ଲଢେ଼ଇ ଷ୍ଟାର୍ଟ : ନବୀନ ବିଜେଡ଼ି ବନାମ ପାଣ୍ଡିଆନ୍‌ ବିଜେଡ଼ି

ଭୁବନେଶ୍ୱର : ବିଜେଡ଼ି ଭାଙ୍ଗିଯିବ ନୁହେଁ, ଫାଳ ଫାଳ ହୋଇ ସାରିଲାଣି  । ଗୋଟିଏ ହେଉଛି ବିଜେଡ଼ି (ନବୀନ) ଓ ଅନ୍ୟଟି ହେଉଛି ବିଜେଡ଼ି (ପାଣ୍ଡିଆନ୍‌)  । ଅର୍ଥାତ୍‌ ବିଜେଡ଼ିରେ ଏବେ ନବୀନ ଓ ପାଣ୍ଡିଆନ୍‌ଙ୍କ ଗୋଷ୍ଠୀ ମଧ୍ୟରେ ଛକାପଞ୍ଝା ଆରମ୍ଭ ହୋଇଯାଇଛି  । ଭିତରେ ଭିତରେ ବଳ କଷାକଷି ବି ଚାଲିଛି  । କୁହୁଳୁଥିବା ଅସନ୍ତୋଷ ଯେକୌଣସି ମୁହୂର୍ତ୍ତରେ ବିସ୍ଫୋରକ ରୂପ ନେଇପାରେ  । ଶୀତଳଯୁଦ୍ଧ ଖଣ୍ଡଯୁଦ୍ଧରେ ରୂପାନ୍ତରିତ ହୋଇପାରେ  । ଭିକେ ପାଣ୍ଡିଆନ୍‌ବି ଏକଥା ଜାଣି ସାରିଲେଣି  । କିନ୍ତୁ ନିଜ ଅନୁଗତଙ୍କ ଜରିଆରେ ସ୍ଥିତିକୁ ମ୍ୟାନେଜ କରିବାକୁ ଚାହୁଁଥିଲେବି ସମ୍ଭବପର ହେଉନାହିଁ  । ଜଣଙ୍କ ପରେ ଜଣେ ବରିଷ୍ଠ ନେତା ପାଣ୍ଡିଆନଙ୍କୁ ସିଧା ନିଶାନା ସାଧୁଛନ୍ତି  । ଗୋଠ ମାତିଲେ ଖଣ୍ଡିଆ ମାତିବା ନ୍ୟାୟରେ ଯେକୌଣସି ମୁହୂର୍ତ୍ତରେ ଶଙ୍ଖଭବନରେ ଅସନ୍ତୋଷର ଭୂକମ୍ପ ହେବାର ଆଶଙ୍କା ରହିଛି  ।
ୱାକଫ ବିଲ୍‌କୁ ନେଇ ବିଜେଡ଼ିର ପରିବର୍ତ୍ତିତ ଆଭିମୁଖ୍ୟ ଦଳରେ କମ୍ପନ ସୃଷ୍ଟିକରିଛି  । ପୂର୍ବରୁ ଥିବା ଅସନ୍ତୋଷ ଏବେ ବେଶୀ କୁହୁଳିବାରେ ଲାଗିଛି  । ସାଂସଦ ଦେବାଶିଷ ସାମନ୍ତରାୟ ନାଁ ନନେଇଥିଲେବି ପାଣ୍ଡିଆନଙ୍କ ଆଡ଼କୁ ଇସାରା ଦେଇଥିଲେ  । ପୂର୍ବରୁ ପାଣ୍ଡିଆନଙ୍କୁ ସମର୍ଥନ କରୁଥିବା ଦେବାଶିଷ ପାଣ୍ଡିଆନ୍‌ଙ୍କ ବିରୋଧରେ ମନ୍ତବ୍ୟ ଦେବା ଛୋଟିଆ ସଂକେତ ନୁହେଁ  । ବରିଷ୍ଠ ବିଜେଡ଼ି ନେତା ପ୍ରଭାତ ତ୍ରିପାଠୀ ମଧ୍ୟ ଆହୁରି ପାଦେ ଆଗେଇ ଯାଇ ବିସ୍ଫୋରକ ମନ୍ତବ୍ୟ ଦେଇଛନ୍ତି  । ସେ କହିଛନ୍ତିଯେ, ବିଜେଡ଼ି ଧର୍ମନିରପେକ୍ଷ ଦଳ  । କିନ୍ତୁ ଭୋଟ୍‌ ଦିନ ଆଭିମୁଖ୍ୟ ବଦଳିଗଲା  । ନିଷ୍ପତ୍ତି ନେବାର ଔକାତ ସସ୍ମିତ ପାତ୍ରଙ୍କର ନାହିଁ  ।  ପାଣ୍ଡିଆନଙ୍କ ପାଇଁ ଆଜି ଦଳ ହାରିଗଲା  । ଦଳ ବୁଡ଼ାଇବାରେ ସେ ହିଁ ପ୍ରମୁଖ କାରଣ  । ସାରା ଓଡ଼ିଶା ଏକଥା ଜାଣିଛି  । ନବୀନ ବାବୁ ଆଗକୁ ଆସିଲେ ସବୁ ଠିକ ଚାଲିବ  । ପାଣ୍ଡିଆନ୍‌ ଏବେ ବିଜେଡ଼ି ପାଇଁ ବୋଝ ପାଲଟି ଯାଇଛନ୍ତି ବୋଲି ପ୍ରଭାତ କହିଛନ୍ତି  । ପୂର୍ବରୁ ମଧ୍ୟ ଅନେକ ବରିଷ୍ଠ, ଯୁବ ଓ ଛାତ୍ରନେତାମାନେ ପାଣ୍ଡିଆନଙ୍କ ବିରୋଧରେ ଅସନ୍ତୋଷ ଝାଡ଼ିଛନ୍ତି  । ସେପଟେ ପାଣ୍ଡିଆନଙ୍କ ଅନୁଗତମାନେ କିନ୍ତୁ ଡ୍ୟାମେଜ କଣ୍ଟ୍ରୋଲ ପାଇଁ ଉଦ୍ୟମ ଆରମ୍ଭ କରିଦେଇଛନ୍ତି  । ପାଣ୍ଡିଆନ୍‌ କିଭଳି ରାଜ୍ୟ ବିକାଶ କରୁଥିଲେ  । ତାଙ୍କ ପାଇଁ ବିଜେଡ଼ି କେମିତି ମଜବୁତ୍‌ ହୋଇଥିଲା ସେହିକଥା ସୋସିଆଲ ମିଡ଼ିଆରେ ଲେଖୁଛନ୍ତି  । 
ସେପଟେ ନବୀନ ନିବାସ ଆଗରେ ପାଣ୍ଡିଆନ୍‌ ଗୋ ବ୍ୟାକ୍‌ ନାରା ପଡ଼ିବା ଆରମ୍ଭ ହେଲାଣି  । ଆଗାମୀ ଦିନରେ ବ୍ଳକ ଓ ଜିଲ୍ଲାସ୍ତରରେ ବି ଏଭଳି ବିରୋଧ ହେବବୋଲି ଜାଣିବାକୁ ମିଳିଛି  ।