ଷ୍ଟାରଙ୍କୁ ଲୋଡ଼ିଲା ବିଜେଡ଼ି ନବୀନ ନିବାସରେ ଦିଆଗଲା ପ୍ରଚାର ମନ୍ତ୍ର

ଭୁବନେଶ୍ୱର : ଏକଦା ବିଜେଡ଼ିରେ ଲାଗିଥିଲା ଓଲିଉଡ଼ ସୁପରଷ୍ଟାରଙ୍କ ଭିଡ଼  । ଜଣଙ୍କ ପରେ ଜଣେ ସୁପରଷ୍ଟାର ଅଭିନେତାରୁ ରାଜନେତା ବନିବାର ସ୍ୱପ୍ନରେ ମସଗୁଲ ଥିଲେ  । କିନ୍ତୁ ବିଜେଡ଼ି କୋଣଠେସା କରିବା ପରେ ସେମାନେ ଏବେ ଶଙ୍ଖ ଶିବିର ଛାଡ଼ି ପଦ୍ମ ପୋଖରୀରେ ବୁଡ଼ ମାରିଛନ୍ତି  । ସେପଟେ ରାଜନୀତିରେ ନଥିବା ଅନ୍ୟ ଅଭିନେତାମାନଙ୍କୁ ଆକର୍ଷିତ କରିଛି ବିଜୁ ଜନତା ଦଳ  । ନବୀନ ସରକାରଙ୍କ ସଫଳତାକୁ ପ୍ରଚାର କରିବା ପାଇଁ ସେମାନଙ୍କୁ ମନ୍ତ୍ର ବି ଦିଆଯାଇଛି  । ଏହାଛଡ଼ା ସିନେ ଶିଳ୍ପର ବିକାଶ ଓ ଓଡ଼ିଶାର ବିକାଶ ପାଇଁ ସେମାନଙ୍କର ପରାମର୍ଶ ବି ବିଜେଡ଼ି ଦ୍ଭ ୭ ପୃଷ୍ଠାରେ... ଲୋଡ଼ିଥିବା ଜାଣିବାକୁ ମିଳିଛି  । ଆଜି ନବୀନ ନିବାସରେ ଭିନ୍ନ ଏକ ଚିତ୍ର ଦେଖିବାକୁ ମିଳିଥିଲା  । ନେତାଙ୍କ ବଦଳରେ ଅଭିନେତାମାନଙ୍କ ଭିଡ଼ ଜମିଥିଲା  । ଓଲିଉଡ଼ର ଆଗଧାଡ଼ିର ଅଭିନେତା, ଅଭିନେତ୍ରୀ, କଣ୍ଠଶିଳ୍ପୀମାନଙ୍କୁ ଦେଖିବାକୁ ମିଳିଥିଲା  । ନିର୍ବାଚନ ପ୍ରଚାରରେ ତାରକାମାନଙ୍କୁ ନିୟୋଜିତ କରିବା ପାଇଁ ବିଜେଡ଼ି ଯୋଜନା କରିଛି  । ସୁପରଷ୍ଟାର ବାବୁଶାନ ମହାନ୍ତି, ଅମ୍ଳାନ ଦାସ, ପପୁ ପମପମ, ଶୈଳେନ୍ଦ୍ର, ଅଶ୍ୱିନୀ ତ୍ରିପାଠୀ, ପ୍ରଜ୍ଞା, ଭୂମିକା, ସୁପ୍ରିୟା, ପ୍ରେରଣା, ତାରିକ ଅଜିଜ, କମେଡ଼ିଆନ ପ୍ରଜ୍ଞା ଖଟୁଆ ପ୍ରମୁଖଙ୍କୁ ନବୀନ ନିବାସରେ ଦେଖିବାକୁ ମିଳିଥିଲା  । ସେଠାରେ ବିଜେଡ଼ି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ବିଜେଡ଼ି ନେତା ଭିକେ ପାଣ୍ଡିଆନ୍ଙ୍କ ସହ ଅଭିନେତା, ଅଭିନେତ୍ରୀମାନେ ଆଲୋଚନା କରିଥିଲେ  ।
ନବୀନ ନିବାସକୁ ଅଭିନେତା ଅଭିନେତ୍ରୀମାନଙ୍କୁ କାହିଁକି ଡକାଯାଇଥିଲା, ସେନେଇ କେହି ସ୍ପଷ୍ଟ ଭାବେ କହିନଥିଲେ  । ବାବୁଶାନ ଗତଥର ବିଜେପି ପାଇଁ ପ୍ରଚାର କରିଥିଲେ  । ତାଙ୍କ ମା’ ଅପରାଜିତା ମହାନ୍ତି ପ୍ରାର୍ଥୀ ହୋଇଥିବାରୁ ସେ ବିଜେପି ସପକ୍ଷରେ ପ୍ରଚାର କରୁଥିଲେ  । ତେବେ ଏଥର ସେ ବିଜେଡ଼ି ପାଇଁ ପ୍ରଚାର କରିବେ ବୋଲି ଚର୍ଚ୍ଚା ହେଉଛି  । ବାବୁଶାନ ନିଜ ପ୍ରତିକ୍ରିୟାରେ କହିଛନ୍ତିଯେ, ସେ ନବୀନ ପଟ୍ଟନାୟକ ଓ ଭିକେ ପାଣ୍ଡିଆନଙ୍କ ସହ କଥା ହୋଇଥିଲେ  । ବହୁତ ଖୁସି ଲାଗିଲା ବୋଲି ସଂକ୍ଷିପ୍ତରେ ନିଜର ମନ୍ତବ୍ୟ ଦେଇଥିଲେ  । କମେଡ଼ିଆନ ପ୍ରଜ୍ଞା ଖଟୁଆ କହିଥିଲେଯେ, ବିଜେଡ଼ି ପକ୍ଷରୁ ସେମାନଙ୍କୁ ଡକା ଯାଇଥିଲା  । ନବୀନ ପଟ୍ଟନାୟକଙ୍କ ସହ ସେମାନେ ଆଲୋଚନା କରିଛନ୍ତି  । ସରକାରଙ୍କ ସଫଳତା କଥା ପ୍ରଚାର କରିବାକୁ ସେମାନଙ୍କୁ କୁହାଯାଇଛି ବୋଲି ପ୍ରଜ୍ଞା କହିଛନ୍ତି  । ସେହିପରି ଅଭିନେତ୍ରୀ ସୁପ୍ରିୟା କହିଥିଲେଯେ, ୨୦୨୪ରୁ ୨୦୩୪ ମଧ୍ୟରେ ଓଡ଼ିଶାରେ କ’ଣ ବିକାଶ ହୋଇପାରିବ ସେ ଉପରେ ଆଲୋଚନ ହୋଇଥିଲା  । ଅପରପକ୍ଷରେ ଓଡ଼ିଆ ସିନେ ଶିଳ୍ପ ବାବଦରେ ଆଲୋଚନା ହୋଇଥିଲା ବୋଲି ପପୁ ପମପମ କହିଛନ୍ତି  । ସୂଚନାଯୋଗ୍ୟଯେ, ସୁପରଷ୍ଟାର ସିଦ୍ଧାନ୍ତ ମହାପାତ୍ର, ଅନୁଭବ ମହାନ୍ତି, ଅରିନ୍ଦମ ରାୟ ଓ ଆକାଶ ଦାସ ନାୟକ ପ୍ରମୁଖ ବିଜେଡ଼ି ଛାଡ଼ି ପଦ୍ମ ଧରିଛନ୍ତି  । ନିର୍ବାଚନ ପ୍ରଚାର ବେଳେ ତାରକାମାନଙ୍କର ଏକ ପ୍ରମୁଖ ଭୂମିକା ରହିଛି  ।