ରାସ୍ତାରେ ବୁଲାଗୋରୁଙ୍କ ରାଜୁତି

କଟକ : ସଂପ୍ରତି କଟକ ସହର ରାଜରାସ୍ତାରେ ବୁଲା ଗୋରୁଙ୍କ ସଂଖ୍ୟା ଅହେତୁକ ଭାବେ ବୃଦ୍ଧି ପାଇଛି । ଗଳିକନ୍ଦିରୁ ଆରମ୍ଭ କରି ମୁଖ୍ୟ ରାସ୍ତାରେ ଏମାନଙ୍କ ଦୌରାତ୍ମ୍ୟ ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ସତେ ଯେପରି ସହରର ରାସ୍ତାକୁ ବୁଲା ଗାଈ ଓ ଷଣ୍ଢ ଗୁଡ଼ିକ ଦଖଲ କରି ନେଇଛନ୍ତି । ବିଶେଷ କରି ରାତି୍ର ସମୟରେ ଏମାନେ ମୁଖ୍ୟ ରାସ୍ତାରେ ଶୋଇ ରହିଥିବାରୁ ସାଧାରଣ ଲୋକଙ୍କ ଯାତାୟତ କରିବା କଷ୍ଟକର ହୋଇପଡ଼ିଛି ।
ବର୍ତ୍ତମାନ ସହରର ମହାନଦୀବିହାର, ନୂଆବଜାର, ପୋତାପୋଖରୀ, ବିଦ୍ୟାଧରପୁର, ଗତିରାଉତପାଟଣା, ଶିଖରପୁର, ଯୋବ୍ରା, ନୂଆପଡ଼ା, ଷ୍ଟେସନବଜାର, ମାଲଗୋଦାମ, ଛତ୍ରବଜାର ଓ ସିଡ଼ିଏ ଆଦି ଅଞ୍ଚଳର ରାସ୍ତାରେ ବୁଲଷଣ୍ଢ ଓ ଗାଈଙ୍କ ସଂଖ୍ୟା ବଢ଼ି ଯାଇଛି । ଫଳରେ ପଥଚାରୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ବିଶେଷ କରି ସ୍କୁଲ ଯାଉଥିବା ଛାତ୍ରଛାତ୍ରୀ, କର୍ମଜୀବୀ ମହିଳା ପ୍ରତିଦିନ ଗୋରୁଙ୍କ ଉତ୍ପାତ ସାଙ୍ଗକୁ ଷଣ୍ଢ ଲଢ଼େଇ ଏବେ ସେମାନଙ୍କ ପାଇଁ ଚିନ୍ତାର ବିଷୟ ପାଲଟିଛି । ସେହିପରି ସନ୍ଧ୍ୟା ସମୟରେ ଟିଉସନ ଯାଉଥିବା ଛାତ୍ରଛାତ୍ରୀମାନେ ମଧ୍ୟ ବୁଲା ଗୋରୁଙ୍କ ଦୌରାତ୍ମ୍ୟରେ ବିଶେଷ ଭାବେ ଅସୁବିଧାର ସମ୍ମୁଖୀନ ହେଉଥିବା ପରିଲକ୍ଷିତ ହେଉଛି । ମୁଖ୍ୟତଃ ସହରର ଅନେକ ଲୋକ କ୍ଷୀର ଖାଇବା ପାଇଁ ଘରେ ଗାଈ ପାଳୁଛନ୍ତି । ମାତ୍ର କ୍ଷୀର ଦେବା ବନ୍ଦ ହେବା ପରେ ଗାଈ ଓ ଅଣ୍ଡିରା ବାଛୁରୀଗୁଡ଼ିକୁ ପଦାକୁ ଛାଡ଼ି ଦେଉଛନ୍ତି । ସେମାନେ ଗୁହାଳରେ ନ ରହି ରାସ୍ତାରେ ଏଣେତେଣେ ବୁଲୁଛନ୍ତି ଏବଂ ରାଜରାସ୍ତା ସେମାନଙ୍କର ଠିକଣା ପାଲଟି ଯାଇଛି । ଗୋଟିଏ ସ୍ଥାନରେ ବହୁ ସଂଖ୍ୟକ ବୁଲା ଗୋରୁ ଓ ଷଣ୍ଢ ଏକତ୍ର ହେଉଥିବାରୁ ପରସ୍ପର ମଧ୍ୟରେ ଲଢ଼େଇ ମଧ୍ୟ ହେଉଛନ୍ତି । ଲଢ଼େଇ ଭିତରେ ଷଣ୍ଢଗୁଡ଼ିକ କେତେବେଳେ ଗାଡ଼ିରେ ପିଟି ହେଉଛନ୍ତି ତ ଆଉ କେତେବେଳେ ଦୋକାନ ଓ ଘର ଭିତରେ ପଶି ଯାଉଛନ୍ତି । ଏହାଛଡ଼ା ଷଣ୍ଢ ଆକ୍ରମଣ ଯୋଗୁଁ ଗାଡ଼ି ଚାଳକମାନେ ବେଳେବେଳେ ଆହତ ହେଉଥିବାର ଦୃଶ୍ୟ ପରିଲକ୍ଷିତ ହେଉଛି । ଦିନ ଅପେକ୍ଷା ରାତିରେ ଏମାନଙ୍କ ଦୌରାତ୍ମ୍ୟ ପଥଚାରୀଙ୍କୁ ଅଧିକ ଆତଙ୍କିତ କରୁଛି । ସହରର ବୁଲା ଗୋରୁ ଓ ଷଣ୍ଢକୁ କାବୁ କରିବାକୁ କଟକ ମହାନଗର ନିଗମ ପକ୍ଷରୁ ସେପରି ଠୋସ୍ ପଦକ୍ଷେପ ଗ୍ରହଣ କରାଯାଉନଥିବା ସାଧାରଣରେ ଅଭିଯୋଗ ହେଉଛି । ମଝିରେ ମଝିରେ ସିଏମସି ପକ୍ଷରୁ ବୁଲା ଗୋରୁଙ୍କୁ ଧରାଯାଇ କାଞ୍ଜିଆହୁଦା ପଠା ଯାଉଥିଲେ ହେଁ ତାହା ଯଥେଷ୍ଟ ନୁହେଁ ବୋଲି ସହରବାସୀ ଅଭିଯୋଗ କରିଛନ୍ତି । ସେହିପରି ରାସ୍ତାକୁ ଗୋରୁ ଛାଡ଼ୁଥିବା ମାଲିକଙ୍କ ଉପରେ କୌଣସି ଆଖିଦୃଶିଆ କାର୍ଯ୍ୟାନୁଷ୍ଠାନ ହେଉନଥିବା ଅଭିଯୋଗ ହେଉଛି । ସିଏମସି ପକ୍ଷରୁ ବୁଲା ଗୋରୁ ଓ ଷଣ୍ଢକୁ ନିୟମିତ ବ୍ୟବଧାନରେ ଧରି କାଞ୍ଜିଆହୁଦାକୁ ପଠାଇବା ପାଇଁ ସାଧାରଣରେ ଦାବି ହୋଇଛି ।