ଭାରତର ସ୍ୱାର୍ଥକୁ ବନ୍ଧା ପକାଇବା କଂଗ୍ରେସର ଅଭ୍ୟାସ : ମୋଦି

ାା ଏଜେନ୍ସି ।ା ନୂଆଦିଲ୍ଲୀ : ଅପରେସନ୍ ସିନ୍ଦୂର ନେଇ ଆଜି ଲୋକସଭାରେ କଂଗ୍ରେସ ଓ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ କଡ଼ା ଜବାବ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି  । ଦେଶର ସୁରକ୍ଷା ନେଇ କଂଗ୍ରେସ ହିଁ ସବୁବେଳେ ସାଲିସ୍ କରିଆସୁଛି  । ନେହେରୁଙ୍କ ଠାରୁ ନେଇ ମନମୋହନ ସିଂହଙ୍କ ପର୍ଯ୍ୟନ୍ତ ଅନେକ ଘଟଣାର ଅବତାରଣା କରି ମୋଦି ବର୍ଷିଥିଲେ  ।
ଲୋକସଭାରେ ମୋଦି କହିଥିଲେଯେ, ଆତଙ୍କବାଦୀଙ୍କୁ ଛାଡ଼ିବୁ ନାହିଁ କି ଆତଙ୍କବାଦୀଙ୍କୁ ସମର୍ଥନ ଓ ସହଯୋଗ କରୁଥିବା ଲୋକଙ୍କୁ ଆମେ ଛାଡ଼ିବୁ ନାହିଁ  । ଏହା ଆମର ସଂକଳ୍ପ  । ଓପି ସିନ୍ଦୂରକୁ ଅଟକାଇବା ପାଇଁ ବିଶ୍ୱର କୌଣସି ନେତା ଭାରତକୁ କହିନାହାନ୍ତି  । ପାକିସ୍ତାନ ପ୍ରବଳ କ୍ଷତିଗ୍ରସ୍ତ ହେବାପରେ ପାକ୍ ଡିଜିଏମଓ ଅସ୍ତ୍ରବିରତି ପାଇଁ ଅନୁରୋଧ କରିଥିଲେ  । ଆମକୁ ଆଉ ଆକ୍ରମଣ କରନ୍ତୁନାହିଁ ବୋଲି ନିବେଦନ କରିଥିଲା ପାକିସ୍ତାନ  । ମେ’ ୯ ରାତିରେ ଆମେରିକାର ଉପରାଷ୍ଟ୍ରପତି ଜେଡ଼ି ଭାନ୍ସ ମୋ ସହ କଥା ହେବାକୁ ୩ରୁ ୪ ଥର ଉଦ୍ୟମ କରିଥିଲେ  । ହେଲେ ମୁଁ ସେତେବେଳେ ଆମର ସେନା ଅଧିକାରୀଙ୍କ ସହ ଆଲୋଚନାରେ ବ୍ୟସ୍ତ ଥିଲି  । ମୁଁ ପରେ ଆମେରିକାର ଉପରାଷ୍ଟ୍ରପତିଙ୍କ ସହ କଥାହେବାବେଳେ ସେ କହିଥିଲେଯେ, ଆମେରିକା ବଡ଼ ଧରଣର ଆକ୍ରମଣ ପାଇଁ ପ୍ରସ୍ତୁତ ହେଉଛି  । ସେ ସତର୍କ କରାଇଥିଲେ  । କିନ୍ତୁ ମୁଁ ତାଙ୍କୁ କହିଥିଲିଯେ, ଆମର ଜବାବ ବି ଶକ୍ତିଶାଳୀ ହେବ  । ସେ ବୁଲେଟ୍ ମାରିଲେ ଆମେ ତୋପ ମାରିବୁ ବୋଲି ମୋଦି କହିଥିଲେ  ।  କଂଗ୍ରେସକୁ ଟାର୍ଗେଟ୍ କରି ମୋଦି କହିଲେଯେ, ସିନ୍ଦୁ ଜଳ ଚୁକ୍ତି ନେହେରୁଙ୍କର ଦେଶପ୍ରତି ବିଶ୍ୱାସଘାତକତା ଥିଲା  । ପ୍ରଧାନମନ୍ତ୍ରୀ ଥିବାବେଳେ ନେହେରୁ ହିଁ ପାକିସ୍ତାନକୁ ୮୦% ଜଳ ଦେବା ପାଇଁ ରାଜି ହୋଇଥିଲେ  । ଭାରତର ସ୍ୱାର୍ଥକୁ ବନ୍ଧା ପକାଇବା କଂଗ୍ରେସର ଦୀର୍ଘଦିନର ଅଭ୍ୟାସ  । ସିନ୍ଧୁନଦୀ ଆମ ଭାରତର ସଭ୍ୟତା ସହ ଜଡ଼ିତ  । ଏହାର ୮୦% ଜଳ ପାକକୁ ଦେବାର ମାନସିକତାକୁ କ’ଣ କୁହାଯିବ ବୋଲି ସେ ପ୍ରଶ୍ନ କରିଥିଲେ  । ନେହେରୁ ଯେଉଁ ଭୁଲ୍ କରିଥିଲେ ଆମେ ତାହାକୁ ସଂଶୋଧନ କରିଛୁ ବୋଲି ସେ କହିଥିଲେ  । ସେହିପରି ସେନା ଉପରେ ନକରାତ୍ମକ ଟିପ୍ପଣୀ ଦେବା କଂଗ୍ରେସର ଅଭ୍ୟାସ  । ୨୦୧୭ରେ ଆମ ସେନା ସର୍ଜିକାଲ ଷ୍ଟ୍ରାଇକ୍ କଲା  । ଉରି ଆକ୍ରମଣ ପରେ ଭାରତ ପ୍ରତିଶୋଧ ନେଲା  । ସେତେବେଳେ କଂଗ୍ରେସ ତାହାର ପ୍ରମାଣ ମାଗିଥିଲା  । ଏବେ ଆମେ କାରଗିଲ ବିଜୟ ଦିବସ ପାଳନ କଲୁ  । ହେଲେ କଂଗ୍ରେସ କାରଗିଲ୍ ବିଜୟକୁ ବି ଗ୍ରହଣ କରୁନଥିଲା  । ଉପା ସରକାରଙ୍କ ସମୟରେ ଏହି ବିଜୟ ଦିବସ ପାଳନ କରାଯାଉନଥିଲା  । ୨୦୧୯ ବାଲାକୋଟ ଏୟାର ଷ୍ଟ୍ରାଇକ୍ ବେଳେ ବି କଂଗ୍ରେସ ପ୍ରମାଣ ମାଗିଥିଲା  । ପୁଲୱାମା ଆକ୍ରମଣ ପରେ ଆତଙ୍କବାଦୀଙ୍କ ଉପରେ ଭାରତ ଏଭଳି ଷ୍ଟ୍ରାଇକ୍ କରିଥିଲା  । ଏୟାର ଫୋର୍ସ ପାଇଲଟ ଅଭିନନ୍ଦନଙ୍କୁ ପାକିସ୍ତାନ ଧରିବା ପରେ ସେମାନେ ଉତ୍ସବ ମନାଇଥିଲେ  । ଆମ ଦେଶରେ ବି ଦଳେ ମୋଦି ଫସିଗଲା ବୋଲି କହି ଖୁସି ହୋଇଥିଲେ  । କିନ୍ତୁ ଅଭିନନ୍ଦନ ଗର୍ବ ସହକାରେ ପୂର୍ଣ୍ଣ ସମ୍ମାନରେ ଭାରତ ଫେରିଥିଲେ ବୋଲି ମୋଦି କହିଥିଲେ  ।