ଅକଳରେ ବିଜେଡ଼ି କର୍ପୋରେଟର

 ଭୁବନେଶ୍ୱର : ବିଜୁ ଜନତା ଦଳର ବିଏମସି କର୍ପୋରେଟର ଅମରେଶ ଜେନାଙ୍କ ନାମରେ ଆସିଛି ସଂଗୀନ ଅଭିଯୋଗ  । ଜଣେ ଯୁବତୀଙ୍କୁ ସେ ବିବାହର ପ୍ରତିଶ୍ରୁତି ଦେଇ ପ୍ରତାରଣା କରିଛନ୍ତି  । ଲକ୍ଷ୍ମୀସାଗର ଥାନାରେ ଏନେଇ ମାମଲା ରୁଜୁ କରାଯାଇଛି  ।
ମିଳିଥିବା ସୂଚନା ଅନୁଯାୟୀ, ଲକ୍ଷ୍ମୀସାଗର ଥାନାରେ ପୀଡ଼ିତା ଏଭଳି ସଂଗୀନ ଅଭିଯୋଗ କରିଛନ୍ତି  । ଅଭିଯୋଗ ଅନୁଯାୟୀ, ତାଙ୍କୁ ବିବାହର ପ୍ରତିଶ୍ରୁତି ଦେଇ ଅମରେଶ ଶାରୀରିକ ସମ୍ପର୍କ ରଖିଥିଲେ  । କିନ୍ତୁ ପରେ ଅମରେଶ ତାଙ୍କୁ ପ୍ରତାରଣା କରିବା ସହ ହତ୍ୟାର ବି ଧମକ ଦେଇଥିଲେ  । ୨୦୨୩ରେ ଯୁବତୀ ଜଣଙ୍କ ନାବାଳିକା ଥିଲେ  । ଏକ ରଜ ଉତ୍ସବରେ ସେମାନଙ୍କର ଦେଖା ସାକ୍ଷାତ ହୋଇଥିଲା  । ଅମରେଶ ତାଙ୍କୁ ଏକ ମୋବାଇଲ୍ ବି ଉପହାର ଦେଇଥିଲେ  । ସେତେବେଳେ ସେ ନାବାଳିକା ଥିଲେ  । ଏମିତିକି ଯୁବତୀ ଜଣଙ୍କୁ ସେ ଗର୍ଭବତୀ କରିଥିବା ନେଇ ଗଣମାଧ୍ୟମରେ ଖବର ପ୍ରକାଶ ପାଇଛି  । ଅପରପକ୍ଷରେ ପୁଲିସ୍ ଏନେଇ ଏକ ମାମଲା ରୁଜୁ କରିବା ସହ ପୀଡ଼ିତାଙ୍କୁ ଡାକ୍ତରୀ ମାଇନା ପାଇଁ କ୍ୟାପିଟାଲ୍ ହସପିଟାଲକୁ ନେଇଥିଲେ  ।
ପୀଡ଼ିତା ଏଫଆଇଆରରେ ଦର୍ଶାଇଛନ୍ତିଯେ, ବାଇଆଁ ଜେନା ଉପହାର ଦେଇଥିବା ମୋବାଇଲ୍ ଫୋନ୍ରେ ସେମାନେ ସବୁଦିନ କଥା ହେଉଥିଲେ  । ଦିନେ ସେ ତାଙ୍କୁ ଭଲପାଇବା ହୋଇଛି ବୋଲି କହିବା ସହ ବିବାହ ପାଇଁ ପ୍ରତିଶ୍ରୁତି ଦେଇଥିଲେ  । ୨୦୨୩ ସେପ୍ଟେମ୍ବରରେ ପ୍ରଥମେ ପୁରୀରେ ତାଙ୍କର ଜଣେ ସାଙ୍ଗ ଘରେ ଶାରୀରିକ ସମ୍ପର୍କ ରଖିଥିଲେ  । ତା’ପରେ ତାଙ୍କୁ ସେ ଅନେକ ଯାଗାକୁ ନେଇ ସମ୍ପର୍କ ରଖିଥିଲେ  । ଉପହାର ଭାବେ ଡ୍ରେସ୍, ଜୋତା ଓ ଟଙ୍କା ଇତ୍ୟାଦି ଦେଇଛନ୍ତି  । ବୈବାହିକ ଜୀବନରେ ସେ ଖୁସିନଥିଲେ, ତାଙ୍କ ସ୍ତ୍ରୀଙ୍କର ଅନ୍ୟ ପୁରୁଷ ସହ ଅନୈତିକ ସମ୍ପର୍କ ରହିଛି ବୋଲି କହୁଥିଲେ  । ୨୦୨୪ ଫେବୃଆରୀରେ ସେ ୨ ମାସର ଗର୍ଭବତୀ ହୋଇଥିଲେ  । ସେ କହିଥିଲେଯେ,  ସେ ତାଙ୍କ ସ୍ତ୍ରୀଙ୍କୁ ଡିଭର୍ସ ଦେଇ ବାହାହେବେ  । ତା’ପରେ ଛୁଆପିଲା ହେବ  । ତେଣୁ ତାଙ୍କୁ ଗର୍ଭପାତ ପିଲ୍ ଖୁଆଇ ଛୁଆ ନଷ୍ଟ କରିଥିଲେ  । ଗତ ଅପ୍ରେଲରେ ବାଇଅାଁ ଜେନା ତାଙ୍କ ଧଳା ଏକ୍ସୟୁଭି କାରରେ ପୁରୀ ରୋଡ଼ ବୁଲାଇବାକୁ ନେଇ ମୋବାଇଲ୍ ଛଡ଼ାଇ ନେଇଥିଲେ  । ଅଶ୍ଳୀଳ ଭାଷାରେ ଗାଳିକରିବା ସହ  ଜୀବନରେ ମାରିଦେବାକୁ ଚେଷ୍ଟା କରିଥିଲେ  । ଭୁବନେଶ୍ୱର ଛାଡ଼ି ନଗଲେ ମାରିବାକୁ ବି ଧମକ ଦେଇଥିଲେ  । 
ପୁଲିସ୍ ଏତଲାକୁ ଗ୍ରହଣ କରି ବିଏନଏସର ୬୪ (୨) (ଏମ୍), ୮୯, ୨୯୬, ୩୫୧ (୨) ଓ ବିଏନଏସ ୬ ଦଫାରେ ମାମଲା ରୁଜୁ କରିଛି  ।