ଇତିହାସ ରଚିଲେ ଭାରତୀୟ ବଂଶୋଭବ
Henamanjaree Swain
- ନ୍ୟୁୟର୍କର ସର୍ବକନିଷ୍ଠ ମେୟର ଜୋହରାନ ମାମଦାନି
- ଅଫତାବ ପୁରେଭାଲ ଓ ଗଜାଲା ଫିରଦୋସ୍ ହାଶମି ବି ବିଜୟୀ
ନୂଆଦିଲ୍ଲୀ : ଆମେରିକାରେ ଇତିହାସ ରଚିଲେ ତିନି ଭାରତୀୟ ବଂଶୋଭବ ଜୋହରାନ ମାମଦାନି, ଅଫତାବ ପୁରେଭାଲ ଓ ଗଜାଲା ଫିରଦୋସ ହାଶମି । ମାମଦାନି ନ୍ୟୁୟର୍କ ସହରର ସବୁଠାରୁ କନିଷ୍ଠ ଓ ପ୍ରଥମ ମୁସଲିମ ମେୟର ଭାବରେ ନିର୍ବାଚିତ ହୋଇଛନ୍ତି । ଯାହା ସହରର ରାଜନୈତିକ ଇତିହାସରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ । ମାମଦାନି ହେଉଛନ୍ତି ଭାରତୀୟ-ଆମେରିକୀୟ ଚଳଚ୍ଚିତ୍ର ନିର୍ମାତା ମୀରା ନାୟାର ଓ ଉଗାଣ୍ଡା-ଆମେରିକୀୟ ଶିକ୍ଷାବିତ୍ ମହମୁଦ ମାମଦାନିଙ୍କ ପୁଅ । ତାଙ୍କର ବିଜୟକୁ ଯଥେଷ୍ଟ ଗୁରୁତ୍ୱ ଦିଆଯାଇଛି । ଏନେଇ ମାଆ ମୀରା ନାୟାର ସୋସିଆଲ ମିଡିଆରେ ପୁଅ ପାଇଁ ସେ ବହୁତ ଗର୍ବିତ ଏବଂ ତାର ଏହି ବିଜୟରେ ଆନନ୍ଦ ପ୍ରକାଶ କରିଛନ୍ତି । ଫଳାଫଳ ଘୋଷଣା ହେବାର କିଛି ସମୟ ପରେ ମୀରା ନାୟାର ପ୍ରଥମେ ଚଳଚ୍ଚିତ୍ର ନିର୍ଦ୍ଦେଶକ ଜୋୟା ଅଖତରଙ୍କ ଦ୍ୱାରା ପୋଷ୍ଟ କରାଯାଇଥିବା ଏକ ବାର୍ତ୍ତା ସେୟାର କରିଥିଲେ ।
ଯେଉଁଥିରେ ତାଙ୍କର ନିଜସ୍ୱ ଶବ୍ଦ ଯୋଡିଥିଲେ । ଜୋହରାନ୍, ତୁମେ ସୁନ୍ଦର । ଏହି ଉତ୍ସବ ସହିତ ‘ଏମ୍ପାୟାର ଷ୍ଟେଟ୍ ଅଫ୍ ମାଇଣ୍ଡ' ଗୀତ ମଧ୍ୟ ଥିଲା, ଯାହା ସହର ସହିତ ପରିବାରର ସମ୍ପର୍କକୁ ପ୍ରତିଫଳିତ କରିଛି । ୩୪ ବର୍ଷୀୟ ଡେମୋକ୍ରାଟିକ୍-ସମାଜବାଦୀ ମାମଦାନି ପୂର୍ବତନ ନ୍ୟୁୟର୍କ ରାଜ୍ୟପାଳ ଆଣ୍ଡ୍ରୁ କୁମୋ ଏବଂ ରିପବ୍ଲିକାନ୍ କର୍ଟିସ୍ ସ୍ଲିୱାଙ୍କ ବିପକ୍ଷରେ ମେୟର ନିର୍ବାଚନରେ ବିଜୟୀ ହୋଇଥିଲେ । ଆସୋସିଏଟେଡ୍ ପ୍ରେସ୍ ଅନୁଯାୟୀ, ୯୧ ପ୍ରତିଶତରୁ ଅଧିକ ଭୋଟ ଗଣନା ପରେ ମାମଦାନି ୧,୦୩୫,୬୪୬ ଭୋଟ ପାଇଥିଲେ । ଯାହା ୫୦ ପ୍ରତିଶତ ଭୋଟକୁ ପ୍ରତିନିଧିତ୍ୱ କରେ । ପ୍ରବାସୀମାନଙ୍କ ପାଇଁ ଏକ ଗନ୍ତବ୍ୟସ୍ଥଳ ଭାବରେ ସହରର ଐତିହାସିକ ଭୂମିକା ଉପରେ ଗୁରୁତ୍ୱାରୋପ କରି ମାମଦାନି କହିଛନ୍ତି, ନ୍ୟୁୟର୍କ ପ୍ରବାସୀମାନଙ୍କର ଏକ ସହର ହୋଇ ରହିବ, ପ୍ରବାସୀମାନଙ୍କ ଦ୍ୱାରା ଏହା ନିର୍ମିତ, ପ୍ରବାସୀମାନଙ୍କ ଦ୍ୱାରା ପରିଚାଳିତ ଏବଂ ଆଜି ରାତି ସୁଦ୍ଧା ଜଣେ ପ୍ରବାସୀଙ୍କ ନେତୃତ୍ୱରେ ଏହା ରହିବ । ତାଙ୍କ ଶବ୍ଦଗୁଡ଼ିକ ତାଙ୍କର ବ୍ୟକ୍ତିଗତ ପୃଷ୍ଠଭୂମି ଓ ନ୍ୟୁୟର୍କ ସହରର ଜନସଂଖ୍ୟାର ବିବିଧ ଗଠନ ଉଭୟକୁ ଉଜ୍ଜ୍ୱଳ କରିଥିଲା । ସେ ଆସନ୍ତା ଜାନୁଆରି ୧ ତାରିଖରେ କାର୍ଯ୍ୟଭାର ଗ୍ରହଣ କରିବେ ବୋଲି ଜଣାପଡିଛି ।
ସେହିପରି ଭର୍ଜିନିଆରେ ୬୧ ବର୍ଷୀୟ ହାଶମୀ ଲେଫ୍ଟନାଣ୍ଟ ଗଭର୍ଣ୍ଣର ଭାବରେ ବିଜୟୀ ହୋଇଛନ୍ତି । ସେ କମନୱେଲଥରେ ରାଜ୍ୟସ୍ତରୀୟ ପଦବୀ ଗ୍ରହଣ କରିଥିବା ପ୍ରଥମ ଭାରତୀୟ-ଆମେରିକୀୟ ଏବଂ ପ୍ରଥମ ମୁସଲମାନ । ସେ ରିଚମଣ୍ଡ ପ୍ରସାରକ ରିପବ୍ଲିକାନ୍ ଜନ୍ ରିଡଙ୍କୁ ପରାସ୍ତ କରିଛନ୍ତି । ସିନସିନାଟି ମେୟର ପୁରେଭାଲ୍ ଟ୍ରମ୍ପଙ୍କ ରିପବ୍ଲିକାନ୍ ପ୍ରତିଦ୍ୱନ୍ଦ୍ୱୀ କୋରି ବୋମ୍ୟାନଙ୍କୁ ପରାସ୍ତ କରି ଦ୍ୱିତୀୟ କାର୍ଯ୍ୟକାଳ ସୁରକ୍ଷିତ କରିଛନ୍ତି, ଯିଏକି ଆମେରିକାର ଉପରାଷ୍ଟ୍ରପତି ଜେଡି ଭାନ୍ସଙ୍କ ସାବତ ଭାଇ । ହାଶମୀ ୧୯୬୪ରେ ଭାରତର ହାଇଦ୍ରାବାଦରେ ଜନ୍ମ ଗ୍ରହଣ କରିଥିଲେ । ସେ ୪ ବର୍ଷର ହୋଇଥିବା ବେଳେ ପରିବାର ସହିତ ଆମେରିକା ଚାଲି ଯାଇଥିଲେ। ସେହିପରି ପୁରେଭାଲଙ୍କ ଜନ୍ମ ଓହିଓରେ ଜଣେ ପଞ୍ଜାବୀ ପିତା ଓ ଜଣେ ତିବ୍ଦତୀୟ ଶରଣାର୍ଥୀ ମାଆଙ୍କ କୋଳରୁ ହୋଇଥିଲା ।
