ପୋଷ୍ଟ ଅଫିସ ସାମ୍ନାରେ ଅଲୋଡ଼ା ପୋଷ୍ଟ ବକ୍ସ
Rasmita Behera
ବ୍ରହ୍ମବରଦା : ଆଧୁନିକ ଯୁଗରେ ମୋବାଇଲ ଲୋକଙ୍କ ଭାବର ଆଦାନପ୍ରଦାନର ମାଧ୍ୟମ ସାଜିଥିଲେ ମଧ୍ୟ ଚିଠି ତାର ମହତ୍ତ୍ୱ୍ୱ ହରାଇନାହିଁ । କିନ୍ତୁ ଚିଠି ପଠାଇବାର ପ୍ରମୁଖ ମାଧ୍ୟମ ଥିବା ପୋଷ୍ଟ ବକ୍ସ ଏବେ ସମସ୍ତଙ୍କ ପାଇ ଅଲୋଡା ହୋଇପଡିଥିବା ଅନୁଭୂତ ହୋଇଛି । ଏମିତି ଏକ ଦୃଶ୍ୟ ଦେଖିବାକୁ ମିଳିଛି ରସୁଲପୁର ବ୍ଲକ ବ୍ରହ୍ମବରଦା ପୋଷ୍ଟ ଅଫିସ ସମ୍ମୁଖରେ ଥିବା ପୋଷ୍ଟବକ୍ସ କ୍ଷେତ୍ରରେ । ଏଠାରେ ପୋଷ୍ଟ ଅଫିସ ସାମ୍ନାରେ ଥିବା ପୋଷ୍ଟ ବକ୍ସଟି ଭାଙ୍ଗିରୁଜି ଯିବା ସହ ତା ଭିତରେ ମାଟି ଚଢିଗଲାଣି । ପୋଷ୍ଟ ବକ୍ସରେ ଲାଗିଥିବା ତାଲାଟି ଭାଙ୍ଗିଯାଇ ପୋଷ୍ଟବକ୍ସର ଡୋରଟି ପଦାକୁ ଝୁଲି ରହିଛି । ଫଳରେ ଲୋକମାନେ ସେଠାରେ ଚିଠି ପକାଇ ନପାରି ନାନା ହଇରାଣ ହରକତ ହେଉଛନ୍ତି । ପୋଷ୍ଟ ଅଫିସ ସାମ୍ନାରେ ଉକ୍ତ ପୋଷ୍ଟ ବକ୍ସଟି ଥିଲେ ମଧ୍ୟ ପୋଷ୍ଟ ଅଫିସର କର୍ମଚାରୀ ମାନଙ୍କର ଏହା ଦୃଷ୍ଟି ଗୋଚର ହେଉନାହିଁ । ଗୋଟେ ପ୍ରକାରରେ କହିବାକୁ ଗଲେ ସେମାନେ ଏଠାରୁ ସମ୍ପୂର୍ଣ୍ଣ ନଜର ହଟାଇ ଦେଇଛନ୍ତି । ତାଛଡା ଅନାବନା ଗଛଲତା ଦ୍ୱାରା ପୋଷ୍ଟ ବକ୍ସଟି ଏବେ ଲୋକଙ୍କ ଦୃଷ୍ଟି ଆଢୁଆଳରେ ରହି କୌଣସି କାମରେ ଲାଗୁନି । ଉକ୍ତ ପୋଷ୍ଟ ବକ୍ସକୁ ଦେଖିଲେ ଲାଗୁଚି କି ବହୁଦିନ ତାହା ବ୍ୟବହାର ନ ହୋଇ ଏମିତି ଦୟନୀୟ ଅବସ୍ଥାରେ ପଡିରହିଛି । ବିଭାଗୀୟ ଅଧିକାରୀମାନଙ୍କ ରକ୍ଷଣାବେକ୍ଷଣ ଅଭାବରୁ ପୋଷ୍ଟ ବକ୍ସଟି ଏମିତି ଜରାଜୀର୍ଣ୍ଣ ଅବସ୍ଥାରେ ପଡିରହିଥିବା ଅଭିଯୋଗ ହୋଇଛି । ଗୋଟେ ପ୍ରକାରରେ କହିବାକୁ ଗଲେ ପୋଷ୍ଟ ଅଫିସ ସାମ୍ନାରେ ଥାଇ ମଧ୍ୟ ପୋଷ୍ଟବକ୍ସଟି ଏବେ ସମସ୍ତଙ୍କ ପାଇଁ ଅଲୋଡା ହୋଇପଡିଛି । ତେଣୁ ସର୍ବସାଧାରଣ ଲୋକଙ୍କ ବ୍ୟବହାର ପାଇଁ ଉକ୍ତ ପୋଷ୍ଟବକ୍ସକୁ ତୁରନ୍ତ ମରାମତି କରିବାକୁ ଗ୍ରାମବାସୀ ଦାବି କରିଛନ୍ତି ।
