ଛାତ ଭୁଶୁଡି ଜଣେ ମୃତ, ୧ ଗୁରୁତର
Rasmita Behera
ନବରଙ୍ଗପୁର/ ଡାବୁଗାଁ: ନବରଙ୍ଗପୁର ଜିଲା ଡାବୁଗାଁ ବ୍ଲକ ସଦର ହାଟପଦା ସାହିରେ ପରିତ୍ୟକ୍ତ ଗୃହର ଛାତ ଭୁଷୁଡି ୧ ନାବାଳକଙ୍କ ମୃତୁ୍ୟ ହୋଇଥିବା ବେଳେ ଜଣେ ନାବାଳକ ଆହତ ହୋଇଛନ୍ତି । ଡାବୁଗାଁ ସଦର ମହକୁମା ହାଟପଦା ସାହିର ମହେଶ୍ୱର ଗୌଡ (୧୨) ଓ ଉମା ଜାନୀ (୧୦) ଆଜି ସକାଳୁ ହାଟପଦା ସାହିରେ ଥିବା ମୋବାଇଲ ଟାୱାର ପରିସରରେ ଥିବା ପରିତ୍ୟକ୍ତ ଜଗୁଆଳି ଘରକୁ କଂକ୍ରିଟ ଝରକାର ଲୁହା ରଡ଼ ବାହାର କରିବାକୁ ଯାଇଥିବା ବେଳେ ହଠାତ ଗୃହ ଛାତ ଭୁଷୁଡି ପଡିଥିଲା । ଯାହାଦ୍ୱାରା ମହେଶ୍ୱର ଗୌଡ ସଂପୂର୍ଣ୍ଣ ଚାପି ହୋଇଯାଇଥିଲେ । ଉମାଜାନୀଙ୍କ ୨ଟି ଗୋଡ ଚାପି ହୋଇଯାଇଥିଲା । ଛାତ ଭୁଷୁଡି ପରେ ପିଲାଟିର ପାଟି ଶୁଣି କିଛି ଲୋକ ଯାଇ ଦେଖିଥିଲେ ଯେ ପିଲାମାନେ ଚାପି ହୋଇଯାଇଛନ୍ତି । ସଙ୍ଗେ ସଙ୍ଗେ ଲୋକେ ଅଗ୍ନିଶମ କେନ୍ଦ୍ରକୁ ଖବର ଦେବା ସହ ପୁଲିସକୁ ଖବର ଦେଇଥିଲେ । ଖବରପାଇ ଅଗ୍ନିସମ କେନ୍ଦ୍ର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ୨ ଜଣ ନାବାଳକଙ୍କୁ ଉଦ୍ଧାର କରି ଡାବୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ଡାକ୍ତର ନାବାଳକ ମହେଶ୍ୱର ଗୌଡଙ୍କୁ ମୃତ ଘୋଷଣା କରିଥିଲେ । ନାବାଳକ ଉମା ଜାନୀଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ନବରଙ୍ଗପୁର ଜିଲା ମୁଖ୍ୟ ଚିକିସôାଳୟକୁ ସ୍ଥାନାନ୍ତର କରାଯାଥିଲା । ପରେ ଡାବୁଗାଁ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ । ଏନେଇ ମୃତଙ୍କ ପିତା ଲଛମନ ଗୌଡ ଡାବୁଗାଁ ଥାନାରେ ଏତଲା ଦେଇଥିଲେ । ଉକ୍ତ ଏତଲାକୁ ଭିତ୍ତି କରି ପୁଲିସ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲେ ।
