ଅକଳରେ ବିରୋଧୀ ମୁଖିଆ

 ଭୁବନେଶ୍ୱର : ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକଙ୍କୁ ଗାଦିଚୁ୍ୟତ କରିବା ପାଇଁ ଅଣ୍ଟା ଭିଡ଼ିଛନ୍ତି ବିଜେପି ଓ କଂଗ୍ରେସ  । ଏଥର ସରକାର ଗଢ଼ିବୁ ବୋଲି ବିଜେପି ସଭାପତି ମନମୋହନ ସାମଲ କହୁଥିବାବେଳେ ପିସିସି ସଭାପତି ୯ରୁ ୯୦ର ଅଙ୍କ କଷିଛନ୍ତି  । କିନ୍ତୁ ରାଜନୀତିକ ସ୍ଥିତି ଏମିତି ହୋଇଛିଯେ, ନିଜ ନିର୍ବାଚନମଣ୍ଡଳୀରେ ହିଁ ଏହି ଦୁଇ ନେତା ଏଥର ବାନ୍ଧି ହୋଇଯିବେ  । ଅନ୍ୟ ନେତାଙ୍କ ପାଇଁ ପ୍ରଚାର କରିବାକୁ ବି ସମୟ ଦେଇପାରିବେ ନାହିଁ  । ଅନ୍ୟ ନିର୍ବାଚନମଣ୍ଡଳୀରେ ଦୁଇ ସେନାପତିଙ୍କ ଅନୁପସ୍ଥିତିରେ ଦଳ କିଭଳି ପ୍ରଦର୍ଶନ କରିବ ତାହା ଉପରେ ବି ପ୍ରଶ୍ନବାଚୀ ଲାଗିବା ସ୍ୱାଭାବିକ  ।
ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ ଏଥର ହିଞ୍ଜିଳିରୁ ଲକ୍ଷେ ଭୋଟରେ ଜିତିବାକୁ ଲକ୍ଷ୍ୟ ରଖିଛନ୍ତି  । ୨୦୦୦ରୁ ଏଯାବତ ସେ ହିଞ୍ଜିଳିରୁ ୫ ଥର ଜିତି ସାରିଲେଣି  । ତେବେ ଏଥିପାଇଁ ତାଙ୍କୁ ବ୍ୟକ୍ତିଗତ ଭାବେ ପରିଶ୍ରମ କରିବାକୁ ପଡ଼େନାହିଁ  । ସେ ଦି ଚାରିଥର ପ୍ରଚାର କରୁଥିବାବେଳେ ବାକି କାର୍ଯ୍ୟ ତାଙ୍କର ପ୍ରତିନିଧି ଓ ଦଳୀୟ କର୍ମୀମାନେ କରିଥା’ନ୍ତି  । ଯାହାଫଳରେ ନବୀନ ସାରା ରାଜ୍ୟ ବୁଲି ପ୍ରଚାର କରିପାରୁଛନ୍ତି  । କିନ୍ତୁ ବିଜେପି ଓ କଂଗ୍ରେସ ମୁଖିଆଙ୍କ କ୍ଷେତ୍ରରେ ଏହାର ବ୍ୟତିକ୍ରମ ଦେଖିବାକୁ ମିଳିବ  ।
୨୦୦୪ରେ ମାତ୍ର ଗୋଟିଏ ଥର ଜିତିଥିଲେ ମନମୋହନ ସାମଲ  । ୨୦୦୯ରେ ସେ ଭଣ୍ଡାରୀପୋଖରୀରୁ ଓ ୨୦୧୪ ଏବଂ ୨୦୧୯ରେ ସେ ଚାନ୍ଦବାଲିରେ ବ୍ୟୋମକେଶ ରାୟଙ୍କ ଠାରୁ ହାରି ଯାଇଥିଲେ  । ତେଣୁ ବାରବାର ପରାଜୟ 
ବରଣ କରୁଥିବା ମନମୋହନ ଏଥର ଜିତିବା ପାଇଁ ଦିନରାତି ଏକ କରିଦେବେ  । ଚାନ୍ଦବାଲିରେ ବି ବିଜେଡ଼ିର ଟାଣୁଆ ନେତା ତଥା ଯୁବ ବିଜେଡ଼ି ସଭାପତି ବ୍ୟୋମକେଶ ରାୟ ନିର୍ବାଚନ ଲଢୁଛନ୍ତି  । ବାପିଙ୍କର ମଜବୁତ ସଂଗଠନ ରହିଥିବାରୁ ତାଙ୍କୁ ମନମୋହନ ହାଲକାରେ ନେଇପାରିବେ ନାହିଁ  । ଫଳରେ ସେ ନିର୍ବାଚନମଣ୍ଡଳୀରେ ଅଧିକ ସମୟ ରହି ପ୍ରଚାର କରିବାକୁ ବାଧ୍ୟ ହେବେ  । ଅନ୍ୟ ବିଧାୟକ ପ୍ରାର୍ଥୀଙ୍କ ପାଇଁ ପ୍ରଚାର କରିବାକୁ ସେ ସମୟ ପାଇବେ ନାହିଁ ବୋଲି କହିଲେ ଭୁଲ ହେବନାହିଁ  । ସେପଟେ ଶରତ ପଟ୍ଟନାୟକ ଦୁଇ ଦୁଇ ଥର ଲୋକସଭା ସାଂସଦ ହେବାର ସୁଯୋଗ ପାଇଛନ୍ତି  । କିନ୍ତୁ ୧୯୯୦ ଦଶକ ପରେ ସେ ବିଜୟର ସ୍ୱାଦ ଚାଖି ପାରିନାହାନ୍ତି  । ସେହିପରି ସେ କେବେବି ବିଧାନସଭା ମାଟି ମାଡ଼ି ପାରିନାହାନ୍ତି  । ଏଭଳି ସ୍ଥିତିରେ ତାଙ୍କର ଫୋକସ ନୂଆପଡ଼ା ଉପରେ ହିଁ ରହିବ  । ଆଜିକା ଦିନରେ କଂଗ୍ରେସର ସ୍ଥିତି ଯାହା ବିଶେଷ ଲାଭ ମିଳିବା ଭଳି ଲାଗୁନାହିଁ  ।ଗୋଟିଏ ପଟେ ନବୀନ ୧୪୭ ବିଧାନସଭା ଓ ୨୧ ଲୋକସଭାର ମଙ୍ଗ ଏକାକୀ ଧରିବେ  । ହାଇଟେକ ବସରେ ସେ ପ୍ରଚାର କରିବାକୁ ଯିବେ  । ସାରା ଓଡ଼ିଶାରେ ନବୀନ ଏକ ବାତାବରଣ ସୃଷ୍ଟିକରିବେ  । କିନ୍ତୁ ଅପରପକ୍ଷରେ ଦୁଇ ବିରୋଧୀ ଦଳର ମଙ୍ଗୁଆଳ ନିଜ କ୍ଷେତ୍ର ଜଗିବାକୁ ହିଁ ବାଧ୍ୟ ହେବେ  । ଉଭୟଙ୍କ ପାଇଁ ନିଶ୍ଚିତ ବିଜୟର ସମ୍ଭାବନା ନଥିବାରୁ ନିଜ ନିର୍ବାଚନମଣ୍ଡଳୀରେ ହିଁ ବାନ୍ଧି ହୋଇରହିବେ ବୋଲି କହିଲେ  ଭୁଲ ହେବନାହିଁ  ।