ଦିଲ୍ଲୀରେ ମହତାବ ବିବାଦ, ପ୍ରକୃତ ରହସ୍ୟ କଣ?
Rasmita Behera
ଭୁବନେଶ୍ୱର : ଦିଲ୍ଲୀରେ ଏବେ ଭର୍ତ୍ତୃହରି ମହତାବଙ୍କୁ ନେଇ ବିବାଦ ମୁଣ୍ଡ ଟେକିଛି । କାମଚଳା ବାଚସ୍ପତି ହୋଇଥିବାରୁ କଂଗ୍ରେସ ଏନେଇ ପ୍ରଶ୍ନ ଉଠାଇଛି । ଏପରିକି ଏହି ପ୍ରସଙ୍ଗରେ ବିଜେପି ଓ କଂଗ୍ରେସ ମୁହାଁମୁହିଁ ହୋଇଛନ୍ତି ।
ସପ୍ତମ ଥର ପାଇଁ ମହତାବ ଲୋକସଭାକୁ ନିର୍ବାଚିତ ହୋଇଛନ୍ତି । ଶ୍ରେଷ୍ଠ ସାଂସଦ ହେବାର ବି ଗୌରବ ଅର୍ଜନ କରିଛନ୍ତି । ଯେଉଁଥିପାଇଁ ତାଙ୍କୁ ବିଜେପି ପକ୍ଷରୁ କାମଚଳା ବାଚସ୍ପତି ଭାବେ ଦାୟିତ୍ୱ ଦିଆଯାଇଛି । ତେବେ କଂଗ୍ରେସର ଯୁକ୍ତି ହେଉଛି ବର୍ତ୍ତମାନ ଲୋକସଭାରେ ଦୁଇଜଣ ସାଂସଦ ଅଷ୍ଟମ ଥର ପାଇଁ ନିର୍ବାଚିତ ହୋଇଛନ୍ତି । ଜଣେ ହେଉଛନ୍ତି କଂଗ୍ରେସ ନେତା କେ ସୁରେଶ ଓ ଆଉ ଜଣେ ହେଉଛନ୍ତି ବିଜେପି ନେତା ବୀରେନ୍ଦ୍ର କୁମାର । ବୀରେନ୍ଦ୍ର ମନ୍ତ୍ରୀ ହୋଇଥିବାରୁ କେ. ସୁରେଶ ହିଁ କାମଚଳା ବାଚସ୍ପତି ହେବା କଥା । ତେବେ ବିଜେପିର ଯୁକ୍ତି ହେଉଛି, ମହତାବ ଲଗାତର ସପ୍ତମ ଥର ପାଇଁ ନିର୍ବାଚିତ ହୋଇଛନ୍ତି । କିନ୍ତୁ କେ ସୁରେଶ ଲଗାତର ସଂସଦକୁ ଆସିପାରିନାହାନ୍ତି ।
ସମ୍ବିଧାନ ଅନୁଯାୟୀ, ବରିଷ୍ଠ ସାଂସଦଙ୍କୁ ପ୍ରୋଟେମ ସ୍ପିକର ବା କାମଚଳା ବାଚସ୍ପତି ଭାବେ ନିଯୁକ୍ତ କରାଯାଇଥାଏ । ୧୯୫୬ରୁ ଏହି ପରମ୍ପରା ଚାଲିଆସିଛି । ତେବେ ୧୯୭୭ରେ ଡିଏନ ତିୱାରୀ ବରିଷ୍ଠ ଏମପି ହୋଇନଥିଲେବି କାମଚଳା ବାଚସ୍ପତି ହୋଇଥିଲେ । ୨୦୧୯ରେ ମେନକା ଗାନ୍ଧୀ ବରିଷ୍ଠ ସାଂସଦ ହୋଇଥିଲେବି ବୀରେନ୍ଦ୍ର କୁମାରଙ୍କୁ ପ୍ରୋଟେମ ସ୍ପିକର କରାଯାଇଥିଲା ।
ସାଧାରଣତଃ ସହମତି ଭିତ୍ତିରେ ବାଚସ୍ପତି ନିର୍ବାଚନ କରିବା ଗଣତାନ୍ତ୍ରିକ ପରମ୍ପରା । କିନ୍ତୁ ଚଳିତ ଥର ବାଚସ୍ପତି ପଦ ପାଇଁ ଏନଡ଼ିଏ ଓ ଇଣ୍ଡି ମେଣ୍ଟ ମଧ୍ୟରେ ଲଢେ଼ଇ ହେବାର ସମ୍ଭାବନା ରହିଛି ।
