ଧଳାଜହର ବିକ୍ରି ବେଳେ ୨ ବେପାରୀଙ୍କୁ ଧରିଲା ପୁଲିସ
Jitendra Sahu
ଭୁବନେଶ୍ୱର, ୮ା୫ : କାରରେ ଆସି ମୈତ୍ରୀବିହାର ଥାନା ଅଧିନ ଏକାମ୍ରବିହାର ବଲ ପଡ଼ିଆରେ ଧଳାଜହର ବିକ୍ରି ବେଳେ ଖବର ପାଇ ୨ ଜଣ ବେପାରୀଙ୍କୁ ଧରିଲା ଥାନାର ସ୍ପେଶାଲ ସ୍କ୍ୱାଡ୍ । ସେମାନଙ୍କ ଠାରୁ ଏକ ଇଣ୍ଡିଗୋ କାର, ୨ଟି ମୋବାଇଲ ଓ ୯ ଗ୍ରାମ ବ୍ରାଉନସୁଗାର ଜବତ କରାଯାଇଛି । ଗିରଫ ୨ ଅଭିଯୁକ୍ତ ହେଲେ, ପୁରୀ ଜିଲ୍ଲା ପିପିଲି ଅଞ୍ଚଳର ପ୍ରଭାତ କୁମାର ସାହୁ ଓ ନୟାଗଡ଼ ଜିଲ୍ଲାର ବସନ୍ତ କୁମାର ସାହୁ । ଏଠାରେ ଏମାନେ ସାଲିଆସାହିରେ ରହି ପିପିଲିରୁ ବ୍ରାଉନସୁଗାର ଆଣି ଏଠାରେ ବିକ୍ରି କରୁଥିଲେ । ଆଜି ୨ ଜଣଙ୍କୁ ଏନଡିପିଏସ୍ ଆକ୍ଟରେ କୋର୍ଟ ଚାଲାଣ କରାଯାଇଛି ।
ସୂଚନାଯୋଗ୍ୟଯେ, ଏକ ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଆଧାରରେ ମୈତ୍ରୀବିହାର ଥାନାଧିକାରୀଙ୍କ ନିଦେ୍ର୍ଧଶ କ୍ରମେ ଥାନାର ଏକ ସ୍ପେଶାଲ ଟିମ ଏକାମ୍ରବିହାର ବଲ ପଡ଼ିଆ ନିକଟରେ ଅତର୍କିତ ଚଢ଼ାଉ କରି କାର ଭିତରେ ବସି ବେଆଇନ୍ ବ୍ରାଉନସୁଗାର ବିକ୍ରି କରୁଥିବା ଅଭିଯୋଗରେ ୨ ଜଣ ଅଭିଯୁକ୍ତଙ୍କୁ କାବୁ କରିବାରେ ସକ୍ଷମ ହୋଇଥିଲେ । ଛାନଭିନ୍ ସମୟରେ ପୁଲିସ ଦୁଇ ଅଭିଯୁକ୍ତଙ୍କ ନିକଟରୁ ମୋଟ ୯ ଗ୍ରାମ ବ୍ରାଉନସୁଗାର ଜବତ କରିଥିଲେ । ପଚରା ଉଚରା ବେଳେ ଅଭିଯୁକ୍ତ ମାନେ ଏହି ବ୍ରାଉନସୁଗାରକୁ ପିପିଲି ଅଞ୍ଚଳରୁ ସଂଗ୍ରହ କରି ଆଣି ଏଠାରେ ବ୍ୟବସାୟ କରୁଥିବା ପୁଲିସ ଆଗରେ ମାନିଥିଲେ ।
