ଓପିଟିସିଏଲ ଗ୍ରୀଡ଼ ସଂଯୋଗରୁ ୫ ପଞ୍ଚାୟତ ପାଇବେ ନିସ୍ତାର
Rasmita Behera
ସମ୍ବଲପୁର,: ସମ୍ବଲପୁର ଜିଲ୍ଲା ଉପାନ୍ତ ଓ ଆଦିବାସୀ ଅଧୁ୍ୟଷିତ ବାମରା ବ୍ଲକ ଅନ୍ତର୍ଗତ ଗଡ଼ପୋଷ ସମେତ ପିଣ୍ଡାପଥର, କିନାବଗା, ସାଗରା ଓ ରବଗା ଆଦି ୫ ଗୋଟି ପଞ୍ଚାୟତ ଅଞ୍ଚଳରେ ଥିବା ବିଭିନ୍ନ ଗାଁକୁ ପୂର୍ବରୁ ଗଡ଼ପୋଷ ସ୍ଥିତ ଗ୍ରୀଡ଼ରୁ ବିଦୁ୍ୟତ ସରବରାହ କରାଯାଉଥିଲା । ଯାହାକି ସୁନ୍ଦରଗଡ଼ ଜିଲ୍ଲାର କୁତ୍ରା ଗ୍ରୀଡ଼ରୁ ଗଡ଼ପୋଷ ବିଦୁ୍ୟତ ସବ୍ଷ୍ଟେସନକୁ ସିଧାସଳଖ ଯୋଗାଣ କରାଯାଉଥିଲା । ମାତ୍ର ବାରମ୍ବାର ଅଘୋଷିତ ବିଦୁ୍ୟତ କାଟ ସାଙ୍ଗକୁ ଲୋ ଭୋଲ୍ଟେଜ ଓ ବିଭିନ୍ନ ପର୍ଯ୍ୟାୟରେ ଦୀର୍ଘ ସମୟ ଧରି ବିଦୁ୍ୟତ ବିଭ୍ରାଟ ହେଉଥିବା କାରଣରୁ ଅଞ୍ଚଳବାସୀ ବହୁ ଅସୁବିଧାର ସମ୍ମୁଖୀନ ହେବା ସହ ଅତିଷ୍ଠ ରହିଥିଲେ । ସମସ୍ୟାର ସ୍ଥାୟୀ ସମାଧାନ ପାଇଁ ସରକାରୀ ସ୍ତରରେ ଓପିଟିସିଏଲ ପକ୍ଷରୁ ପଦକ୍ଷେପ ଗ୍ରହଣ କରାଯାଇଛି । ଏଥିପାଇଁ ଶନିବାର ଦିନ କେଛୁପାଣି ଠାରେ ଏକ ଉସôବ ଅନୁଷ୍ଠିତ ହୋଇଥିଲା ଯେଉଁଥିରେ ଓପିଟିସିଏଲ ପ୍ରକଳ୍ପ ମୁଖ୍ୟ ଅଧିକାରୀ ଯୋଗେଶ ଗୁପ୍ତା ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ସମ୍ମାନୀୟ ଅତିଥି ଭାବେ ଚିଫ ଅପରେସନ ମ୍ୟାନେଜର ଆଶିଷ ପାଟଯୋଶୀ, ଅଧିକ୍ଷଣ ଯନ୍ତ୍ରୀ ସୁଶାନ୍ତ ପଣ୍ଡା,ନିର୍ବାହୀ ଯନ୍ତ୍ରୀ ରଞ୍ଜିତ ପ୍ରଧାନ,କୁଚିଣ୍ଡା ଏସଡିଓ ସୁବ୍ରତ ପଣ୍ଡା ତଥା ବାମରା ସେକ୍ସନ ଯନ୍ତ୍ରୀ ସୌରଭ କୁମାର ପଟେଲ ପ୍ରମୁଖ ସାମିଲ ହୋଇଥିଲେ । ଏହି ଅବସରରେ ଗ୍ରାମବାସୀ ମଧ୍ୟ ଉପସ୍ଥିତ ଥିଲେ । ଏହାଦ୍ୱାରା ୫ ଗୋଟି ପଞ୍ଚାୟତବାସୀ ବିଦୁ୍ୟତ ସମସ୍ୟାରୁ ନିସ୍ତାର ପାଇବେ ।
