ଟପ୍ କମାଣ୍ଡର ସୁଧିର ନିହତ : ଯବାନଙ୍କ ହାତରେ ୫ ମାଓବାଦୀ ନିପାତ
Rasmita Behera
ମାଲକାନଗିରି: ଛତିଶଗଡର ଦାନ୍ତେୱାଡା ଠାରେ ଯବାନ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ଘଟି ୫ ମାଓବାଦୀ ନିହତ ହୋଇଥିବା ସୂଚନା ମିଳିଛି । ସେମାନଙ୍କ ମଧ୍ୟରେ ରହିଛି ଟପ୍ କମାଣ୍ଡର ସୁଧିର । ତା’ ମୁଣ୍ଡ ଉପରେ ୨୫ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା ହୋଇଥିଲା ।
ସୂଚନା ଅନୁସାରେ ଛତିଶଗଡର ଦାନ୍ତେୱାଡାର ଭୈରମଗଡ଼ ମାଓ କମିଟିର କିଛି ମାଓବାଦୀ ଗିଦମ ଥାନା ଅଞ୍ଚଳର ଗିରସାପାରା ଜଙ୍ଗଲରେ ଥିବା ନେଇ ସୂଚନା ମିଳିଥିଲା । ଏନେଇ ଜିଲ୍ଲା ପୁଲିସ, ଡିଆରଜି, ଏସଟିଏଫ ପକ୍ଷରୁ ମିଳିତ ରୂପେ ୫୦୦ରୁ ଊର୍ଦ୍ଧ୍ୱ ଯବାନଙ୍କୁ ନେଇ ଏକ ବଡ଼ ମାଓ ଦମନ ଅପରେସନ ଆରମ୍ଭ କରାଯାଇଥିଲା । ଅପରେସନ୍ ସମୟରେ ଯବାନଙ୍କୁ ଦେଖି ମାଓବାଦୀମାନେ ଗୁଳି ଚଳାଇଥିଲେ । ଯାହାର ପାଲଟା ଜବାବରେ ସମ୍ପୂର୍ଣ ଅଞ୍ଚଳକୁ ଘେରାବନ୍ଦୀ କରି ଯବାନମାନେ ମଧ୍ୟ ଆକ୍ରମଣ କରିଥିଲେ । କିଛି ଘଣ୍ଟା ଧରି ନିରନ୍ତର ଗୁଳି ଚାଳନା ପରେ ମାଓବାଦୀମାନେ ସେଠାରୁ ଘଞ୍ଚ ଜଙ୍ଗଲ ମଧ୍ୟରେ ଲୁଚି ପଳାଇଥିବା ବେଳେ ଯବାନମାନେ ଅଞ୍ଚଳରେ କମ୍ବିଂ ଅପରେସନ୍ ଆରମ୍ଭ କରିଥିଲେ । ଘଟଣା ସ୍ଥଳରୁ ଯାଞ୍ଚ ବେଳେ ୩ ଜଣ ପୁରୁଷ ମାଓବାଦୀଙ୍କ ମୃତଦେହ ଉଦ୍ଧାର କରାଯାଇଥିବା ବେଳେ କୁଖ୍ୟାତ ୨୫ ଲକ୍ଷ ଇନାମୀ ମାଓବାଦୀ ସୁଧୀର ଓରଫ ସୁଧାକରର ମରଶରୀର ମଧ୍ୟ ଜବତ କରାଯାଇଛି । ଘଟଣାସ୍ଥଳରୁ ଗୋଟିଏ ଇନ୍ସାସ ରାଇଫଲ୍ ସମେତ ଅନ୍ୟ ଅସ୍ତ୍ର ଏବଂ ଅନେକ ନକ୍ସଲ ସାମଗ୍ରୀ ମଧ୍ୟ ଜବତ କରାଯାଇଛି । ତେବେ ଘଟଣା ସ୍ଥଳରେ ପ୍ରାୟ ୫ ଜଣ ମାଓବାଦୀ ନିହତ ହୋଇଥିବା ନେଇ ସୂଚନା ମିଳିଛି । ପୁଲିସ ପକ୍ଷରୁ ତଲାସି ଅଭିଯାନ ଜୋରଦାର କରାଯାଇଛି । ଆଉ ଅଧିକ ମାଓବାଦୀଙ୍କ ମର ଶରୀର ଜବତ ହେବାର ଅନୁମାନ କରାଯାଉଛି ।
