ଖୋର୍ଦ୍ଧା ରୋଡ୍ ରେଳମଣ୍ଡଳ ଦ୍ୱାରା ରେଳ କର୍ମଚାରୀ ସମ୍ମାନିତ
Rasmita Behera
ଭୁବନେଶ୍ୱର : କର୍ତ୍ତବ୍ୟ ପ୍ରତି ରେଳ କର୍ମଚାରୀ ମାନଙ୍କ ଉଲ୍ଲେଖନୀୟ ସମର୍ପଣ ଏବଂ ସତର୍କତାକୁ ସ୍ୱୀକୃତି ଦେଇ ପୂର୍ବ ତଟ ରେଳପଥ ଖୋର୍ଦ୍ଧା ରୋଡ୍ ରେଳମଣ୍ଡଳ ଦ୍ୱାରା ସାତ ଜଣ ରେଳ କର୍ମଚାରୀଙ୍କୁ ଆଜି ନିରାପଦ ଏବଂ ଦକ୍ଷ ଟ୍ରେନ୍ ପରିଚାଳନା ସୁନିଶ୍ଚିତ କରିବାରେ ସେମାନଙ୍କ ଅସାଧାରଣ ପ୍ରଦର୍ଶନ ପାଇଁ ସମ୍ମାନିତ କରାଯାଇଅଛି । ଅତିରିକ୍ତ ମଣ୍ଡଳ ରେଳବାଇ ପ୍ରବନ୍ଧକ / ଭିତ୍ତିଭୂମି ସୁଭ୍ରଜ୍ୟୋତି ମଣ୍ଡଳ ଏବଂ ଅନ୍ୟାନ୍ୟ ବରିଷ୍ଠ ଶାଖା ଅଧିକାରୀଙ୍କ ଉପସ୍ଥିତିରେ ରେଳମଣ୍ଡଳର ଅତିରିକ୍ତ ମଣ୍ଡଳ ରେଳବାଇ ପ୍ରବନ୍ଧକ (ପରିଚାଳନା) ପିକେ ବେହେରା କର୍ମଚାରୀ ମାନଙ୍କୁ ପୁରସ୍କୃତ କରିଛନ୍ତି । ନିଷ୍ଠାପର ରେଳ କର୍ମଚାରୀମାନଙ୍କ ମଧ୍ୟରେ ହୁମ୍ମା ଷ୍ଟେସନରେ କାର୍ଯ୍ୟରତ ଟ୍ରେନ ପଏଣ୍ଟସମ୍ୟାନ୍ ପ୍ରଦୁ୍ୟମ୍ନ କୁମାର ପଣ୍ଡା, କାଇପଦରରେ କାର୍ଯ୍ୟରତ ଟ୍ରେନ ପଏଣ୍ଟସମ୍ୟାନ୍ ଧୂଳିରାମ ଜେନା, ଖୋର୍ଦ୍ଧା ରୋଡ଼ ମେମୁ କାର ସେଡ୍ରେ କାର୍ଯ୍ୟରତ ସିନିୟର ଟେକ୍ନିସିଆନ୍ ଅଜୟ କୁମାର ଜେନା, ଖୋର୍ଦ୍ଧା ରୋଡ଼ ଷ୍ଟେସନରେ କାର୍ଯ୍ୟରତ ସିନିୟର ଆସିଷ୍ଟାଣ୍ଟ ଲୋକୋ ପାଇଲଟ୍ ପ୍ରକାଶ ଚନ୍ଦ୍ର ଦଳବେହେରା, ଜୋରନ୍ଦା ରୋଡ୍ରେ କାର୍ଯ୍ୟରତ କି-ମ୍ୟାନ ବିଜୟ କୁମାର ବେହେରା, କେନ୍ଦୁଆପଦାରେ ଟ୍ରାକ୍ ମେଣ୍ଟେନାର୍-ଓଠ ଭାବେ କାର୍ଯ୍ୟରତ ଷ୍ଟାଲିନ୍ ଦାସ ଓ ଟ୍ରାକ୍ ମେଣ୍ଟେନାର୍ ମିହିର କୁମାର ରାଉତଙ୍କୁ ସେମାନଙ୍କର ତତ୍ତ୍ୱାବଧାନରେ ଟ୍ରେନଗୁଡ଼ିକର ସୁଗମ ଏବଂ ସୁରକ୍ଷିତ ପରିଚାଳନା ସୁନିଶ୍ଚିତ କରିବା ପାଇଁ ସେମାନଙ୍କର ତ୍ୱରିତ ଚିନ୍ତାଧାରା ଏବଂ ସକ୍ରିୟ କାର୍ଯ୍ୟ ପାଇଁ ପ୍ରଶଂସା କରାଯାଇଥିଲା । ପୁରସ୍କାରପ୍ରାପ୍ତ ବ୍ୟକ୍ତିମାନଙ୍କୁ ପ୍ରଶଂସା କରି ଶ୍ରୀ ବେହରା କହିଛନ୍ତି ଟ୍ରାକ୍ ମେଣ୍ଟେନର୍, ଲୋକୋ ପାଇଲଟ୍, ଟେକ୍ନିସିଆନ୍ ଏବଂ ପଏଣ୍ଟମ୍ୟାନ୍ ସମେତ ଆମର ଆଗଧାଡ଼ିର କର୍ମଚାରୀମାନେ ଆମ କାର୍ଯ୍ୟର ମେରୁଦଣ୍ଡ ଅଟନ୍ତି । ସେମାନଙ୍କର ସତର୍କତା, ପ୍ରତିବଦ୍ଧତା ଏବଂ ମାନସିକତାର ଉପସ୍ଥିତି ରେଳ ନେଟୱାର୍କକୁ ସୁରକ୍ଷିତ ଏବଂ ନିର୍ଭରଯୋଗ୍ୟ ରଖିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି ।
