ସଂସଦର ବଜେଟ ଅଧିବେଶନକୁ ସମ୍ବୋଧିତ କଲେ ରାଷ୍ଟ୍ରପତି ; ସାମାଜିକ ନ୍ୟାୟ ପାଇଁ ସରକାର ପ୍ରତିବଦ୍ଧ

ସଂସଦର ବଜେଟ ଅଧିବେଶନ ଆଜିଠୁ ଆରମ୍ଭ ହୋଇଛି । ଏନେଇ ସଂସଦର ଉଭୟ ଗୃହର ମିଳିତ ଅଧିବେଶନକୁ ସମ୍ବୋଧିତ କରିଛନ୍ତି ରାଷ୍ଟ୍ରପତି । ରାଷ୍ଟ୍ରପତି ଦ୍ରୌପଦୀ ମୁର୍ମୁ ସରକାରଙ୍କ ସଫଳତା ଉପରେ ଆଲୋକପାତ କରିଥିଲେ ।  ତାଙ୍କ ଅଭିଭାଷଣ ସମୟରେ, ରାଷ୍ଟ୍ରପତି ଦାବି କରିଛନ୍ତି ଯେ ବର୍ତ୍ତମାନର ସରକାର ଦେଶର ବିକାଶକୁ ତ୍ୱରାନ୍ୱିତ କରିଛନ୍ତି । ମହିଳା ଓ ସାମାଜିକ ଏବଂ ଆର୍ଥିକ ଭାବରେ ପଛୁଆ ସମ୍ପ୍ରଦାୟକୁ ସାମିଲ କରି ସାମାଜିକ କଲ୍ୟାଣ ନୀତି କାର୍ଯ୍ୟକାରୀ କରିବା ଠାରୁ ଆରମ୍ଭ କରି ବିଜ୍ଞାନ ଓ ପ୍ରଯୁକ୍ତିବିଦ୍ୟାରେ ଦ୍ରୁତ ଅଗ୍ରଗତି କରିଛନ୍ତି ।  ଏହାସହ ରାଷ୍ଟ୍ରପତି ଏକ ଦୁଃଖଦ ବିମାନ ଦୁର୍ଘଟଣାରେ ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ମୃତ୍ୟୁରେ ମଧ୍ୟ ଶୋକ ପ୍ରକାଶ କରିଛନ୍ତି । ରାଷ୍ଟ୍ରପତି ଦାବି କରିଛନ୍ତି ଯେ ଦେଶର ପ୍ରାୟ ୯୫ କୋଟି ନାଗରିକଙ୍କ ପାଇଁ ସାମାଜିକ ସୁରକ୍ଷା ଲାଭ ଉପଲବ୍ଧ । ଗତ ୧୦ ବର୍ଷ ମଧ୍ୟରେ ୨୫ କୋଟି ଭାରତୀୟ ଦାରିଦ୍ର୍ୟରୁ ମୁକ୍ତ ହୋଇଛନ୍ତି ।  ବାବାସାହେବ ଆମ୍ବେଦକରଙ୍କ ଦ୍ୱାରା ପ୍ରଚାରିତ ଓ ସମ୍ବିଧାନରେ ଲିପିବଦ୍ଧ ଆଦର୍ଶ ଆଜି ମଧ୍ୟ ଭାରତର ଲୋକମାନଙ୍କୁ ଅନୁପ୍ରାଣିତ କରୁଛି । "ମୋ ସରକାର ପ୍ରକୃତ ସାମାଜିକ ନ୍ୟାୟ ପାଇଁ ପ୍ରତିବଦ୍ଧ’ ବୋଲି ସେ କହିଥିଲେ । ପ୍ରକୃତ ସାମାଜିକ ନ୍ୟାୟର ଅର୍ଥ ହେଉଛି ଦେଶର ପ୍ରତ୍ୟେକ ନାଗରିକ କୌଣସି ଭେଦଭାବ ବିନା ସେମାନଙ୍କର ନ୍ୟାଯ୍ୟ ଅଂଶ ପାଆନ୍ତି ବୋଲି ରାଷ୍ଟ୍ରପତି କହିଛନ୍ତି । ସରକାରଙ୍କର "ସବକା ସାଥ ସବକା ବିକାଶ’ ଦୃଷ୍ଟିକୋଣ ଯୋଗୁଁ ରାଷ୍ଟ୍ରପତି ଦଳିତ ଓ ଆଦିବାସୀ ସମ୍ପ୍ରଦାୟ ପାଇଁ ବର୍ତ୍ତମାନ ଉପଲବ୍ଧ ସୁବିଧା ବିଷୟରେ କହିଥିଲେ । ଏକ ‘ଦୁର୍ନୀତିମୁକ୍ତ' ବ୍ୟବସ୍ଥା ଗଠନ ପାଇଁ ମଧ୍ୟ ସରକାରଙ୍କୁ ପ୍ରଶଂସା କରିଥିଲେ । ସେ କହିଥିଲେ ଯେ ସରକାର ପ୍ରତ୍ୟେକ ଟଙ୍କା ରାଷ୍ଟ୍ରର ବିକାଶ ପାଇଁ ଖର୍ଚ୍ଚ ହେବା ନିଶ୍ଚିତ କରନ୍ତି । ଗତ ୧୦-୧୧ ବର୍ଷ ମଧ୍ୟରେ ଭାରତ ପ୍ରତ୍ୟେକ ଦ୍ଭ କ୍ଷତ୍ରରେ ଏହାର ମୂଳଦୁଆକୁ ମଜଭୁତ କରିଛି । ଭାରତର ଉତ୍ପାଦନ କ୍ଷେତ୍ର, ବିଶେଷକରି ଇଲେକ୍‌ଟ୍ରୋନିକ୍ସ ଓ କୃଷି-ଜାତ ଦ୍ରବ୍ୟ ଏବଂ ମତ୍ସ୍ୟଚାଷ କ୍ଷେତ୍ରରେ ଦ୍ରୁତ ଅଭିବୃଦ୍ଧିକୁ ପ୍ରଶଂସା କରିଥିଲେ । ରେଳବାଇର ସଫଳତାକୁ ପ୍ରଶଂସା କରି କହିଛନ୍ତି ଯେ ସାମ୍ପ୍ରତିକ ବର୍ଷଗୁଡ଼ିକରେ ରେଳ ସଂଯୋଗ ଏବଂ ସୁଗମତାରେ ଯଥେଷ୍ଟ ଉନ୍ନତି ହୋଇଛି । 

ଗରିବ ଏବଂ ମଧ୍ୟବିତ୍ତ ବର୍ଗର ଜନସଂଖ୍ୟାର ସେବା କରୁଥିବା ରେଳବାଇ ୧୦୦ ପ୍ରତିଶତ ବିଦ୍ୟୁତୀକରଣ ହାସଲ କରିବାକୁ ନିକଟତର । ଏହାସହ ରାଷ୍ଟ୍ରପତି କହିଛନ୍ତି ଯେ ବିଶ୍ୱ ଭାରତୀୟ ସଶସ୍ତ୍ର ବାହିନୀର ସାହସକୁ ଅପରେସନ ସିନ୍ଦୂର ମାଧ୍ୟମରେ ଦେଖିଛି । ଦୃଢ଼ ଭାବରେ କହିଛନ୍ତି ଯେ ଯେକୌଣସି ଆତଙ୍କବାଦ କାର୍ଯ୍ୟର ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ସହିତ ଜବାବ ଦିଆଯିବ ।  ଅପରେସନ ସିନ୍ଦୂର ପରେ ଭାରତୀୟ ପ୍ରତିରକ୍ଷା ପ୍ଲାଟଫର୍ମ ଉପରେ ବିଶ୍ୱାସ ବୃଦ୍ଧି ପାଇଛି । ସିନ୍ଧୁ ଜଳ ଚୁକ୍ତିନାମା ସ୍ଥଗିତ ରଖିବା ଆତଙ୍କବାଦ ବିରୁଦ୍ଧରେ ଭାରତର ଲଢେଇର ଏକ ଅଂଶ ଥିଲା । ଆମେ ଜାତୀୟ ସୁରକ୍ଷାକୁ ଆହୁରି ମଜଭୁତ କରିବା ପାଇଁ ମିଶନ ସୁଦର୍ଶନ ଚକ୍ର ଉପରେ ମଧ୍ୟ କାମ କରୁଛୁ । ସୁରକ୍ଷା ବାହିନୀ ମଧ୍ୟ ମାଓବାଦୀ ଆତଙ୍କବାଦ ବିରୁଦ୍ଧରେ ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଏହାସହ ରାଷ୍ଟ୍ରପତି ନବମ ଶିଖ ଗୁରୁ  ତେଗ ବାହାଦୁର, ସ୍ୱାଧୀନତା ସଂଗ୍ରାମୀ ବିର୍ସା ମୁଣ୍ଡା, ଲୌହ ମାନବ ସର୍ଦ୍ଦାର ବଲ୍ଲଭ ଭାଇ ପଟେଲ, ଭାରତ ରତ୍ନ ଭୂପେନ ହାଜାରିକାଙ୍କ ଦେଶ ପ୍ରତି ଅବଦାନକୁ ମନେ ପକାଇ ଥିଲେ । ରାଷ୍ଟ୍ରପତିଙ୍କ ଦ୍ୱାରା ରୋଜଗାର ଓ ଆଜିବିକା ମିଶନ (ଗ୍ରାମୀଣ) ପାଇଁ ବିକଶିତ ଭାରତ-ଗ୍ୟାରେଣ୍ଟି ଯୋଜନା ବିଷୟରେ ଉଲ୍ଲେଖ କରାଯିବା ପରେ ବିରୋଧୀ ଦଳ ପକ୍ଷରୁ ଜୋରଦାର ବିରୋଧ କରାଯାଇଥିଲା । ମନରେଗା ଆଇନକୁ ବଦଳାଇ ଦେଇଥିବା ଆଇନ ବିରୋଧରେ ବିରୋଧୀଙ୍କ "ୱାପସ ଲୋ’  ନାରା ମଧ୍ୟରେ ରାଷ୍ଟ୍ରପତିଙ୍କୁ ଏକ ସଂକ୍ଷିପ୍ତ ବିରତି ନେବାକୁ ପଡିଥିଲା । ଅର୍ଥମନ୍ତ୍ରୀ ନିର୍ମଳା ସୀତାରମଣ ଗୁରୁବାର ସଂସଦରେ ଅର୍ଥନୈତିକ ସର୍ଭେ ଉପସ୍ଥାପନ କରିବେ ଓ ରବିବାର କେନ୍ଦ୍ର ବଜେଟ୍‌ ଉପସ୍ଥାପନ କରିବେ ।