ରାଜେନ୍ଦ୍ରଙ୍କ ବିସ୍ଫୋରଣ, ବିଜେଡ଼ିରେ କମ୍ପନ

ଭୁବନେଶ୍ୱର : ଯଦି ମୁଁ ଦଳରେ ବିଶୃଙ୍ଖଳିତ କାମ କରିଥିବାର ପ୍ରମାଣ ମିଳିବ, ମୁଁ ନଣ୍ଡା ହେବି  । ଯେଉଁମାନେ ରାତି ପାହିଲେ ବିଶୃଙ୍ଖଳିତ କାମ କରନ୍ତି ସେମାନଙ୍କୁ ପୁରସ୍କାର ଦେଉଛନ୍ତି  । ବିଜେଡ଼ି କ’ଣ କାହାର ବୋପା ସମ୍ପତ୍ତି କି ? ବୋଲି ରାଜେନ୍ଦ୍ର ପ୍ରଶ୍ନ କରିଛନ୍ତି  । ଆମେ ବେପାରୀ ଘରର ପିଲା  । ଜିରୋରୁ ସଂଗଠନ କରି ଜିତିକି ଆସିଛୁ  । ୨୭ ବର୍ଷ ହେଲା ଜିତିକି ଆସୁଛୁ  ।  ଖୋର୍ଦ୍ଧା ମାଟିକୁ ଚରଣ ଚୁତିଆ ବୋଲି କୁହାଯାଏ  । ସାଙ୍ଗରେ ବୁଲୁଥିବା ଲୋକ ପଛପଟୁ ମାରିଦେବ  । ପୂର୍ବରୁ ବହୁ ନେତା ବାହାଦୂରୀ ମାରୁଥିଲେ  । ତମେ ଘରେ ବସିଯାଅ  । ଭୋଟ ତମ ପାଖରେ କେବେ ଥିଲା କି ? ବାହାଦୂରୀ କଥା ବନ୍ଦ କରି ବାସ୍ତବ କଥାକୁ ଯାଆନ୍ତୁ  । ଖୋର୍ଦ୍ଧା ହେଡ଼କ୍ୱାର୍ଟରରେ ବିଜେପି ସରକାର ଆସିଛି ବୋଲି ଆମ ସରପଞ୍ଚ, ସମିତିସଭ୍ୟ, ଅଧ୍ୟକ୍ଷ, କାଉନସିଲର ସବୁ ବିଜେପି ବିଧାୟକଙ୍କ ସହ ଯିବେ  । ଅପରାଜିତା ଷଡ଼ଙ୍ଗୀଙ୍କୁ ଧରି ବେଗୁନିଆ ବିଧାୟକ ଉଦଘାଟନ କାର୍ଯ୍ୟକ୍ରମକୁ ଯାଉଛନ୍ତି  । 

ବିଜେଡ଼ି କର୍ମୀ ଓ ନେତାଙ୍କୁ ଟାର୍ଗେଟ୍‌ କରି ସେ କହିଲେଯେ, ବିଜେପି ସରକାର ଆସିଛି ବୋଲି ବିଜେପି ବିଧାୟକମାନେ ଟେକି ପକାଇବେ ବୋଲି ଭାବୁଛନ୍ତି  । ତାଙ୍କୁ ଫୁଲତୋଡ଼ା ଦେଇ ନିମନ୍ତ୍ରଣ ଦେଉଛନ୍ତି  । ଆମେ ତମ ସହ ଅଛୁ ବୋଲି କହୁଛନ୍ତି  । ଏମାନେ କ’ଣ ପାଇକ ମାଟିର ନେତା  । ନିର୍ବାଚନ ପୂର୍ବରୁ ବିଜେଡ଼ି ଜିଲ୍ଲା ପରିଷଦ ସଭ୍ୟମାନେ ବିଜେପି ସହ ଯୋଗସୂତ୍ରରେ ରହିଲେ  । କାର୍ଯ୍ୟାନୁଷ୍ଠାନ ନନେଲେ ସେମାନଙ୍କର ଡର କାହିଁକି ରହିବ ? ତଥାପିବି ସେଇ ନେତାଙ୍କୁ କୋଳରେ ପୂରାଇ ରଖିଛନ୍ତି  । କାଲି ଏହାର ପ୍ରତିଫଳନ ଭୋଗିବାକୁ ପଡ଼ିବ  । ଭଗବାନ ନେଲା ବେଳେ ସବୁ ନେଇଯାଆନ୍ତି  । ଆତ୍ମସମାନ ଟିକକ ବି କାଲି ରହିବନି ବୋଲି ରାଜେନ୍ଦ୍ର କହିଛନ୍ତି  । 

ମେ’ ୨୯ ମଧ୍ୟରାତ୍ର ଷଡ଼ଯନ୍ତ୍ର କଥା ଉଠାଇ ସେ କହିଲେଯେ, ସେତେବେଳେ ଅନେକ ଚୋର, ଖଣ୍ଟ, ଡକାୟତ ଦଳକୁ ଚାଲିଆସିଲେ  । ଆମକୁ ସଫା କରିବାକୁ ବି ଉଦ୍ୟମ କରିଥିଲେ  ।  ହେଲେ ନବୀନ ବାବୁଙ୍କୁ ଭଲ ପାଇ ମୁଁ ଦଳରେ ରହିଛି  । ମୁଖ୍ୟମନ୍ତ୍ରୀଙ୍କର ଲୋକପ୍ରିୟତା ଥିଲା  । ଦଳ ବଦନାମ୍‌ ହୋଇନି, ହେଲେ ସରକାର ନାହିଁ  । ଏହା ଆମର ଦୁର୍ଭାଗ୍ୟ ବୋଲି ସେ କହିଛନ୍ତି  । ସଭ୍ୟ ସଂଗ୍ରହ ବେଳେ ନେତାମାନେ ମନଇଚ୍ଛା ନକରନ୍ତୁ  । ଜଣଙ୍କୁ ହିଁ ଦାୟିତ୍ୱ ଦିଅନ୍ତୁ  । ଯଦି ସେମିତି ନକରିବେ ତେବେ ଦଳ ଭୁଷୁଡ଼ିଯିବ ବୋଲି ସେ ଚେତାବନୀ ଦେଇଛନ୍ତି  ।