ମୋଦିଙ୍କ ପ୍ରେମରେ ନବୀନ; ଡର ନା ସେଟିଂ?

ଭୁବନେଶ୍ୱର : ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ ବିଜେପି ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରେମ ଛାଡ଼ିପାରୁନାହାନ୍ତି । ୱାକଫ ବିଲ୍‌ ନେଇ ବିଜେଡ଼ିର ବଦଳିଥିବା ଆଭିମୁଖ୍ୟକୁ ନେଇ ଏଭଳି ପ୍ରଶ୍ନ ଉଠିବା ସ୍ୱାଭାବିକ  । ତେବେ ମୋଦିଙ୍କ ପାଇଁ ନବୀନଙ୍କ ପ୍ରେମ ପଛରେ ଡର ରହିଛି ନା ସେଟିଂ ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି  ।
ଏପ୍ରସଙ୍ଗକୁ ଯିବା ପୂର୍ବରୁ ୱାକଫ ବିଲ୍‌ ନେଇ ବିଜେଡ଼ିର ବଦଳିଥିବା ଆଭିମୁଖ୍ୟ ଉପରେ ଚର୍ଚ୍ଚା ହେବା ଦରକାର  । ଅପ୍ରେଲ ୨ରେ ବିଜେଡ଼ି ସାଂସଦ ସସ୍ମିତ ପାତ୍ର କହିଲେଯେ, ବିଜେଡ଼ି ୱାକଫ ବିଲ୍‌କୁ ବିରୋଧ କରିବ  । ଫଳରେ ଇଣ୍ଡି ମେଣ୍ଟ ଆଡ଼କୁ ବିଜେଡ଼ି ଢଳୁଛି ବୋଲି ଚର୍ଚ୍ଚା ବି ଆରମ୍ଭ ହୋଇଗଲା  । କିନ୍ତୁ ଆଜି ରାଜ୍ୟସଭାରେ ଏନେଇ ଆଲୋଚନା ଚାଲିଥିବାବେଳେ ସସ୍ମିତ ନିଜ ଏକ୍ସରେ ଲେଖିଲେଯେ, ବିଜୁ ଜନତା ଦଳ ସବୁବେଳେ ଧର୍ମନିରପେକ୍ଷତାର ବିଶ୍ୱାସ କରୁଛି  । ୱାକଫ ବିଲ୍‌ ନେଇ ସଂଖ୍ୟାଲଘୁଙ୍କ ଭାବାବେଗକୁ ଦଳ ସମ୍ମାନ କରୁଛି  । ତେଣୁ ଦଳ ଏନେଇ କୌଣସି ହ୍ୱିପ୍‌ ଜାରିନକରି ବିବେକାନୁମୋଦିତ ଭୋଟ୍‌ ଦେବାକୁ ନିଷ୍ପତ୍ତି ନେଇଛି । ଅର୍ଥାତ୍‌ ସାଂସଦ ଚାହିଁଲେ ବିରୋଧ କରିବେ ନଚେତ୍‌ ସମର୍ଥନ କରିବେ  । ହଠାତ୍‌ ଦିନକରେ ବିଜେଡ଼ି ବଦଳିଗଲା କେମିତି? ବିଜେଡ଼ିର ପରିବର୍ତ୍ତିତ ଆଭିମୁଖ୍ୟ ଏବେ ରାଜନୀତିରେ ଆଲୋଡ଼ନ ସୃଷ୍ଟିକରିଛି । ଦଳ ସିଧାସଳଖ ଭାବେ ମୋଦି ସରକାରଙ୍କୁ ଅସନ୍ତୁଷ୍ଟ କରିବାକୁ ଚାହୁଁନାହିଁ ବୋଲି ବାର୍ତ୍ତା ଯିବା ସ୍ୱାଭାବିକ । 
ଚବିଶ ନିର୍ବାଚନ ପୂର୍ବରୁ ନବୀନ ଓ ମୋଦିଙ୍କ ଭିତରେ ସମ୍ପର୍କ କେତେ ନିଘନ ଥିଲା ତାହା ସମସ୍ତଙ୍କୁ ଜଣା  । ସ୍ଥିତି ଏମିତି ହୋଇଥିଲାଯେ, ଉଭୟ ଦଳ ମେଣ୍ଟ ପାଇଁ ବି ପ୍ରସ୍ତୁତ ହୋଇଥିଲେ । ଯାହାକୁ ନେଇ ପ୍ରାୟ ପନ୍ଦର ଦିନ ଧରି ଦୁଇ ଦଳରେ ହାଇଡ୍ରାମା ବି ଦେଖିବାକୁ ମିଳିଥିଲା । କିନ୍ତୁ ଚବିଶ ନିର୍ବାଚନରେ ନବୀନଙ୍କ ବିଜେଡ଼ି ପରାସ୍ତ ହୋଇଥିବାବେଳେ ମୋଦିଙ୍କ ନେତୃତ୍ୱରେ ବିଜେପି ବାଜିମାତ୍‌ କରିଥିଲା  । ନିର୍ବାଚନ ବେଳେ ବିଜେପିର ନେତାମାନେ ବିଜେଡ଼ିର ଯେଉଁ ଯେଉଁ ନେତା ଓ ଅଫିସରଙ୍କୁ ଟାର୍ଗେଟ୍‌ କରୁଥିଲେ ସେମାନଙ୍କ ବିରୋଧରେ ଟିକିଏ ବି କାର୍ଯ୍ୟାନୁଷ୍ଠାନ ହୋଇନାହିଁ । ଯେଉଁଥିପାଇଁ ନିକଟରେ ପାଟକୁରା ବିଧାୟକ ଅରବିନ୍ଦ ମହାପାତ୍ର ବିଜେପିକୁ ଇଲେଇତି କରିବାକୁ ବି ପଛାଇନଥିଲେ । 
ଏଭଳି ଚର୍ଚ୍ଚା ଭିତରେ ବିଜେଡ଼ି କିନ୍ତୁ ତାମିଲନାଡ଼ୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କ ଦ୍ୱାରା ଆହୂତ ବୈଠକରେ ଯୋଗ ଦେଇଥିଲା  । ଅବଶ୍ୟ ଓଡ଼ିଶାର ଲୋକସଭା ଆସନ ହ୍ରାସ ପାଇବା ନେଇ ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଥିବାରୁ ବିଜେଡ଼ି ଏଭଳି ଆଭିମୁଖ୍ୟ ପୋଷଣ କରିଛି । ରାଜ୍ୟରେ ବିଜେପି ଶାସକ ଦଳ ହୋଇଥିବାବେଳେ ମୁଖ୍ୟ ବିରୋଧୀ ଦଳ ହେଉଛି ବିଜେଡ଼ି । ସାଧାରଣତଃ ଶାସକ ଓ ବିରୋଧୀଙ୍କ ମଧ୍ୟରେ ସବୁବେଳେ ଛକାପଞ୍ଝା ଲାଗି ରହିଥାଏ । ଉଭୟ ଉଭୟଙ୍କୁ ଅକଳରେ ପକାଇବାକୁ ଯୋଜନା କରନ୍ତି । ଅବଶ୍ୟ ଓଡ଼ିଶାରେ ଏଯାବତ୍‌ ସେଭଳି ଚିତ୍ର ଦେଖିବାକୁ ମିଳିନାହିଁ । ଯାହାର କାରଣ ଏବେବି ବିଜେପି ଓ ବିଜେଡ଼ିର ଅନେକ ନେତା ଖୋଜି ପାଉନାହାନ୍ତି ।
ବିଶେଷସୂତ୍ରରୁ ଜାଣିବାକୁ ମିଳିଛିଯେ, ନୂଆଦିଲ୍ଲୀର ବିଜେପି ନେତାଙ୍କ ସହ ନବୀନଙ୍କର ସୁସମ୍ପର୍କ ରହିଛି । ମେଣ୍ଟ ନେଇ ମୋଦିଙ୍କ ପ୍ରସ୍ତାବକୁ ନବୀନ ଗ୍ରହଣ କରିଥିବାରୁ ମୋଦିଙ୍କର ନବୀନଙ୍କ ପ୍ରତି ଦୁର୍ବଳତା ରହିଛି  । କାହିଁକିନା ବିଜେପି ନେତାଙ୍କ ପାଇଁ ହିଁ ମେଣ୍ଟ ଭାଙ୍ଗିଥିଲା  । ସେହିପରି ପାଣ୍ଡିଆନଙ୍କର ମଧ୍ୟ ମୋଦି ପ୍ରଶାସନର ଅନେକ ବରିଷ୍ଠ ଅଧିକାରୀଙ୍କ ସହ ଭଲ ସମ୍ପର୍କ ରହିଛି  । ସୁଜାତାଙ୍କ ଭିଆରଏସକୁ ମାତ୍ର ଦିନକ ଭିତରେ କେନ୍ଦ୍ର ସରକାର ଗ୍ରହଣ କରିନେଇଥିଲେ  । ଏହା ତାହାର ଜ୍ୱଳନ୍ତ ନିଦର୍ଶନ କହିଲେ ଭୁଲ୍‌ ହେବନାହିଁ  । ପାଣ୍ଡିଆନଙ୍କ ଅନୁଗତ ଭାବେ ଜଣାଶୁଣା ଡିଏସ କୁଟ୍ଟେ ଓ ଆଶିଷ ସିଂଙ୍କୁ ମଧ୍ୟ କେନ୍ଦ୍ର ସରକାର ପଦୋନ୍ନତି ଦେଇଥିଲେ  । ବିଜେଡ଼ି ନେତାଙ୍କ ବିରୋଧରେ ଅନେକ ସଂଗୀନ ଅଭିଯୋଗ ଥିବାବେଳେ କେନ୍ଦ୍ର ଚାହିଁଲେ ସିବିଆଇ ଓ ଇଡ଼ି ଲଗାଇ ଅକଳରେ ପକାଇପାରିବ । ବୋଧହୁଏ ସେହି ଭୟ ରହିଥାଇପାରେ । ଅପରପକ୍ଷରେ ସେଟିଂ ପଛରେ ବି ଅନେକ ଯୁକ୍ତି ରହିଛି । ଯଦି ବିଜେଡ଼ି ବିରୋଧରେ ବିଜେପି ଅସ୍ତ୍ର ସଜାଡ଼ିବ, ବିଜେପି କ୍ଷତିଗ୍ରସ୍ତ ହେବାର ଆଶଙ୍କା ରହିଛି  । କାହିଁକିନା କାଲିକି କାଲି ବିଜେଡ଼ି ଓ କଂଗ୍ରେସ ମଧ୍ୟରେ ମେଣ୍ଟ ସମ୍ଭାବନା ବଢ଼ିଯିବ । ସମ୍ପ୍ରତି ରାଜ୍ୟ ରାଜନୀତିରେ ଭୋଟ ଗଣତିକୁ ଆକଳନ କଲେ କଂଗ୍ରେସ ଓ ବିଜେଡ଼ି ମେଣ୍ଟ ହେଲେ ବିଜେପି ପରାସ୍ତ ହେବା ନିଶ୍ଚତ  । ଆଜିକା ଦିନରେ ଏହା ଜୋର ଦେଇ କୁହାଯାଇପାରେ  । ବିଜେଡ଼ି ଗତ ନିର୍ବାଚନରେ ହାରିଥିଲେବି ୧୪୭ ନିର୍ବାଚନମଣ୍ଡଳୀରେ ଭଲ ଭୋଟ ବ୍ୟାଙ୍କ ରହିଛି । ସେଥିରେ କଂଗ୍ରେସର ପକେଟ ଭୋଟ ମିଶିଗଲେ ବିଜେଡ଼ି-କଂଗ୍ରେସ ମେଣ୍ଟ ବି ସରକାର ଗଢ଼ିପାରିବେ  । ନବୀନଙ୍କ ଭଳି ଜଣେ ନରମ ନେତାଙ୍କ ବିରୋଧରେ ମୋଦି-ଶାହା ଆକ୍ସନ ମୁଡ଼କୁ ଆସିପାରୁନାହାନ୍ତି । ତେଣୁ ଭବିଷ୍ୟତକୁ ଆଖି ଆଗରେ ରଖି ଏଭଳି ଭିତିରିଆ ସନ୍ଧି କରାଯାଉଥିଲେ ଆଶ୍ଚର୍ଯ୍ୟ ହେବାର ନାହିଁ ।