ନନ୍ଦନକାନନରେ ଧଳାବାଘ ଛୁଆ ମୃତ
Rasmita Behera
ବାରଙ୍ଗ: ନନ୍ଦନକାନନ ପ୍ରାଣୀଉଦ୍ୟାନରେ ଧଳା ବାଘୁଣୀ ମୌସୁମୀ ଓ ସାଧାରଣ ରଙ୍ଗର ବାଘ ରାଜେଶର ଔରସରୁ ଜନ୍ମିତ ଧଳା ପୁରୁଷ ବାଘ ଛୁଆର ମୃତୁ୍ୟ ହୋଇଛି । ଜୁନରେ ଜନ୍ମିତ ଏହି ବାଘଛୁଆଟି ଜନ୍ମ ହେବା ଦିନଠାରୁ ଚିକିତ୍ସିତ ହେଉଥିଲା ।
ମିଳିଥିବା ସୂଚନା ଅନୁଯାୟୀ, ୨୦୨୫ ଜୁନ୍ ୭ରେ ଧଳା ବାଘୁଣୀ ମୌସୁମୀ ଓ ସାଧାରଣ ରଙ୍ଗର ବାଘ ରାଜେଶର ଔରସରୁ ୨ଟି ଛୁଆ ଜନ୍ମ ହୋଇଥିଲେ । ତେବେ ପୁରୁଷ ବାଘ ଛୁଆଟି ଦୁର୍ବଳ ଥିବାବେଳେ ତା’ର ଓଜନ ମାତ୍ର ୬୫୦ ଗ୍ରାମ ରହିଥିଲା । ସେହିପରି ଏହାର ଆଗ ଅଙ୍ଗରେ କୁକୁରମାନଙ୍କ ଠାରେ ଦେଖିବାକୁ ମିଳୁଥିବା ସୁ୍ୟଇମର ପପି ସିଣ୍ଡ୍ରୋମ ପରି ବିକୃତି ରହିଥିଲା । ଜନ୍ମର ୪ ଦିନ ପରେ ଛୁଆଟି ଆଉ କ୍ଷୀରପାନ କରିନଥିଲା । ଫଳରେ ତାକୁ ପ୍ରାଣୀ ଶିଶୁପାଳନ କେନ୍ଦ୍ରକୁ ସ୍ଥାନାନ୍ତରିତ କରାଯାଇଥିଲା । ପରୀକ୍ଷାନୀରିକ୍ଷା ପରେ ନାଭିରେ ସଂକ୍ରମଣ ଓ ଶରୀରର ତାପମାତ୍ରା କମ୍ ଥିବା ଜଣାପଡ଼ିବାରୁ ତାକୁ ଏକ ଇନକୁ୍ୟବେଟରରେ ରଖାଯାଇଥିଲା । ସେଠାରେ ଅକ୍ସିଜେନ୍ ଓ ଇନଫ୍ରାରେଡ଼ ଥେରାପି ଦିଆଯାଇଥିଲା । ଅଙ୍ଗପ୍ରତ୍ୟଙ୍ଗକୁ ଶକ୍ତ କରିବା ପାଇଁ ଫିଜିଓଥେରାପିର ବି କରାଯାଉଥିଲା । ସପ୍ତାହେ କାଳ ଛୁଆଟି ଠିଆ ହୋଇନପାରିବାରୁ ମଳରେ ରକ୍ତ ପଡ଼ିବା ସହ କାନ ସଂକ୍ରମଣ ଓ ଶରୀରରେ କ୍ଷତ ଆରମ୍ଭ ହୋଇଯାଇଥିଲା । ଅପରପକ୍ଷରେ ମୌସୁମୀର ଅନ୍ୟ ମାଇ ବାଘ ଛୁଆଟି ଜନ୍ମରୁ ରୋଗୀଣା ଥିବାରୁ ତା’ର ଚିକିତ୍ସା ବି ଜାରିରହିଛି ।
