ପ୍ରଭାତ ମେମୋରିଆଲ୍ : ଟି-୨୦ ଯଦୁପୁର ଚାମ୍ପିଅନ୍
Rasmita Behera
ଭୁବନେଶ୍ୱର : ତମାଣ୍ଡୋ କ୍ରିକେଟ୍ କ୍ଲବ୍ ଆନୁକୂଲ୍ୟରେ ଚାଲିଥିବା ପ୍ରଭାତ ମେମୋରିଆଲ ଟି-୨୦ କ୍ରିକେଟ୍ ଟୁର୍ଣ୍ଣାମେଣ୍ଟ୍ର ଆଜିର ଫାଇନାଲ ମ୍ୟାଚ୍ରେ ଗଙ୍ଗପଡ଼ାକୁ ୪ ୱିକେଟ୍ରେ ପରାସ୍ତ କରି ଯଦୁପୁର ଚାମ୍ପିଅନ୍ ହୋଇଛି । ଟସ୍ ଜିତି ଗଙ୍ଗପଡ଼ା ପ୍ରଥମେ ବ୍ୟାଟିଂ କରିଥିଲା । ଦଳ ଶୁଭେନ୍ଦୁ ପ୍ରଧାନଙ୍କ ୨୭ ବଲ୍ରେ ୪୧ ରନ୍, ରୋଶନ କୁମାର ସେନାପତିଙ୍କ ୧୪ ବଲରେ ୩୨ ରନ୍ ଓ ମହେଶ୍ୱର ସେନାପତିଙ୍କ ୨୩ ବଲରେ ୩୫ ରନ୍ ବଳରେ ୨୦ ଓଭରରେ ୯ ୱିକେଟ୍ ହରାଇ ୧୯୧ ରନ୍ କରିଥିଲା । ଯଦୁପୁର ପକ୍ଷରୁ ସେକ୍ ସଲମନ ୩ଟି ଓ ବିକାଶ କୁମାର ରାଉତ ୨ଟି ୱିକେଟ୍ ନେଇଥିଲେ । ୧୯୨ ରନ୍ ବିଜୟଲକ୍ଷ୍ୟକୁ ଯଦୁପୁର ଦଳ ୧୭.୫ ଓଭରରେ ୬ ୱିକେଟ୍ ହରାଇ ହାସଲ କରି ନେଇଥିଲା । ଦଳ ପକ୍ଷରୁ ଜିତେନ୍ଦ୍ର କୁମାର ଦାସ ୩୪ ବଲ୍ରେ ୬୮ ରନ୍, ବିକାଶ କୁମାର ରାଉତ ୪୪ ବଲ୍ରେ ୫୫ ରନ୍ କରି ଦଳକୁ ବିଜୟୀ କରାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ । ଗଙ୍ଗପଡ଼ା ପକ୍ଷରୁ ଅନୀଲ ମହାପାତ୍ର ୨ଟି ୱିକେଟ୍ ନେଇଥିଲେ । ମ୍ୟାଚ୍ ପରିଚାଳନା କରିଥିଲେ ଅବିନାଶ ପଟ୍ଟନାୟକ ଏବଂ ଖଗେଶ୍ୱର ସୁବୁଦ୍ଧି । ବିଜୟୀ ଦଳର ବିକାଶ କୁମାର ରାଉତ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ ।ଖେଳ ଶେଷରେ ତମାଣ୍ଡୋ କ୍ରିକେଟ୍ କ୍ଲବର ସଭାପତି ଆଶିଷ କୁମାର ପଟ୍ଟନାୟକଙ୍କ ସଭାପତିତ୍ୱରେ ଅନୁଷ୍ଠିତ ପୁରସ୍କାର ବିତରଣୀ ଉସôବରେ ମୁଖ୍ୟ ଅତିଥିଭାବେ ଜଟଣୀର ପୂର୍ବତନ ବିଧାୟକ ସୁରେଶ କୁମାର ରାଉତରାୟ, ସମ୍ମାନିତ ଅତିଥିଭାବେ ସମାଜସେବୀ ବିରଜା ପ୍ରସାଦ ସାମନ୍ତରାୟ ଏବଂ ସମାଜସେବୀ ପ୍ରଭାତ କୁମାର ବେହେରା ଯୋଗଦେଇ ଚାମ୍ପିଅନ୍ ଦଳକୁ ପ୍ରଭାତ ମେମୋରିଆଲ୍ କପ୍ ସହ ୩୦ ହଜାର ଟଙ୍କା ଏବଂ ରନର୍ସଅପ୍ ଦଳକୁ ଟ୍ରଫି ସହ ୨୦ ହଜାର ଟଙ୍କା ପ୍ରଦାନ କରିଥିଲେ । ଶେଷରେ କ୍ଲବର ସଦସ୍ୟ କମଳାକାନ୍ତ ବେହେରା ଧନ୍ୟବାଦ ଅର୍ପଣ କରିଥିଲେ ।
