ସ୍ତ୍ରୀର ମୁଣ୍ଡକୁ ଇଟାରେ ଛେଚି ଆକ୍ରମଣ; ସ୍ୱାମୀ ଗିରଫ
Jitendra Sahu
5297
।। ପ୍ରଭାନ୍ୟୁଜ୍ ।। ଭୁବନେଶ୍ୱର, ୧୭ା୧୦ : ଘରେ ରୋଷେଇ କରିବା ସମୟରେ ସ୍ତ୍ରୀର ମୁଣ୍ଡକୁ ଏକ ଇଟାରେ ଛେଚି ହତ୍ୟା ଉଦ୍ୟମ । ଏନେଇ ଥାନାରେ ଅଭିଯୋଗ ପରେ ପୁଲିସ ମାମଲା ରୁଜୁକରି ଆଜି ଅଭିଯୁକ୍ତ ସ୍ୱାମୀକୁ ଗିରଫ କରିଛି । ଗିରଫ ଅଭିଯୁକ୍ତ ହେଲା, ଲିଙ୍ଗରାଜ ଥାନା ଅଧିନ ନାଗେଶ୍ୱର ଟାଙ୍ଗୀରେ ରହୁଥିବା ଅମୁଲ୍ୟ କୁମାର ସେଠୀ । ଆଜି ତାକୁ କୋର୍ଟ ଚାଲାଣ କରାଯାଇଛି ।
ସୂଚନା ଯୋଗ୍ୟଯେ, ଅଭିଯୋଗକାରିଣୀ ଓ ଅଭିଯୁକ୍ତ ପରସ୍ପର ସ୍ୱାମୀ ସ୍ତ୍ରୀ ଅଟନ୍ତି । ଗତ ମାସ ୧୬ ତାରିଖ ମଧ୍ୟାହ୍ନ ପ୍ରାୟ ୧.୩୦ ସମୟରେ ଅଭିଯୋଗକାରିଣୀ ଘରେ ରୋଷେଇ କରୁଥିବା ସମୟରେ ଅଭିଯୁକ୍ତ ସ୍ୱାମୀ ଏକ ଇଟା ସାହାର୍ଯ୍ୟରେ ତାଙ୍କ ମୁଣ୍ଡକୁ ଛେଚି ମରଣାନ୍ତକ ଆକ୍ରମଣ କରିଥିଲା । ଆକ୍ରମଣ ଫଳରେ ପୀଡ଼ିତାଙ୍କ ମୁଣ୍ଡଫାଟି ପ୍ରଚୁର ରକ୍ତସ୍ରାବ ହୋଇଥିଲା । ଏହି ସମୟରେ ପୀଡ଼ିତାଙ୍କ ଚିକ୍ରାର ଶୁଣି ପଡ଼ିଶା ଘରର ଲୋକ ଏବଂ ତାଙ୍କ ପୁଅ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଉଦ୍ଧାର କରି ନିକଟସ୍ତ ହସ୍ପିଟାଲକୁ ସ୍ଥାନାନ୍ତର କରିଥିଲେ । ପରେ ଏନେଇ ଅଭିଯୋଗକାରିଣୀ ଲିଙ୍ଗରାଜ ଥାନାରେ ଅଭିଯୋଗ କରିଥିଲେ । ଅଭିଯୋଗ ପରେ ପୁଲିସ ମାମଲା ରୁଜୁକରି ତଦନ୍ତ ଚଳାଇବା ସମୟରେ ଅଭିଯୁକ୍ତ ସେବେଠାରୁ ଫେରାର ହୋଇଯାଇଥିଲା । ସେବେଠାରୁ ପୁଲିସ ଅଭିଯୁକ୍ତକୁ ଖୋଜୁଥିବା ବେଳେ ଆଜି ତାକୁ କେନ୍ଦ୍ରପଡ଼ା ଜିଲ୍ଲାରୁ ଗିରଫ କରାଯାଇଛି ।
