ଗାଁକୁ ପଶିଲା ହାତୀ ଛୁଆ, ଦଳରେ ମିଶି ନପାରିବାରୁ ଜଗିଛି ବନ ବିଭାଗ
Rasmita Behera
।ା ପ୍ରଭାନୁ୍ୟଜ ।ା କେନ୍ଦୁଝର : ଚମ୍ପୁଆ ରେଞ୍ଜ ବାମେବାରୀ ସେକ୍ସନ ଜଗଦଳା ଡ୍ୟାମ ନିକଟ ଗଡୁଆତୋପା ତେଲଭଙ୍ଗା ସାହି ଗ୍ରାମ ଭିତରେ ଶୁକ୍ରବାର ବିଳମ୍ବିତ ରାତିରେ ଏକ ହାତୀ ଛୁଆ ବାଟବଣା ହୋଇ ଗାଁ ଭିତରେ ପଶି ଆସିଛି । ୧୩ ଟିକିଆ ହାତୀ ପଲ ଗଡୁଆତୋପା ମହାନ୍ତ ସାହି ଆଡୁ ଜଗଦଳା କେନାଲ ପାର କରି ନିକଟସ୍ଥ ଜଙ୍ଗଲକୁ ଫେରୁଥିଲେ । ଏହି ସମୟରେ ଏକ ଅଣ୍ଡିରା ହାତୀ ଛୁଆ କେନାଲ ଭିତରେ ପଡି ଯାଇଥିଲା । ପରେ ହାତୀ ଛୁଆ ଦଳରୁ ଅଲଗା ହୋଇ ଗାଁରେ ଭିତରେ ଜଣଙ୍କ ଘର ଭିତରେ ପଶି ଯାଇଥିଲା । ଆଜି ସକାଳେ ହାତୀ ଛୁଆକୁ ଦେଖିବାକୁ ଲୋକଙ୍କ ଭିଡ ହୋଇଥିଲା । ଅଣ୍ଡିରା ଛୁଆ ହାତୀର ବୟସ ୩ ରୁ ୪ ହେବ ବୋଲି ଜଣାପଡିଛି । ସଦର ରେଞ୍ଜ ଏବଂ ଚମ୍ପୁଆ ରେଞ୍ଜର ବନ କର୍ମଚାରୀ ଘଟଣା ସ୍ଥଳରେ ପହଁଚି ହାତୀ ଛୁଆକୁ ନିକଟସ୍ଥ ମଲଦା ଜଙ୍ଗଲରେ ଥିବା ହାତୀ ପଲ ସହ ମିଶାଇଥିଲେ । ହାତୀ ଦଳ ସହ ୨ କିଲୋମିଟର ପର୍ଯ୍ୟନ୍ତ ହାତୀ ଛୁଆ ଯିବା ପରେ ଜଙ୍ଗଲରେ ତାକୁ ଛାଡି ପଲାଇଥିଲେ । ହାତୀ ଛୁଆ ଦଳରେ ନ ମିଶିବାରୁ ବନ ବିଭାଗ ଜଙ୍ଗଲରେ ଜଗି ରହିଛି । ଯଦି ଦଳରେ ନ ମିଶିଲେ ଆସନ୍ତାକାଲି ହାତୀ ଛୁଆକୁ ଉଦ୍ଧାର କରି ନନ୍ଦନକାନନ ପ୍ରାଣୀ ଉଦ୍ୟାନକୁ ପଠାଯିବ ବୋଲି ଜଣାପଡିଛି ।
