କେହି ଜଣେ ତ ଦେଖୁଛି
Rasmita Behera
ଛୋଟ କଥାର ବଡ଼ ବିଚାର "ଅମୃତ ବିନ୍ଦୁ ।' "ଅମୃତ ବିନ୍ଦୁ'ର ଆଜିର ଅଧ୍ୟାୟରେ ଆମେ ଜାଣିବା ଜୀବନରେ ଆମେ ଯାହା କରୁଛେ, ତାହା କାହାରି ନା କାହା ନଜରରେ କେମିତି ଅଛି ସେ ନେଇ କିଛି କଥା । ଆଜିର କଥାକୁ ଆପଣ ଗ୍ରହଣ କରିବେ, ବିଚାରିବେ ବୋଲି ଆଶା । ଆମ ଜୀବନ କାଳ ଭିତରେ ଆମେ ଯାହା କିଛି କରୁଛୁ ସେଥିମଧ୍ୟରୁ କିଛି କାର୍ଯ୍ୟ କେବଳ ଆମ ନିଜ ପାଇଁ ଗୋପନୀୟ । ଆଉ ଅନ୍ୟ କେହି ନଜାଣନ୍ତୁ ବୋଲି ଆମେ ଚାହୁଁ । ଅଥଚ ପ୍ରକୃତ ପକ୍ଷେ ଏ ପୃଥିବୀରେ ୮୦୦ କୋଟି ଲୋକ ଅଛନ୍ତି ଏବଂ ସେମାନଙ୍କର ୧୬୦୦ କୋଟି ଆଖି ଅଛି । ଯେତେ ଗୋପନୀୟ ଭାବରେ ଯାହାବି କରାଯାଉ, ନିଶ୍ଚିତ ରୂପେ କାହାରି ନା କାହାରି ନଜର ତା'ରି ଉପରେ ରହିଛି । ଯିଏ ଆମ ଉପରେ ନଜର ରଖିଛି ହୁଏତ ସେ ତାହା ପ୍ରକାଶ କରୁନାହିଁ , କିନ୍ତୁ ଆମର ପ୍ରତ୍ୟେକଟି କାର୍ଯ୍ୟ କାହାରି ନା କାହାରି ନଜରରେ ରହିଛି ।
ମନୁଷ୍ୟ ଜୀବନ କେବେହେଲେ ଏକୁଟିଆ ନୁହେଁ । ନିଜର ଦୁଇଟି ଆଖି ଅଛି । ଆମେ ବି ସମସ୍ତଙ୍କର କାର୍ଯ୍ୟ କଳାପ ଉପରେ ନଜର ରଖୁଛୁ । ଆମକୁ କେହି କେବେ ହେଲେ କହିନାହିଁ ଯେ ଅମୁକ ଲୋକ ଉପରେ ନଜର ରଖ । ହେଲେ ବି ଆମେ ଅନ୍ୟମାନଙ୍କ କାର୍ଯ୍ୟ କଳାପ ଉପରେ ନଜର ରଖିଥାଉ । ଆମ ବାଡିରେ ଫୁଟିଥିବା ଫୁଲ ଯେତେବେଳେ ଭୋରରୁ ଚୋରି ହୋଇଯାଏ ସେତେବେଳେ ଆମେ ହୁଏତ ଜାଣିପାରିନାହୁଁ, କିନ୍ତୁ ଆଉ କେହି ଜଣେ ଏ ଘଟଣା ଉପରେ ନଜର ରଖୁଛି । କାର୍ଯ୍ୟ ଯେତେ ଗୋପନୀୟ ହେଲେ ବି ତାହା କାହାରି ନା କାହାରି ନଜରରେ ରହିଛି । ଏପରିକି କୌଣସି ଏକ ଭିଡ଼ ଭିତରେ ଆମେ କିଛି ଗୋଟିଏ କରି ଦେଇ ଠକି ଚାଲିଯିବାକୁ ଚେଷ୍ଟା କରିଲେ ମଧ୍ୟ ଆମ ଉପରେ କେହି ଜଣେ ନଜର ରଖିଛି । କାରଣ ଭିଡ଼ ଭିତରେ ସମସ୍ତେ ନିଜ ନିଜ କାମରେ ବ୍ୟସ୍ତ ଥାନ୍ତି । କାହାରି ସମୟ ନଥାଏ ସତ । ମାତ୍ର ଇଚ୍ଛା ନଥାଇ ମଧ୍ୟ ଆମ କାର୍ଯ୍ୟ ଉପରେ ଆଉ କେହି ନଜର ରଖିଥାଏ । ନିର୍ଦ୍ଦିଷ୍ଟ ଭାବରେ ଆମ ବିଷୟରେ ଜାଣିବା ପାଇଁ ହୁଏତ କେହି ନଜର ରଖିନଥାଇପାରେ । ଅଥଚ ଅନ୍ୟମନସ୍କ ଭାବରେ ମଧ୍ୟ ଆମ କାର୍ଯ୍ୟକଳାପକୁ କେହି ଜଣେ ଦେଖୁଛି । ପଢ଼ିଥିବା ହେତୁ ଆପଣଙ୍କ ନିକଟରେ କୃତଜ୍ଞ । ଆସନ୍ତୁ ପ୍ରତ୍ୟେକ ଦିନ ଆମେ "ଅମୃତ ବିନ୍ଦୁ' ମାଧ୍ୟମରେ ଜୀବନର କେତେ କଥା ବାବଦରେ ଜାଣିବା । ନମସ୍କାର ।
