କୁଆଁର ପୁନେଇ ଜହ୍ନ ଗୋ....
Henamanjaree Swain
ଆଜି କୁମାର ପୂର୍ଣ୍ଣିମା । କୁମାରୀ କନ୍ୟାମାନେ ସୂର୍ଯ୍ୟ ଉଦୟ ପୂର୍ବରୁ ସ୍ନାନ କରି ନୂଆ ପୋଷାକ ପରିଧାନ କରି ମା’ ବୃନ୍ଦାବତୀଙ୍କ ନିକଟରେ ଗୁଆ, ଲିଆ, କଷି ଜହ୍ନି ଦେଇ ଆଞ୍ଜୁଳି ଟେକିଥାନ୍ତି । ଏହିଦିନ ମା’ଲକ୍ଷ୍ମୀଙ୍କର ଆରାଧନା କରାଯାଉଥିବାରୁ ଏହାକୁ ଗଜଲକ୍ଷ୍ମୀ ପୂଜା ମଧ୍ୟ କୁହାଯାଏ। କୁମାର ପୂର୍ଣ୍ଣିମା ଦିନକୁ ଲକ୍ଷ୍ମୀଙ୍କର ଜନ୍ମଦିନ ରୂପେ ପାଳନ କରାଯାଏ। ସର୍ବଗୁଣସମ୍ପନ୍ନ ଜୀବନସାଥୀ ପାଇବା ପାଇଁ କୁମାରୀମାନେ କାର୍ତ୍ତିକେୟଙ୍କୁ ଆରାଧନା କରିବା ସହ ଚନ୍ଦ୍ରପୂଜା କରନ୍ତି । ଏହି ପୂଜାରେ ଜହ୍ନ ଆସିବା ପରେ ତାକୁ ଦେଖି ଚାନ୍ଦ ପୂଜା ହୁଏ । ଏପରି କଲେ ଚାନ୍ଦ ପରି ବର ମିଳେ ବୋଲି ବିଶ୍ୱାସ ରହିଛି ।
କୁମାରୀମାନେ ପ୍ରାତଃରୁ ଉଠି ସ୍ନାନସାରି ନୂତନ ବସ୍ତ୍ର ପରିଧାନ କରିଥାନ୍ତି। ବୃନ୍ଦାବତୀଙ୍କ ପାଖରେ ଆଞ୍ଜୁଳାରେ ସାତ ପ୍ରକାରର ଫଳ ନେଇ ସୂର୍ଯ୍ୟଙ୍କ ଉଦ୍ଦେଶ୍ୟରେ ଆଞ୍ଜୁଳି ଟେକିଥାନ୍ତି । ସନ୍ଧ୍ୟାରେ କୁମାରୀମାନେ ଚଉରା ମୂଳେ ଏକତ୍ର ହୋଇ ଚାନ୍ଦ ପୂଜା କରନ୍ତି। ତୁଳସୀ ଗଛରେ ନାଲି ଶଙ୍ଖା ଓ ସାଲୁ କନା ସହ ନୂଆ ବସ୍ତ୍ର ଦିଆଯାଇଥାଏ। ଚଉରା ଆଗରେ ପିଢ଼ାରେ ଗୁଆ, ଦୁବ ଘାସ, ଫୁଲ, ବରକୋଳି ପତ୍ର ଦେଇ ସଜାଯାଇଥାଏ । ଭୋଗ ପାଇଁ ଖଇ, ନଡ଼ିଆ, କଦଳୀ, ଛେନା, ଦହି, କ୍ଷୀର, କାକୁଡ଼ି, ତାଳସଜ, ମହୁ, ଅଦା, ଘିଅ, ଆଖୁ, ଗଜା ମୁଗ, ସେଓ, ଚିନି ଇତ୍ୟାଦି ପଡ଼ି ଏକ ଚକଟା ପ୍ରସ୍ତୁତ କରାଯାଇଥାଏ । ଯାହାକୁ ଚାନ୍ଦ ଚକଟା କୁହାଯାଏ ।
