ସେପ୍ଟେମ୍ବର ୩ରେ ରାଜ୍ୟସଭା ଉପନିର୍ବାଚନ
Rajyasabha Election
Ramachandi Prasad
ଭୁବନେଶ୍ୱର : ଆସନ୍ତା ସେପ୍ଟେମ୍ବର ୩ରେ ରାଜ୍ୟସଭା ଉପନିର୍ବାଚନ ହେବ । ୯ ରାଜ୍ୟର ୧୨ ଆସନ ପାଇଁ ଆଜି ନିର୍ବାଚନ କମିଶନ ତାରିଖ ଘୋଷଣା କରିଛନ୍ତି । ଅଗଷ୍ଟ ୧୪ରେ ଏନେଇ ବିଧିବଦ୍ଧ ଭାବେ ବିଜ୍ଞପ୍ତି ପ୍ରକାଶ ପାଇବ । ଅଗଷ୍ଟ ୨୧ରେ ନାମାଙ୍କନ ପତ୍ର ଦାଖଲ ପ୍ରକ୍ରିୟା ଶେଷ ହେବାର ଥିବାବେଳେ ଆବଶ୍ୟକ ପଡ଼ିଲେ ଭୋଟ୍ ଗ୍ରହଣ ହେବ ।
ନିର୍ବାଚନ କମିଶନଙ୍କ ପକ୍ଷରୁ ଜାରି ପ୍ରେସ୍ ବିବୃତ୍ତି ଅନୁଯାୟୀ, ଆସାମରୁ କାମାକ୍ଷା ପ୍ରସାଦ ତାସା ଓ ସର୍ବାନନ୍ଦ ସୋନୱାଲ, ବିହାରରୁ ମିସା ଭାରତୀ ଓ ବିବେକ ଠାକୁର, ହରିୟାଣାର ଦୀପେନ୍ଦର ସିଂ ହୁଦା, ମଧ୍ୟପ୍ରଦେଶରୁ ଜ୍ୟୋତିରାଦିତ୍ୟ ସିନ୍ଧିଆ, ମହାରାଷ୍ଟ୍ରରୁ ଉଦୟନରାଜେ ଭୋନସଲେ ଓ ପୀୟୁଷ ଗୋୟଲ, ରାଜସ୍ଥାନରୁ କେସି ବେଣୁଗୋପାଳ ଏବଂ ତ୍ରିପୁରାରୁ ବିପ୍ଳବ କୁମାର ଦେବ ଲୋକସଭା ନିର୍ବାଚନ ଜିତିଥିବାରୁ ରାଜ୍ୟସଭା ସାଂସଦ ପଦରୁ ଇସ୍ତଫା ଦେଇଥିଲେ । ତେଣୁ ଏହି ୧୦ ସ୍ଥାନରେ ଉପନିର୍ବାଚନ ଅପରିହାର୍ଯ୍ୟ ଥିଲା । ସେହିପରି ତେଲେଙ୍ଗାନାର ଡକ୍ଟର କେ କେଶବ ରାଓ ଏବଂ ଓଡ଼ିଶାର ମମତା ମହନ୍ତ ନିଜ ପଦରୁ ଇସ୍ତଫା ଦେବାରୁ ଉପନିର୍ବାଚନ ଅନୁଷ୍ଠିତ ହେବ ।
ଅଗଷ୍ଟ ୧୪ରେ ବିଧିବଦ୍ଧ ବିଜ୍ଞପ୍ତି ପ୍ରକାଶ ସହ ନାମାଙ୍କନ ପତ୍ର ଦାଖଲ ପ୍ରକ୍ରିୟା ଆରମ୍ଭ ହେବ । ନାମାଙ୍କନ ପତ୍ର ଦାଖଲ ପ୍ରକ୍ରିୟାର ଶେଷ ଦିନ ଅଗଷ୍ଟ ୨୧କୁ ଧାର୍ଯ୍ୟ କରାଯାଇଛି । ଅଗଷ୍ଟ ୨୨ରେ ପ୍ରାର୍ଥପତ୍ର ଯାଞ୍ଚ କରାଯିବ । ପ୍ରାର୍ଥୀପତ୍ର ପ୍ରତ୍ୟାହାର ଶେଷ ଦିବସ ଆସାମ, ମଧ୍ୟପ୍ରଦେଶ, ମହାରାଷ୍ଟ୍ର ଓ ତ୍ରିପୁରା ପାଇଁ ଅଗଷ୍ଟ ୨୬ ଧାର୍ଯ୍ୟ ହୋଇଥିବାବେଳେ ବିହାର, ହରିୟାଣା, ରାଜସ୍ଥାନ, ତେଲେଙ୍ଗାନା ଓ ଓଡ଼ିଶା ପାଇଁ ଅଗଷ୍ଟ ୨୭ ଧାର୍ଯ୍ୟ ହୋଇଛି । ଯଦି ଆବଶ୍ୟକ ପଡେ଼ ତେବେ ସେପ୍ଟେମ୍ବର ୩ ତାରିଖ ସକାଳ ୯ଟାରୁ ଅପରାହ୍ନ ୪ଟା ପର୍ଯ୍ୟନ୍ତ ଭୋଟ୍ ଗ୍ରହଣ ହେବ । ସେହିଦିନ ଅପରାହ୍ନ ୫ଟାରେ ଭୋଟ ଗଣତି କରାଯିବ ।
