ମୋଦି-ଷ୍ଟାରମର ଆଲୋଚନା : ‘ଭାରତ ହେବ ତୃତୀୟ ଆର୍ଥିକ ମହାଶକ୍ତି’

• ଭାରତକୁ ମିଶାଇଲ୍‌ ଦେବ ବ୍ରିଟେନ୍‌
• ୪୬୮ ନିୟୁତ ଡଲାରର ଚୁକ୍ତି

ନୂଆଦିଲ୍ଲୀ : ଆମେରିକା ରାଷ୍ଟ୍ରପତି ଡୋନାଲଡ଼ ଟ୍ରମ୍ପ ଭାରତର ଅର୍ଥନୀତିକୁ ମୃତ ଅର୍ଥନୀତି ବୋଲି କହିଥିବାବେଳେ ଆଜି ପରୋକ୍ଷରେ ବ୍ରିଟେନ ପ୍ରଧାନମନ୍ତ୍ରୀ ସାର କିର ଷ୍ଟାରମର ତାଙ୍କୁ ଭୁଲ୍‌ ପ୍ରମାଣିତ କରିଛନ୍ତି । ସେ କହିଛନ୍ତିଯେ, ୨୦୨୮ ସୁଦ୍ଧା ଭାରତ ବିଶ୍ୱର ତୃତୀୟ ଆର୍ଥିକ ମହାଶକ୍ତି ହେବ । ସେହିପରି ଭାରତକୁ ବ୍ରିଟେନ୍‌ ଅତ୍ୟାଧୁନିକ ମିଶାଇଲ୍‌ ଯୋଗାଇବ । ଏଥିପାଇଁ ୪୬୮ ନିୟୁତ ଡଲାରର ଚୁକ୍ତି ହୋଇଛି ।

ସୂଚନାଯୋଗ୍ୟଯେ, ବ୍ରିଟେନର ପ୍ରଧାନମନ୍ତ୍ରୀ ସାର୍‌ କୀର ଷ୍ଟାରମରଙ୍କ ସହ ବ୍ୟବସାୟ ଓ ବାଣିଜ୍ୟ ରାଷ୍ଟ୍ର ସଚିବ ସାଂସଦ ପିଟର କାଇଲ, ସ୍କଟଲ୍ୟାଣ୍ଡ ରାଷ୍ଟ୍ର ସଚିବ ତଥା ସାଂସଦ ଡଗ୍ଲସ୍‌ ଆଲେକଜାଣ୍ଡର, ନିବେଶ ମନ୍ତ୍ରୀ ଜେସନ ଷ୍ଟକ୍‌ଉଡଙ୍କ ସହ ୧୨୫ ଜଣ ପ୍ରମୁଖ ସିଇଓ, ଉଦ୍ୟୋଗୀ, ବିଶ୍ୱବିଦ୍ୟାଳୟର କୁଳପତି ଓ ସାଂସ୍କୃତିକ ନେତୃବୃନ୍ଦ ଯୋଗ ଦେଇଥିଲେ । ପ୍ରଧାନମନ୍ତ୍ରୀ ଷ୍ଟାରମରଙ୍କ ଏହା ଥିଲା ପ୍ରଥମ ସରକାରୀ ଭାରତ ଗସ୍ତ । ଏହି ଗସ୍ତ ୨୩-୨୪ ଜୁଲାଇ, ୨୦୨୫ରେ ଭାରତର ପ୍ରଧାନମନ୍ତ୍ରୀଙ୍କ ବ୍ରିଟେନ ଗସ୍ତ ପରେ ହୋଇଛି, ଯେଉଁଥିରେ ଉଭୟ ପକ୍ଷ ଐତିହାସିକ ଭାରତ-ବ୍ରିଟେନ ବ୍ୟାପକ ଅର୍ଥନୈତିକ ଏବଂ ବାଣିଜ୍ୟ ଚୁକ୍ତିନାମା (ସିଇଟିଏ) ସ୍ୱାକ୍ଷର କରିଥିଲେ । ଭାରତ-ବ୍ରିଟେନ ଭିଜନ ୨୦୩୫ ଏବଂ ଏକ ପ୍ରତିରକ୍ଷା ଶିଳ୍ପ ରୋଡମ୍ୟାପ ଗ୍ରହଣ କରିଥିଲେ । ଭାରତ-ବ୍ରିଟେନ ଶିଖର ସମ୍ମିଳନୀ ଅବସରରେ ମୁମ୍ବାଇରେ ସିଇଓ ଫୋରମର ବୈଠକକୁ ପ୍ରଧାନମନ୍ତ୍ରୀମାନେ ସ୍ୱାଗତ କରିଥିଲେ । ଉଭୟ ନେତା ଭାରତ-ବ୍ରିଟେନ ବ୍ୟାପକ ଅର୍ଥନୈତିକ ଏବଂ ବାଣିଜ୍ୟ ରାଜିନାମାର ଅନୁମୋଦନକୁ ଯଥାଶୀଘ୍ର ସୁଧାରିବାକୁ ଆଶା ବ୍ୟକ୍ତ କରିଥିଲେ । ପ୍ରଧାନମନ୍ତ୍ରୀମାନେ ମିଳିତ ଅର୍ଥନୈତିକ ଏବଂ ବାଣିଜ୍ୟ କମିଟି (ଜେଟକୋ)ର ପୁନଃସ୍ଥାପନକୁ ମଧ୍ୟ ସ୍ୱାଗତ କରିଥିଲେ । ଉଭୟ ପକ୍ଷ ବିମାନ ଚଳାଚଳ ସମ୍ବନ୍ଧୀୟ ଅନ୍ୟାନ୍ୟ ପ୍ରସଙ୍ଗ ସହିତ ଭାରତ-ବ୍ରିଟେନ ବିମାନ ସେବା ରାଜିନାମାର ନବୀକରଣ ଉପରେ ଆଲୋଚନା କରିଥିଲେ । ଐତିହାସିକ ପ୍ରଯୁକ୍ତି ସୁରକ୍ଷା ପଦକ୍ଷେପ (ଟି. ଏସ୍‌. ଆଇ.) କୁ ଆଧାର କରି ଉଭୟ ନେତା ଦୂରସଞ୍ଚାର, ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥ, କୃତ୍ରିମ ବୁଦ୍ଧିମତ୍ତା ଏବଂ ସ୍ୱାସ୍ଥ୍ୟ ପ୍ରଯୁକ୍ତି ସମେତ ଗୁରୁତ୍ୱପୂର୍ଣ୍ଣ ଏବଂ ଉଦୀୟମାନ ପ୍ରଯୁକ୍ତିବିଦ୍ୟାରେ ହୋଇଥିବା ବାସ୍ତବ ପ୍ରଗତିକୁ ସ୍ୱାଗତ କରିଥିଲେ । ଆର୍ଟିଫିସିଆଲ ଇଣ୍ଟେଲିଜେନ୍ସ ନେଟୱାର୍କର ବିକାଶ ପାଇଁ ପ୍ରଥମ ପର୍ଯ୍ୟାୟରେ ଅତି କମରେ ୨୪ ନିୟୁତ ପାଉଣ୍ଡ ମିଳିତ ପାଣ୍ଠି ପ୍ରଦାନ କରାଯିବ । ବ୍ରିଟେନ-ଭାରତ ଗୁରୁତ୍ୱପୂର୍ଣ୍ଣ ଖଣିଜ ଯୋଗାଣ ଶୃଙ୍ଖଳା ପର୍ଯ୍ୟବେକ୍ଷଣର ଦ୍ୱିତୀୟ ପର୍ଯ୍ୟାୟରେ ନୂତନ ଦ୍ୱିପାକ୍ଷିକ ନିବେଶ ସୁଯୋଗ ସୃଷ୍ଟି କରିବା ଏବଂ ଆଇ.ଆଇ.ଟି.-ଆଇ.ଏସ୍‌.ଏମ୍‌. ଧାନବାଦରେ ଏକ ନୂତନ ସାଟେଲାଇଟ୍‌ କ୍ୟାମ୍ପସ୍‌ ପ୍ରତିଷ୍ଠା କରିବାକୁ ପ୍ରସ୍ତାବ ରହିଥିଲା । ଜୈବିକ ପ୍ରଯୁକ୍ତିକୁ ଆଗକୁ ବଢାଇବା ପାଇଁ ଏମଓୟୁ ହୋଇଥିଲା । ପ୍ରଧାନମନ୍ତ୍ରୀ ମୋଦୀ ବ୍ରିଟେନର କ୍ୟାରିଅର ଷ୍ଟ୍ରାଇକ୍‌ ଗ୍ରୁପ୍ର ଭାରତୀୟ ନୌସେନା ସହିତ ରୟାଲ ନେଭିର ସମରାଭ୍ୟାସ ‘କୋଙ୍କଣ’କୁ ସ୍ୱାଗତ କରିଥିଲେ । ଉଭୟ ପକ୍ଷ ଆଞ୍ଚଳିକ ସାମୁଦ୍ରିକ ସୁରକ୍ଷା ଉତ୍କର୍ଷ କେନ୍ଦ୍ର (ଆରଏମଏସସିଇ) ପ୍ରତିଷ୍ଠା ସମେତ ଭାରତ-ପ୍ରଶାନ୍ତ ମହାସାଗରରେ ଦୃଢ ସାମୁଦ୍ରିକ ସୁରକ୍ଷା ସହଯୋଗ ପାଇଁ ପ୍ରତିଶ୍ରୁତିବଦ୍ଧ । ଆତଙ୍କବାଦ ପ୍ରତି ଶୂନ୍ୟ ସହନଶୀଳତା ଏବଂ ମିଳିତ ଜାତିସଂଘର ସନନ୍ଦ ଏବଂ ଆନ୍ତର୍ଜାତୀୟ ଆଇନ ଅନୁଯାୟୀ ବ୍ୟାପକ ଏବଂ ନିରନ୍ତର ଭାବରେ ଆତଙ୍କବାଦର ମୁକାବିଲା ପାଇଁ ମିଳିତ ଆନ୍ତର୍ଜାତୀୟ ପ୍ରୟାସ ଲାଗି ସେମାନେ ଆହ୍ୱାନ କରିଥିଲେ । ଜାମ୍ମୁ-କାଶ୍ମୀରର ପହଲଗାମରେ ୨୦୨୫ ଏପ୍ରିଲରେ ହୋଇଥିବା ଆତଙ୍କବାଦୀ ଆକ୍ରମଣକୁ ସେମାନେ କଠୋର ଶବ୍ଦରେ ନିନ୍ଦା କରିଥିଲେ  । ଜଳବାୟୁ ପ୍ରଯୁକ୍ତି ଷ୍ଟାର୍ଟ-ଅପ ପାଣ୍ଠିରେ ଏକ ନୂତନ ମିଳିତ ନିବେଶ ଘୋଷଣା କରିଥିଲେ । ଦୁଇ ପ୍ରଧାନମନ୍ତ୍ରୀ ମିଳିତ ଜାତିସଂଘର ସନନ୍ଦ ସମେତ ଆନ୍ତର୍ଜାତୀୟ ଆଇନ ଅନୁଯାୟୀ, ୟୁକ୍ରେନରେ ନ୍ୟାୟସଙ୍ଗତ ଏବଂ ସ୍ଥାୟୀ ଶାନ୍ତି ପାଇଁ ସମର୍ଥନ ବ୍ୟକ୍ତ କରିଥିଲେ । ସେମାନେ ମଧ୍ୟପ୍ରାଚ୍ୟରେ ଶାନ୍ତି ଏବଂ ସ୍ଥିରତା ପାଇଁ ସେମାନଙ୍କର ପ୍ରତିବଦ୍ଧତାକୁ ଦୋହରାଇଥିଲେ । ପ୍ରଧାନମନ୍ତ୍ରୀ ଷ୍ଟାରମର ତାଙ୍କୁ ଏବଂ ତାଙ୍କ ପ୍ରତିନିଧିମଣ୍ଡଳର ସଦସ୍ୟମାନଙ୍କୁ ଦିଆଯାଇଥିବା ଭବ୍ୟ ଆତିଥ୍ୟ ପାଇଁ ପ୍ରଧାନମନ୍ତ୍ରୀ ମୋଦୀଙ୍କୁ ଧନ୍ୟବାଦ ଜଣାଇଥିଲେ ।