ଆକାଶରେ ବଢ଼ିବ ଭାରତର ଶକ୍ତି
Rasmita Behera
ନୂଆଦିଲ୍ଲୀ: ଆକାଶରେ ଭାରତର ଶକ୍ତି ବଢ଼ିବ । ଆମେରିକା ଓ ଚାଇନା ପରେ ଭାରତ ୫ମ ଜେନେରେସନ ଫାଇଟର ଜେଟ୍ କ୍ଳବରେ ସାମିଲ୍ ହେବ । ଏଥିପାଇଁ ୧୫ ହଜାର କୋଟିର ଯୋଜନାକୁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଅନୁମୋଦନ କରିଛନ୍ତି । ସମ୍ପ୍ରତି ଆମେରିକାର ଏଫ ୨୨ ଓ ଏଫ ୩୫ ଏବଂ ଚାଇନାର ଜେ-୨୦ ଓ ଜେ-୩୫ ହିଁ ପଞ୍ଚମ ଜେନେରେସନର ଫାଇଟର ଜେଟର ମାନ୍ୟତା ପାଇଛି । ଇତିମଧ୍ୟରେ ଚାଇନା ଷଷ୍ଠ ଜେନେରେସନର ଫାଇଟର ଜେଟର ବିକଶିତ କରିସାରିଛି । ଭାରତର ଏହି ଏଏମସିଏ ସ୍ୱଦେଶୀ ଜ୍ଞାନକୌଶଳରେ ନିର୍ମାଣ କରାଯିବ । ପ୍ରତିରକ୍ଷା କ୍ଷେତ୍ରରେ ଆତ୍ମନିର୍ଭର ଭାରତର ଏହା ଏକ ମାଇଲଖୁଣ୍ଟ ହେବବୋଲି ରାଜନାଥ କହିଛନ୍ତି ।
ଏହି ଯୋଜନା ପାଇଁ ୧୫ ହଜାର କୋଟି ଟଙ୍କା ଖର୍ଚ୍ଚ ହେବ । ଏରୋନଟିକାଲ ଡେଭଲପମେଣ୍ଟ ଏଜେନ୍ସୀ ସହାୟତାରେ ଏହା କାର୍ଯ୍ୟକାରୀ କରାଯିବ । ଏଥିପାଇଁ ଅନ୍ୟ ଭାରତୀୟ କମ୍ପାନୀମାନେ ମଧ୍ୟ ବିଡ୍ ଦାଖଲ କରିପାରିବେ । ଏଥିପାଇଁ ଟେଣ୍ଡର ବି ଆହ୍ୱାନ କରାଯାଇଛି । ଗତବର୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଅନୁଷ୍ଠିତ ସୁରକ୍ଷା ସଂକ୍ରାନ୍ତୀୟ କ୍ୟାବିନେଟ୍ ବୈଠକରେ ଏହି ଫାଇଟର ଜେଟ୍ କାର୍ଯ୍ୟକ୍ରମକୁ ଅନୁମୋଦନ ମିଳିଥିଲା । ୨୦୩୪ ବେଳକୁ ଏହାର ଉତ୍ପାଦନ ଆରମ୍ଭ ହେବବୋଲି ଲକ୍ଷ୍ୟ ରଖାଯାଇଛି ।
