ଥଣ୍ଡା, ଜ୍ଵର,କାଶ ଆଦି ସମସ୍ୟା ରୁ ମୁକ୍ତି ପାଇବାର ଆୟର୍ବେଦିକ ଉପାୟ
Henamanjaree Swain
ପରିବର୍ତ୍ତନର ଚକ୍ରରେ ଋତୁ ପରିବର୍ତ୍ତନ ହୋଇ ଶୀତ ଋତୁ ଆଗମନ କଲାଣି । ଶୀତ ପଡିବା ପରେ ଅଧିକାଂଶ ଲୋକ ଥଣ୍ଡା, ଜ୍ୱର ଓ କାଶରେ ଆକ୍ରାନ୍ତ ହୋଇଥାନ୍ତି। ବିଶେଷ କରି ଛୋଟ ପିଲା ଅଧିକ ମାତ୍ରାରେ ଆକ୍ରାନ୍ତ ହୋଇଥାନ୍ତି। ସେହିପରି ଶୀତ ଦିନରେ ଆଣ୍ଠୁଗଣ୍ଠି ରୋଗରେ ପୀଡିତ ଥିବା ଲୋକଙ୍କ ଯନ୍ତ୍ରଣା ଅତ୍ୟଧିକ ବଢ଼ି ଯାଇଥାଏ । ତେବେ ଏସବୁ ରୋଗର ଘରୋଇ ଉପଚାର ମଧ୍ୟ କରାଯାଇ ପାରିବ ।
ଶୀତ ଦିନରେ ଥଣ୍ଡା ବଢ଼ିବା ସହ ବଢ଼ିବାରେ ଲାଗିଛି, ଜ୍ୱର ଓ ଥଣ୍ଡା ରୋଗୀଙ୍କ ସଂଖ୍ୟା । ଏଥିରୁ ମୁକ୍ତି ପାଇଁ ରୋଗୀ ଏଲୋପାଥିକ୍ ଔଷଧ ଓ ଶିରପ ଆଣି ଖାଉଛନ୍ତି । ହେଲେ, ଆମ ପାଖରେ ଥିବା ତୁଳସୀ ପତ୍ର,ଗଙ୍ଗଶିଉଳି ପତ୍ର, ଅଁଳା, ଘିକୁଆଁରୀ, ତେଜପତ୍ର,ଅଦା ଭଳି ଔଷଧିୟ ଗଛକୁ ଆମେ ଅଣଦେଖା କରିଦେଉ । କିନ୍ତୁ ଏସବୁର ବ୍ୟବହାର ଦ୍ୱାରା ଥଣ୍ଡା, ଜ୍ୱର, କାଶ ଭଳି ରୋଗରୁ ଅନେକ ମାତ୍ରାରେ ଉପଶମ ମିଳିଥାଏ । ତୁଳସୀ ପତ୍ରର ରସ ବ୍ୟବହାର କରିବା ଦ୍ୱାରା, ରୋଗୀର ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଇଥାଏ । ଯାହା ଫଳରେ ଥଣ୍ଡା, ଜ୍ୱର, କାଶ ନିୟନ୍ତ୍ରଣରେ ରହିଥାଏ ।କେବଳ ଥଣ୍ଡା ଜ୍ୱର ନୁହେଁ, ଶୀତ ଦିନରେ ଆଂଠୁ ଗଣ୍ଠି ସମସ୍ୟା ମଧ୍ୟ ବଢ଼ି ଯାଇଥାଏ । ଯେଉଁମାନଙ୍କର ଆଂଠୁ ଗଣ୍ଠି ସମସ୍ୟା ରହିଛି, ଶୀତଦିନରେ ସେମାନେ ଅଧିକ ଯନ୍ତ୍ରଣା ଭୋଗିଥାନ୍ତି । ତେବେ ଆୟୁର୍ବେଦରେ ଏହାର ଉପଚାର ରହିଛି । ଆୟୁର୍ବେଦ ପଦ୍ଧତିରେ ବିଭିନ୍ନ ଚେରମୂଳରୁ ପ୍ରସ୍ତୁତ, ଔଷଧ ଓ ତେଲ ବ୍ୟବହାର ଦ୍ୱାରା ଆଠୁ ଗଣ୍ଠି ସମସ୍ୟାରୁ ମଧ୍ୟ ମୁକ୍ତି ମିଳିଥାଏ ବୋଲି କହିଛନ୍ତି ଆୟୁର୍ବେଦ ବିଶେଷଜ୍ଞ ।ଏଥିସହ ଶୀତ ଦିନ ଆସିଲେ ଲୋକମାନେ ବିଭିନ୍ନ ପ୍ରକାର ଚର୍ମ ରୋଗରେ ପୀଡିତ ହୋଇଥାନ୍ତି,ଘିକୁଆଁରୀର ବ୍ୟବହାର ଦ୍ୱାରା ଯାହା ଦୁର ହୋଇଥାଏ ।
