ଚଇତି ମଙ୍ଗଳବାର ଓଷା ଆରମ୍ଭ : ରାସ୍ତାରେ କୋଠି କରି ପୂଜାର୍ଚ୍ଚନା
Rasmita Behera
ପୁରୀ: ଚୈତ୍ରମାସର ପ୍ରଥମ ମଙ୍ଗଳବାରରୁ ଆରମ୍ଭ ହୋଇଛି ମା’ମଙ୍ଗଳାଙ୍କ ସ୍ୱତନ୍ତ୍ର ଆରାଧନା । ବିଭିନ୍ନ ଦେବୀ ପୀଠରେ ଝାମୁଯାତ୍ରାର ମଧ୍ୟ ଶୁଭାରମ୍ଭ ହୋଇଛି । ମହିଳାମାନେ ଆଦ୍ୟ ମଙ୍ଗଳବାରରେ ଭକ୍ତିଭାବନା ସହକାରେ ମା’ ମଙ୍ଗଳାଙ୍କ ସ୍ୱତନ୍ତ୍ର ପୂଜାର୍ଚ୍ଚନା କରିଥିଲେ । ଓଷା କରିଥିବା ମହିଳାମାନେ ରାସ୍ତାକୁ ବନମାଟି ଓ ଗେରୁରେ ଲିପାପୋଛା କରି କୋଠି ନିର୍ମାଣ କରିଥିଲେ । ବିଭିନ୍ନ ରଙ୍ଗର ମୁରୁଜରେ କୋଠିକୁ ଚିତି୍ରତ କରାଯିବା ସହ ଦେବୀଙ୍କ ପ୍ରିୟ ପୁଷ୍ପ ମନ୍ଦାର ଓ ଅନ୍ୟାନ୍ୟ ଫୁଲରେ ସଜ୍ଜିତ କରାଯାଇଥିଲା । କୋଠିକୁ ମା’ ମଙ୍ଗଳାଙ୍କ ପ୍ରତିରୂପ କଳ୍ପନା କରାଯାଇ ଧୂପ, ଦୀପ ଓ ନୈବେଦ୍ୟ ଅର୍ପଣ କରାଯାଇଥିଲା । ମଙ୍ଗଳବାର ଓଷା କରିଥିବା ମହିଳାମାନେ କୋଠି ନିକଟରେ ଦୀପ, ଧୂପ ଦେବା ସହ ଭୋଗ ବାଢିଥିଲେ । ଝୁଣା ଧୂପର ମହକ ପୂଜାସ୍ଥଳରେ ସୃଷ୍ଟି କରିଥିଲା ଦିବ୍ୟ ପରିବେଶ । କୋଠିରେ ପଣା ଢାଳି ମହିଳାମାନେ ମଙ୍ଗଳାଙ୍କ ସ୍ତବ ଓ ସ୍ତୁତି ଗାନ କରିଥିଲେ । ଦେବୀଙ୍କୁ ଦୁବ, ବରକୋଳି ପତ୍ର ଓ ଅକ୍ଷତରେ ବନ୍ଦାପନା କରି ମହିଳାମାନେ ସନ୍ତାନ ସନ୍ତତି ତଥା ପରିବାର ପରିଜନଙ୍କ ମଙ୍ଗଳ କାମନା କରିଥିଲେ ।ହୁଳହୁଳି ଧ୍ୱନିରେ ମୁଖରିତ ହୋଇଉଠିଥିଲା ପୂଜାସ୍ଥଳ । ପୂଜା ପରେ ମହିଳାମାନେ ପଣା ପ୍ରସାଦ ସେବନ କରିବା ସହ ସାହି ପଡ଼ିଶା ଲୋକଙ୍କୁ ପଣା ବଣ୍ଟନ କରିଥିଲେ । ଚୈତ୍ରମାସର ପ୍ରଥମ ମଙ୍ଗଳବାରରେ ବ୍ରତଚାରିଣୀମାନେ ବିଭିନ୍ନ ମନ୍ଦିରକୁ ଯାଇ ଦେବୀ ଦର୍ଶନ ଓ ଆରାଧନା କରିଥିଲେ । ସହରାରେ ଥିବା ଠାକୁରାଣୀ ମନ୍ଦିର ମାନଙ୍କରେ ଭକ୍ତଙ୍କ ସମାଗମ ବୃଦ୍ଧି ପାଇଥିଲା । ଅନେକ ଭକ୍ତ ଶ୍ରୀମନ୍ଦିର ବେଢା ସ୍ଥିତ ବଟମଙ୍ଗଳା, ବିମଳା, ଭୁବନେଶ୍ୱରୀ, ଶୀତଳା, ବେଢାକାଳୀ ଓ ମହାଲକ୍ଷ୍ମୀଙ୍କୁ ଦର୍ଶନ କରିଥିଲେ । ସହରର ପ୍ରମୁଖ ଶକ୍ତିପୀଠ ଦକ୍ଷିଣକାଳୀ, ଗଛକାଳୀ, ଶ୍ୟାମାକାଳୀ, ରାମଚଣ୍ଡୀ, ବୁଢିମା’, ଝାଡ଼େଶ୍ୱରୀ ଓ ମରିଚି ଠାକୁରାଣୀ ଆଦି ମନ୍ଦିରରେ ସ୍ୱତନ୍ତ୍ର ପୂଜାର୍ଚ୍ଚନା ଓ ପଣା ଭୋଗ କରାଯାଇଥିଲା ।
