ଲାଲକିଲ୍ଲା ବିସ୍ଫୋରଣ : ୩ ଡାକ୍ତର, ୨ ସାର ବିକ୍ରେତା ଅଟକ

ଚଣ୍ଡିଗଡ : ଦିଲ୍ଲୀ ଲାଲକିଲ୍ଲା ବିସ୍ଫୋରଣ ଘଟଣାରେ ପଞ୍ଜାବର ପଠାନକୋଟର ଜଣେ ସର୍ଜନଙ୍କୁ ଅଟକ ରଖାଯାଇଛି । ଯିଏ କି ପୂର୍ବରୁ ଫରିଦାବାଦର ଅଲ ଫଲାହ ୟୁନିଭର୍ସିଟିରେ କାର୍ଯ୍ୟ କରୁଥିଲେ । ଏହା ସହିତ ନୁହରୁ ଦୁଇଜଣ ଡାକ୍ତର ଓ ହରିୟାଣାର ସୋହନାରୁ ୨ଜଣ ସାର ଏବଂ ବିହନ ବିକ୍ରେତାଙ୍କୁ ଉଠାଇ ନିଆଯାଇଛି । ଫରିଦାବାଦର ଅଲ-ଫଲାହ ବିଶ୍ୱବିଦ୍ୟାଳୟ ଏବେ ଅନେକ କେନ୍ଦ୍ରୀୟ ଓ ରାଜ୍ୟ ଏଜେନ୍ସିଙ୍କ ନଜରରେ ରହିଛି । ରାଜସ୍ୱ ଅଧିକାରୀମାନେ ବିଶ୍ୱବିଦ୍ୟାଳୟର ଜମି ରେକର୍ଡ ଓ ମାପ ଯାଞ୍ଚ କରୁଛନ୍ତି । ଏହି ସମୟରେ ଜାତୀୟ ଚିକିତ୍ସା କମିଶନ (ଏନଏମସି) ନଭେମ୍ବର ୧୦ ତାରିଖ  ବିସ୍ଫୋରଣ ପଛରେ ଆତଙ୍କବାଦୀ ମଡ୍ୟୁଲରେ ସାମିଲ ଥିବା ଚାରି ଡାକ୍ତରଙ୍କ ପଞ୍ଜୀକରଣ ବାତିଲ କରିଛି ।
ସୂତ୍ର ଅନୁସାରେ, ୪୫ ବର୍ଷୀୟ ଡାକ୍ତର ରୟୀସ ଅହମ୍ମଦ ଭଟ୍ଟ, ଯିଏ ବର୍ତ୍ତମାନ ପଠାନକୋଟର ହ୍ୱାଇଟ୍‌ ମେଡିକାଲ କଲେଜ ସହିତ ଜଡିତ ତାଙ୍କୁ କେନ୍ଦ୍ରୀୟ ଏଜେନ୍ସିଗୁଡ଼ିକ ଅଟକ ରଖିଛନ୍ତି ଏବଂ ତଦନ୍ତକାରୀମାନେ ଜାଣିବା ପରେ ତାଙ୍କୁ ପଚରାଉଚରା କରାଯାଉଛି । ସେ ଦିଲ୍ଲୀ ଲାଲକିଲ୍ଲା ବିସ୍ଫୋରଣର ମୁଖ୍ୟ ମାଷ୍ଟରମାଇଣ୍ଡ ଡାକ୍ତର ଉମର ନବିଙ୍କ ସହ ଯୋଗାଯୋଗରେ ଥିଲେ । ଭଟ୍ଟ୍‌ ୨୦୨୦ ରୁ ୨୦୨୧ ପର୍ଯ୍ୟନ୍ତ ଅଲ-ଫଲାହ ବିଶ୍ୱବିଦ୍ୟାଳୟରେ କାର୍ଯ୍ୟ କରୁଥିଲେ । ଶୁକ୍ରବାର ସନ୍ଧ୍ୟାରେ ନୁହରୁ ଦୁଇଜଣ ଡାକ୍ତର ଏବଂ ସୋହନାରୁ ଦୁଇଜଣ ସାର ଏବଂ ବିହନ ବିକ୍ରେତାଙ୍କୁ ପଚରାଉଚରା ପାଇଁ ଅଟକ ରଖାଯାଇଥିଲା । ସୂତ୍ର ଅନୁଯାୟୀ, ନୁହ ଜିଲ୍ଲାର ସୁନହେରା ଗ୍ରାମର ଜଣେ ଡାକ୍ତର ମୁସ୍ତକିମଙ୍କୁ ପଚରାଉଚରା ପାଇଁ ନିଆଯାଇଥିଲା । ସେ ତାଙ୍କର ଏମବିବିଏସ ସମାପ୍ତ କରିଥିବା ଓ ଅଲ୍‌-ଫଲାହ ବିଶ୍ୱବିଦ୍ୟାଳୟରେ ତାଙ୍କର ଶିକ୍ଷାର୍ଥୀତା କରୁଥିବାର ସୂଚନା ମିଳିଛି, ଯାହା ନଭେମ୍ବର ୨ରେ ଶେଷ ହୋଇଥିଲା । ସେ ନଭେମ୍ବର ୯ରେ ଦିଲ୍ଲୀ ଯାତ୍ରା କରିଥିଲେ ବୋଲିଦ୍ଭ  ଅଭିଯୋଗ ହୋଇଛି । ଅଲ୍‌-ଫଲାହ ବିଶ୍ୱବିଦ୍ୟାଳୟର ପୂର୍ବତନ ଛାତ୍ର ଡାକ୍ତର ରେହାନ, ଯିଏ ବର୍ତ୍ତମାନ ନୁହର ଏକ ଘରୋଇ ହସ୍ପିଟାଲରେ ନିଯୁକ୍ତି ପାଇଛନ୍ତି, ତାଙ୍କୁ ମଧ୍ୟ ଅଟକ ରଖାଯାଇଛି । ଏହି ସମୟରେ, ଜାତୀୟ ଚିକିତ୍ସା କମିଶନ (ଏନଏମସି) ଚାରି ଜଣ ଡାକ୍ତରଙ୍କ ପଞ୍ଜିକରଣ ବାତିଲ କରିଛି । ଏକ ନୋଟିସରେ କମିଶନ ଚାରି ଜଣ ଡାକ୍ତର ଡକ୍ଟର ମୁଜାଫର ଅହମଦ, ଡକ୍ଟର ଅଦିଲ ଅହମଦ ରାଥେର, ଡକ୍ଟର ମୁଜାମିଲ ଶକିଲ ଏବଂ ଡକ୍ଟର ଶାହିନ ଶାହିଦଙ୍କ ଭାରତୀୟ ଚିକିତ୍ସା ରେଜିଷ୍ଟର (ଆଇଏମଆର) ଏବଂ ଜାତୀୟ ଚିକିତ୍ସା ରେଜିଷ୍ଟର (ଏନଏମଆର) ଏଣ୍ଟ୍ରିକୁ ତୁରନ୍ତ ପ୍ରଭାବରୁ ବାତିଲ କରିଛି  । ଏହି ଡାକ୍ତରମାନେ "ଆଉ ଭାରତର କୌଣସି ସ୍ଥାନରେ ଡାକ୍ତରୀ ଅଭ୍ୟାସ କରିପାରିବେ ନାହିଁ କିମ୍ବା କୌଣସି ଡାକ୍ତରୀ ନିଯୁକ୍ତି ଗ୍ରହଣ କରିପାରିବେ ନାହିଁ ବୋଲି ନୋଟିସରେ ଲେଖାଯାଇଛି ।