ସତ୍ୟନାରାୟଣଙ୍କ ଯଜେ୍ଞାତ୍ସବ ଉଦ୍ୟାପିତ
Rasmita Behera
କୁଆଖିଆ : ରସୁଲପୁର ବ୍ଲକର ମଠସାହି- ନାଉପାଳ ସ୍ଥିତ ସର୍ବ ପୁରାତନ ଶ୍ରୀ ଶ୍ରୀ ସତ୍ୟନାରାୟାଣ ପୀଠରେ ୧୪ତମ ବାର୍ଷିକ ବିଶ୍ୱ ଶାନ୍ତି ଯଜେ୍ଞାତ୍ସବ ପାଳିତ ହୋଇଯାଇଛି । ଗତ ମଙ୍ଗଳବାର ଅଙ୍କୁରାରୋପଣ, ନାମ ସଂକୀର୍ତ୍ତନ, ବୁଧବାର ପ୍ରାତଃ ୭ ଘଟିକାରେ କଳସ ଶୋଭାଯାତ୍ରା, ଯଜ୍ଞାରମ୍ଭ, ସନ୍ଧ୍ୟାରେ ନାମ ସଂକୀର୍ତ୍ତନ ସହିତ ଓଡିଶାର ସୁନାମଧନ୍ୟ ଗାୟିକା ପ୍ରଜ୍ଞାପରମିତା ପଣ୍ଡା (ନୟାଗଡ଼)ଙ୍କ ପାରମ୍ପରିକ ପାଲା ପରିବେଷଣ ହୋଇଥିଲା ।ଗୁରୁବାର ପ୍ରାତଃରେ ସୂର୍ଯ୍ୟ ପୂଜା, ଗୋ-ପୂଜା, ଗୁରୁପୂଜା, ଯଜ୍ଞାରମ୍ଭ, ସନ୍ଧ୍ୟା ଆଳତୀ, ନାମ ସଂକୀର୍ତ୍ତନ ସହିତ ପାଲା ପରିବେଷଣ କରାଯାଇଥିଲା । ସେହିପରି ଶୁକ୍ରବାର ପ୍ରାତଃ ସମୟରେ ଯଥାବିଧି ଯଜ୍ଞ କାର୍ଯ୍ୟ ସହ ମନ୍ଦିରରେ ଧ୍ୱଜା ସ୍ଥାପନ ସହିତ ସନ୍ଧ୍ୟାରେ ପୂର୍ଣ୍ଣାହୂତି କାର୍ଯ୍ୟ ସମାପନ କରାଯାଇଥିଲା । ୪ ଦିନ ବ୍ୟାପୀ ଏହି ମହୋତ୍ସବର ପ୍ରତି ସନ୍ଧ୍ୟାରେ ଭଜନ, କୀର୍ତ୍ତନ ସହିତ ସାଂସ୍କୃତିକ କାର୍ଯ୍ୟକ୍ରମ ହୋଇଥିଲା । ମନ୍ଦିର ପରିଚାଳନା କମିଟିର ସଦସ୍ୟ ଏବଂ ଗ୍ରାମବାସୀ ମାନଙ୍କ ମିଳିତ ସହଯୋଗରେ ଏହା ସମାପନ ହୋଇଥିଲା ।
