନଙ୍କର ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରାଯାଇଥିଲା । ରାଜ୍ୟ ସରକାର ପେନ୍ସନ୍ ଭୋଗୀ ଶିକ୍ଷକ ଓ କର୍ମଚାରୀମାନଙ୍କ ପ୍ରତି ବୈମାତୃକ ମନୋଭାବ ପ୍ରଦର୍ଶନ କରୁଥିବାରୁ ବୈଠକରେ କ୍ଷୋଭ ପ୍ରକାଶ ପାଇଥିଲା । ସଂଗଠନର ପୁରାତନ ଦାବି ବର୍ଦ୍ଧିତ ପେନ୍ସନ୍ ୮୦ ବର୍ଷ ପରିବର୍ତ୍ତେ ୬୫ ବର୍ଷରୁ ଅନ୍ୟ ରାଜ୍ୟମାନେ ପ୍ରଦାନ କରୁଥିବା ସ୍ଥଳେ ରାଜ୍ୟ ସରକାର ଅଦ୍ୟାବଧି ପେନ୍ସନ୍ ପ୍ରଦାନ ନ କରିବା ଦୁର୍ଭାଗ୍ୟଜନକ ବୋଲି ବୈଠକରେ ସାଧାରଣ ସମ୍ପାଦକ ବିଶ୍ୱନାଥ ବେହେରା ପ୍ରକାଶ କରିଥିଲେ । ବୈଠକରେ ମୁଖ୍ୟଅତିଥି ଭାବେ ଜିଲ୍ଲା କୋଷାଗାର ଅଧିକାରୀ ମନ୍ମଥ୍ କୁମାର ପ୍ରଧାନ ଯୋଗ ଦେଇ ପେନ୍ସନ୍ ଜନିତ ସମସ୍ତ କାର୍ଯ୍ୟ ଅବସରପ୍ରାପ୍ତ ଶିକ୍ଷକ କର୍ମଚାରୀମାନଙ୍କର ଶୃଙ୍ଖଳିତ ଭାବେ କରାଯିବ ବୋଲି କହିଥିଲେ । ପୂର୍ବ ନିର୍ଦ୍ଧାରିତ ନିଷ୍ପତ୍ତିକ୍ରମେ ଅବସରପ୍ରାପ୍ତ ଶିକ୍ଷକ କର୍ମଚାରୀମାନେ ଚରମ ଅବହେଳା ଓ ଶୋଷଣର ଶିକାର ହେଉଥିବା ଦୃଷ୍ଟିରୁ ଜିଲ୍ଳା ଶିକ୍ଷାଧିକାରୀ ଦୀପକ କୁମାର ପାଢୀ ବୈଠକରେ ଆଲୋଚନା କରିଥିଲେ । କେତକୀପାଟଣା ନୋଡ଼ାଲ ହାଇସ୍କୁଲର ପ୍ରଧାନଶିକ୍ଷକ ବସନ୍ତ କୁମାର ମିଶ୍ର ପେନ୍ସନ୍ କାର୍ଯ୍ୟ ୭ଦିନ ଭିତରେ କରାଯିବ ଓ ଅନ୍ୟାନ୍ୟ ପେନ୍ସନ୍ କେସ୍ ସବୁ ୩ମାସ ମଧ୍ୟରେ ଶେଷ କରାଯିବ ବୋଲି ଶିକ୍ଷାଧିକାରୀ ପ୍ରତିଶ୍ରୁତି ଦେଇଥିଲେ । ଏହି ବୈଠକରେ ଅତିରିକ୍ତ ଶିକ୍ଷାଧିକାରୀ ମମତା ମିଶ୍ର, ସାଧାରଣ ସମ୍ପାଦକ ବିଶ୍ୱନାଥ ବେହେରା, ଅଧ୍ୟାପକ ସୁରେନ୍ଦ୍ର କୁମାର ଜେନା, ପ୍ୟାରିମୋହନ ପଟ୍ଟନାୟକ, ମନୋଜ କୁମାର ସାମନ୍ତରାୟ, ଆଶାଲତା ପ୍ରଧାନ, ବ୍ରହ୍ମାନନ୍ଦ ଦାସ, ରମେଶ ଚନ୍ଦ୍ର ବଳିୟାରସିଂ, ବସନ୍ତ କୁମାର ମିଶ୍ର, ଦାମୋଦର ପାଢୀ, ଚିତ୍ରସେନ ପ୍ରଧାନ, ଅଭିମନୁ୍ୟ ଜେନା, ଶରତ କୁମାର ସାମନ୍ତରାୟ ପ୍ରମୁଖ ଉପସ୍ଥିତ ଥିଲେ ।
