ହିଂସାର ନିଅାଁରେ ଜଳୁଛି ନେପାଳ : ଖଲାନଙ୍କ ପତ୍ନୀଙ୍କୁ ଜୀଅନ୍ତା ଜାଳିଦେଲେ

କାଠମାଣ୍ଡୁ: ହିଂସାର ନିଅାଁରେ ଜଳୁଛି ନେପାଳ । ସ୍ଥିତି ହୋଇପଡିଛି ଅସମ୍ଭାଳ । ରାଷ୍ଟ୍ରପତି, ପ୍ରଧାନମନ୍ତ୍ରୀ, ମନ୍ତ୍ରୀ, ବିରୋଧୀ ଦଳର ନେତାଙ୍କ ଘର ଜାଳି ଦିଆଯାଇଛି । ବିକ୍ଷୋଭକାରୀମାନେ ରକ୍ତମୁଖା ହୋଇପଡିଛନ୍ତି । ପୂର୍ବତନ ପ୍ରଧାନମନ୍ତ୍ରୀ ଝଲାନାଥ ଖଲାନଙ୍କ ପତ୍ନୀ ରାଜଲକ୍ଷ୍ମୀ ଚିତ୍ରକରଙ୍କୁ ଜୀଅନ୍ତା ଜାଳି ଦେଇଛନ୍ତି ବିକ୍ଷୋଭ କାରୀ । ବିକ୍ଷୋଭକାରୀଙ୍କ ମାଡରେ ଦରାମରା ହୋଇପଡିଛନ୍ତି ଝଲାନାଥ । ଏହାସହ ବିଦେଶ ମନ୍ତ୍ରୀ ଓ ଅର୍ଥମନ୍ତ୍ରୀଙ୍କୁ ଗୋଡାଇ ଗୋଡାଇ ପିଟିଛନ୍ତି ବିକ୍ଷୋଭକାରୀ । ସୁପ୍ରିମକୋର୍ଟରେ ମଧ୍ୟ ନିଅାଁ ଲଗାଇ ଦେଇଛନ୍ତି । କାଠମାଣ୍ଡୁର ବିଭିନ୍ନ ସ୍ଥାନରେ ନିଅାଁ ଲଗାଇଛନ୍ତି ବିକ୍ଷୋଭକାରୀ । ସରକାରୀ ସମ୍ପତ୍ତି ଛାରଖାର ହୋଇଯାଇଛି । ଦେଶରେ ରାଜନୈତିକ ଓ ଅର୍ଥନୈତିକ ଅସ୍ଥିରତା ସୃଷ୍ଟି ହୋଇଛି । ବିକ୍ଷୋଭକାରୀଙ୍କ ଆଗରେ ସଂପୂର୍ଣ୍ଣ ଅସହାୟ ହୋଇ ପଡିଛି ନେପାଳ ସେନାବାହିନୀ । ନେପାଳର ରାଜଧାନୀ କାଠମାଣ୍ଡୁ ବିକ୍ଷୋଭକାରୀଙ୍କ ନିୟନ୍ତ୍ରଣକୁ ଚାଲିଯାଇଛି । ନେପାଳରେ ସୋସିଆଲ ମିଡିଆ ବ୍ୟାନ ବିରୋଧରେ ସୃଷ୍ଟି ହୋଇଥିବା ବ୍ୟାପକ ହିଂସାକାଣ୍ଡ ଆଗରେ ମୁଣ୍ଡ ନୁଅାଁଛନ୍ତି ନେପାଳ ପ୍ରଧାନମନ୍ତ୍ରୀ । ପ୍ରଧାନମନ୍ତ୍ରୀ କେପି ଶର୍ମା ଓଲି ଆଜି ଇସ୍ତଫା ଦେଇଛନ୍ତି । ତାଙ୍କ ଇସ୍ତଫା ପତ୍ରରେ ଓଲି କହିଛନ୍ତି ଯେ ସେ "ସମସ୍ୟା ସମାଧାନକୁ ସହଜ କରିବା ଓ ଏହାକୁ ରାଜନୈତିକ ଭାବରେ ସମାଧାନ କରିବାରେ ସାହାଯ୍ୟ କରିବା’ ପାଇଁ ପଦ ଛାଡୁଛନ୍ତି । ସରକାର ସୋସିଆଲ ମିଡିଆ ପ୍ଲାଟଫର୍ମ ଉପରୁ ପ୍ରତିବନ୍ଧକ ଉଠାଇ ନେଇଥିବା ଘୋଷଣା କରିବା ସତ୍ତ୍ୱେ ନେପାଳରେ ଦ୍ୱିତୀୟ ଦିନ ପାଇଁ ବିକ୍ଷୋଭ ଓ ପୋଡାଜଳା ଜାରି ରହିଛି । ଦ୍ୱିତୀୟ ଦିନରେ ଆଉ ଦୁଇଜଣଙ୍କ ମୃତୁ୍ୟ ପରେ ବିକ୍ଷୋଭକାରୀମାନେ ଓଲିଙ୍କ ବହିଷ୍କାର ଓ ସରକାରଙ୍କୁ ବରଖାସ୍ତ କରିବାକୁ ଦାବି କରିଥିଲେ । ନେପାଳରେ ହିଂସାଜନିତ ମୃତୁ୍ୟ ସଂଖ୍ୟା ୨୨ କୁ ବୃଦ୍ଧି ପାଇଥିବା ବେଳେ  ୩୦୦ ରୁ ଅଧିକ ଆହତ ହୋଇଛନ୍ତି । ତେବେ ଓଲିଙ୍କ ଇସ୍ତଫାର କିଛି ଘଣ୍ଟା ପରେ ନେପାଳ ରାଷ୍ଟ୍ରପତି ରାମଚନ୍ଦ୍ର ପୌଡେଲ ତାଙ୍କ ପଦରୁ ଇସ୍ତଫା ଦେଇଛନ୍ତି ।
ଇସ୍ତଫା ଦେବାର କିଛି ଘଣ୍ଟା ପୂର୍ବରୁ ଓଲି ପ୍ରତିବାଦକାରୀମାନଙ୍କୁ ଶାନ୍ତି ବଜାୟ ରଖିବାକୁ ଓ ସଂଯମତା ଅବଲମ୍ବନ କରିବାକୁ ଅନୁରୋଧ କରିଥିଲେ । ଆଲୋଚନା ମାଧ୍ୟମରେ ସମାଧାନ ପାଇଁ ଆହ୍ୱାନ ଦେଇଥିଲେ । ସେ ସଙ୍କଟର ସମାଧାନ ପାଇଁ ସନ୍ଧ୍ୟା ୬ ଟାରେ ସର୍ବଦଳୀୟ ବୈଠକ ଘୋଷଣା ମଧ୍ୟ କରିଥିଲେ । ଯେକୌଣସି ପ୍ରକାରର ହିଂସା ଜାତୀୟ ସ୍ୱାର୍ଥରେ ନୁହେଁ । ଆମକୁ ଶାନ୍ତିପୂର୍ଣ୍ଣ ଆଲୋଚନା ଓ ଆଲୋଚନା ଗ୍ରହଣ କରିବାକୁ ପଡିବ ବୋଲି ଓଲି ତାଙ୍କ ବିବୃତ୍ତିରେ କହିଛନ୍ତି । ଏହାତ୍ତ୍ୱେ ବିକ୍ଷୋଭକାରୀମାନେ ବରିଷ୍ଠ ରାଜନୈତିକ ନେତାଙ୍କ ଘର ଓ କାର୍ଯ୍ୟାଳୟକୁ ମଧ୍ୟ ଟାର୍ଗେଟ କରି ଚାଲିଥିଲେ । ସେମାନେ ନେପାଳର ସଂସଦରେ ନିଆଁ ଲଗାଇ ଦେଇଥିଲେ । ପ୍ରଧାନମନ୍ତ୍ରୀ ଏବଂ ରାଷ୍ଟ୍ରପତି ଉଭୟଙ୍କ ବ୍ୟକ୍ତିଗତ ବାସଭବନକୁ ଭଙ୍ଗାରୁଜା କରିଥିଲେ । ପ୍ରଧାନମନ୍ତ୍ରୀଙ୍କ ବାସଭବନ, ବିରୋଧୀ ଦଳ ନେତାଙ୍କ ଘର ନିଅାଁ ଲଗାଇ ଜାଳିଦେଇଛନ୍ତି ବିକ୍ଷୋଭକାରୀମାନେ । ସିଂହ ଦରବାର ଉପରେ ଆକ୍ରମଣ କରିଥିଲେ, ଯେଉଁଠାରେ ମନ୍ତ୍ରୀମାନଙ୍କ ଘର ଓ ସଂସଦ ଅବସ୍ଥିତ । ଏହାର ଅନେକ ଭିଡିଓ ଅନଲାଇନରେ ସାମ୍ନାକୁ ଆସିଛି । ନେପାଳ ସଂସଦର ଦୃଶ୍ୟଗୁଡ଼ିକ ଦର୍ଶାଉଛି ଯେ  କୋଠାରେ ନିଆଁ ଲଗାଇ ଦେବା ସମୟରେ ଘଟଣାସ୍ଥଳରୁ ଘନ ଧୂଆଁ ବାହାରୁଛି । ଏହି ସମୟରେ କାଠମାଣ୍ଡୁରେ ସୁରକ୍ଷା ଅଭିଯାନ ତୀବ୍ରତର ହୋଇଥିଲା । ସରକାରୀ ଅଧିକାରୀମାନଙ୍କୁ ତ୍ରିଭୁବନ ଅନ୍ତର୍ଜାତୀୟ ବିମାନବନ୍ଦରକୁ ସ୍ଥାନାନ୍ତର କରିବା ପାଇଁ ବୈସେପତି ମନ୍ତ୍ରୀସ୍ତରୀୟ କ୍ୱାର୍ଟରରୁ ପ୍ରାୟ ଏକ ଡର୍ଜନ ହେଲିକପ୍ଟର ଉଡ଼ାଣ କରିଥିଲା । ପ୍ରମୁଖ ମନ୍ତ୍ରୀମାନଙ୍କୁ ଅନ୍ୟତ୍ର ସ୍ଥାନାନ୍ତର ପାଇଁ ଅତି କମରେ ପାଞ୍ଚଟି ସେନା ହେଲିକପ୍ଟର ମୁତୟନ କରାଯାଇଥିଲା । ବଢ଼ୁଥିବା ଅଶାନ୍ତି ମଧ୍ୟରେ ତ୍ରିଭୁବନ ଅନ୍ତର୍ଜାତୀୟ ବିମାନବନ୍ଦରକୁ ପରେ ବନ୍ଦ କରିଦିଆଯାଇଥିଲା । ସମସ୍ତ ଉଡ଼ାଣ ବାତିଲ କରାଯାଇଥିଲା । ପ୍ରଦର୍ଶନକାରୀମାନେ ଡ୍ରୋନ୍ ଉଡ଼ାଇ, ଆତସବାଜି ଫୁଟାଇ ଓ ବିମାନରେ ବାଧା ସୃଷ୍ଟି କରିବା ପାଇଁ ଲେଜର ଲାଇଟ୍ ବ୍ୟବହାର କରି କାର୍ଯ୍ୟ ବାଧାପ୍ରାପ୍ତ କରିବାକୁ ସୋସିଆଲ ମିଡିଆରେ ଆହ୍ୱାନ କରିଥିଲେ । 
ଭାରତ ଏହାର ନାଗରିକମାନଙ୍କୁ ନେପାଳରେ ସତର୍କତା ଅବଲମ୍ବନ କରିବାକୁ ପରାମର୍ଶ ଦେଇଛି । ପରିସ୍ଥିତି ସ୍ଥିର ନହେବା ପର୍ଯ୍ୟନ୍ତ ଦେଶକୁ ସମସ୍ତ ଯାତ୍ରା ସ୍ଥଗିତ ରଖିବାକୁ ଅନୁରୋଧ କରିଛି । ବୈଦେଶିକ ବ୍ୟାପାର ମନ୍ତ୍ରଣାଳୟ  ଅସ୍ଥିର ପରିସ୍ଥିତି ଉପରେ ଗଭୀର ଚିନ୍ତା ପ୍ରକାଶ କରିଛି । ନେପାଳର ସମସ୍ତ ପକ୍ଷଙ୍କୁ ସଂଯମତା ଅବଲମ୍ବନ କରିବାକୁ ଓ ଶାନ୍ତିପୂର୍ଣ୍ଣ ଉପାୟ ଏବଂ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରିବାକୁ ଅନୁରୋଧ କରିଛି । ପରିସ୍ଥିତି ସ୍ଥିର ନହେବା ପର୍ଯ୍ୟନ୍ତ ସରକାର ଭାରତୀୟ ନାଗରିକମାନଙ୍କୁ ନେପାଳର ସମସ୍ତ ଯାତ୍ରା ସ୍ଥଗିତ ରଖିବାକୁ ଅନୁରୋଧ କରିଛନ୍ତି । ବର୍ତ୍ତମାନ ନେପାଳରେ ଥିବା ଭାରତୀୟ ନାଗରିକମାନଙ୍କୁ ସେମାନଙ୍କର ବର୍ତ୍ତମାନର ବାସସ୍ଥାନରେ ଆଶ୍ରୟ ନେବାକୁ, ବାହାରକୁ ନଯିବା ଓ ସମସ୍ତ ସତର୍କତା ଅବଲମ୍ବନ କରିବାକୁ ପରାମର୍ଶ ଦିଆଯାଇଛି । ନେପାଳରେ ଥିବା ଭାରତୀୟମାନଙ୍କୁ କାଠମାଣ୍ଡୁରେ ଥିବା ଭାରତୀୟ ଦୂତାବାସ ସହିତ ଯୋଗାଯୋଗରେ ରହିବାକୁ ଓ ସମସ୍ତ ସ୍ଥାନୀୟ ସୁରକ୍ଷା ପରାମର୍ଶ ପାଳନ କରିବାକୁ ମଧ୍ୟ କୁହାଯାଇଛି ।