ମହିଳା ଓ ଦୁଇ ଝିଅଙ୍କୁ ଖଣ୍ଡାରେ ଆକ୍ରମଣ
Jitendra Sahu
୨ ଅଭିଯୁକ୍ତ ଗିରଫ; ପୂର୍ବରୁ ଗିରଫ ହୋଇଥିଲା ଜଣେ
ଭୁବନେଶ୍ୱର, ୨୮ା୧୦ : ଘରେ ଜୋର ଜବରଜସ୍ତ ପଶି ସ୍ୱାମୀ ସ୍ତ୍ରୀ ଓ ଦୁଇ ଝିଅଙ୍କୁ ଖଣ୍ଡା, ଲୁହାରଡ ଦ୍ୱାରା ମରଣାନ୍ତକ ଆକ୍ରମଣ କରିବା ସହ ଘରର ଆସବାବପତ୍ର ଭଙ୍ଗାରୁଜା କରି ଆଲମିରାରୁ ସୁନା ଅଳଙ୍କାର ଚୋରି ଘଟଣା । ପୂର୍ବରୁ ଜଣେ ଅଭିଯୁକ୍ତକୁ ଗିରଫ କରିଥିବା ବେଳେ, ଆଜି ବାକି ୨ ଫେରାର ଅଭିଯୁକ୍ତଙ୍କୁ ଗିରଫ କରିଛି ମଞ୍ଚେଶ୍ୱର ଥାନା ପୁଲିସ । ଗିରଫ ୨ ଅଭିଯୁକ୍ତ ହେଲେ, ମଞ୍ଚେଶ୍ୱର ବେହେରା ସାହିର ପୂର୍ଣ୍ଣଚନ୍ଦ୍ର ପ୍ରଧାନ ଓ ଝୁଲଣା ପ୍ରଧାନ । ଏମାନଙ୍କ ଠାରୁ ଏକ ଅଟୋ ଓ ୨ଟି ବାଇକ ଜବତ କରାଯାଇଛି । ଆଜି କୋର୍ଟ ଚାଲାଣ କରାଯାଇଛି ।
ସୂଚନା ଯୋଗ୍ୟଯେ, ଅଭିଯୋଗକାରୀ ଦିବାକର ପରିଡ଼ା ପରିବାର ସହ ମଞ୍ଚେଶ୍ୱର ଥାନା ଅନ୍ତର୍ଗତ ଇଞ୍ଜନ ବେହେରା ସାହିରେ ରୁହନ୍ତି । ସେ ଗତ ମାସ ୧୫ ତାରିଖ ସକାଳେ ପରିବାର ସଦସ୍ୟଙ୍କ ସହ ଘରେ ଉପସ୍ଥିତ ଥିବା ବେଳେ, ଦୁଇ ଅଭିଯୁକ୍ତ ଏବଂ ତାଙ୍କର ସହଯୋଗୀମାନେ ହଟାତ ଗେଟ୍ ଖୋଲି ବଳପୂର୍ବକ ଘର ଭିତରେ ପଶିଥିଲେ । ପରେ ଅଭିଯୁକ୍ତମାନେ ଅଭିଯୋଗକାରୀ, ତାଙ୍କ ପତ୍ନୀ ଓ ଦୁଇ ଝିଅଙ୍କୁ ଅଶ୍ରାବ୍ୟ ଭାଷାରେ ଗାଳିଗୁଲଜ କରିବା ସହ ଖଣ୍ଡା, ଲୁହା ଛଡ, ଲୁହା ପାଇପ ଏବଂ କାଠ ଫାଳିଆ ସାହାର୍ଯ୍ୟରେ ମରଣାନ୍ତକ ଆକ୍ରମଣ କରିଥିବା ବେଳେ, ଘରର ଗୃହଉପୋକରଣ ସାମଗ୍ରୀ ସବୁକୁ ବାଡେଇ ଭାଙ୍ଗି ଦେଇଥିଲେ ଏବଂ ଏକ ସୁନା ମଙ୍ଗଳସୁତ୍ର ଓ ଏକ ସୁନା ଚେନ୍ ଲୁଟି ନେଇଥିଲେ । ଏହି ଆକ୍ରମଣ ଫଳରେ ଅଭିଯୋଗକାରୀ ଏବଂ ତାଙ୍କ ପରିବାର ସଦସ୍ୟ ଗୁରୁତର ଆହତ ହୋଇ ହସ୍ପିଟାଲକୁ ସ୍ଥାନାନ୍ତର ହୋଇଥିଲେ । ଏନେଇ ମଞ୍ଚେଶ୍ୱର ଥାନାରେ ଅଭିଯୋଗ ହୋଇଥିବା ବେଳେ, ପୁଲିସ ମାମଲା ରୁଜୁକରି ତଦନ୍ତ ଚଳାଇ ଗତ ମାସ ୧୬ ତାରିଖ ଦିନ ଜଣେ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଥିଲା । ଏହି ସମୟରେ ବାକି ଅଭିଯୁକ୍ତ ମାନେ ଫେରାର ହୋଇଯାଇଥିଲେ । ସେବେଠାରୁ ପୁଲିସ ଅଭିଯୁକ୍ତଙ୍କୁ ଖୋଜୁଥିବା ବେଳେ, ଆଜି ବାକି ୨ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ।
