ଏଫସିଆଇ ନନେଲେ ଚାଉଳ ନିଲାମ ହେବ

ଭୁବନେଶ୍ୱର : ଏଫସିଆଇ ଚାଉଳ ଉଠାଉନି  । ଫଳରେ ମିଲରଙ୍କ ପାଖରେ ଚାଉଳ ପଡ଼ି ରହିଛି  । ଏନେଇ ବିଜେଡ଼ି ବିଧାୟକମାନେ ଉଦବେଗ ପ୍ରକାଶ କରିଛନ୍ତି  । ଅପରପକ୍ଷରେ ଏଫସିଆଇ ପାଖରେ ପ୍ରାୟ ୮ ହଜାର କୋଟି ଟଙ୍କା ପଡ଼ି ରହିଥିବାବେଳେ ସେହି ଟଙ୍କା ପାଇବା ପାଇଁ ସରକାର ଉଦ୍ୟମ କରୁଛନ୍ତି  । ସେହିପରି ଏଫସିଆଇ ଯଦି ଚାଉଳ ନଉଠାଏ ତେବେ ସରକାର ତାହାକୁ ନିଲାମ କରି ବିକ୍ରି କରିବାକୁ ଯୋଜନା କରିଛନ୍ତି  । ଖାଦ୍ୟଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ବିଧାନସଭାରେ ଏହି ସୂଚନା ଦେଇଛନ୍ତି  ।
ମନ୍ତ୍ରୀ ଶ୍ରୀ ପାତ୍ର କହିଛନ୍ତିଯେ, ଉଭୟ ଖରିଫ ଓ ରବିରେ ୯୨ ଲକ୍ଷ ମେଟ୍ରିକ ଟନ ଧାନ ସଂଗ୍ରହ ହୋଇଥିବାବେଳେ ୬୩ ଲକ୍ଷ ମେଟ୍ରିକ ଟନ୍ ଚାଉଳ ମିଳିଛି  । ତେବେ ରାଜ୍ୟର ପିଡ଼ିଏସ ଓ ଏଫସିଆଇ ଉଠାଣରେ ୫୦ ଲକ୍ଷ ମେଟ୍ରିକ୍ ଟନ୍ ଚାଉଳ ବ୍ୟବହାର ହୋଇଛି  । ତଥାପିବି ୧୩ ଲକ୍ଷ ମେଟ୍ରିକ୍ ଟନ୍ ଚାଉଳ ଉଠାଣ ହୋଇପାରିନି  । ରାଜ୍ୟ ସରକାର ଆଗାମୀ ଦିନରେ ଏହି ସମସ୍ୟାର ସମ୍ମୁଖୀନ ନହେବା ପାଇଁ ବଡ଼ ଗୋଦାମ ନିର୍ମାଣ କରୁଛନ୍ତି  । ରାଜ୍ୟ ସରକାରଙ୍କ ପକ୍ଷରୁ ଏଫସିଆଇକୁ ବାରମ୍ବାର ଚାଉଳ ଉଠାଣ ପାଇଁ ଅନୁରୋଧ କରାଯାଉଛି । ଯଦି ଚାଉଳ ଉଠାଣ ନହୁଏ ତେବେ ନିଲାମରେ ଚାଉଳ ବିକ୍ରି କରାଯିବ  । ଅପରପକ୍ଷରେ ୧୧ ଜିଲ୍ଲାରେ ୩ ମାସ ପାଇଁ ଅତିରିକ୍ତ ଚାଉଳ ବି ପ୍ରଦାନ କରାଯାଇଛି ବୋଲି ସେ କହିଥିଲେ  । ଏହି ଆଲୋଚନାରେ ଭାଗ ନେଇ ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ ସରକାରଙ୍କୁ ପ୍ରଶ୍ନ କରିଥିଲେ  ।
ଅନ୍ୟ ଏକ ପ୍ରଶ୍ନର ଆଲୋଚନା କାଳରେ ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂହଦେଓ କହିଲେଯେ, ରାଜ୍ୟ ସରକାର ଶୀତଳ ଭଣ୍ଡାର କରିବେ ନାହିଁ  । ତେବେ ବେସରକାରୀସ୍ତରରେ ଶୀତଳ ଭଣ୍ଡାର ପାଇଁ ସରକାର ପ୍ରୋତ୍ସାହନ କରୁଛନ୍ତି  । ଏଯାଏଁ ୧୨ ଉପଖଣ୍ଡରେ ଶୀତଳ ଭଣ୍ଡାର ସ୍ଥାପନ ଓ ଗୋଟିଏ ଶୀତଳ ଭଣ୍ଡାରର ପୁନରୁଦ୍ଧାର ପାଇଁ ସରକାର ପ୍ରକ୍ରିୟା ଆରମ୍ଭ କରିଛନ୍ତି  । ପ୍ରତି ସବଡିଭିଜନରେ ଗୋଟିଏ ଶୀତଳ ଭଣ୍ଡାର ସ୍ଥାପନ ପାଇଁ ସରକାର ଲକ୍ଷ୍ୟ ରଖିଛନ୍ତି  । ଏହାଛଡ଼ା ସରକାର ସୋଲାର ଓ ଇଲେକ୍ଟି୍ର କୋଲଡ଼ ରୁମ୍ ପ୍ରତିଷ୍ଠା ପାଇଁ ବି ପଦକ୍ଷେପ ନେଇଛନ୍ତି ବୋଲି ଉପମୁଖ୍ୟମନ୍ତ୍ରୀ ଶ୍ରୀ ସିଂହଦେଓ କହିଛନ୍ତି  । ଏହି ପ୍ରଶ୍ନୋତ୍ତର ଆଲୋଚନାରେ ରଣେନ୍ଦ୍ର ପ୍ରତାପ ସ୍ୱାଇଁ, ଦୁଷ୍ମନ୍ତ ସ୍ୱାଇଁ, ସନାତନ ବିଜୁଳି ପ୍ରମୁଖ ଅଂଶଗ୍ରହଣ କରିଥିଲେ  ।