ସପ୍ତମ ଥର ପାଇଁ ୟୁଏନ୍ ମାନବାଧିକାର ପରିଷଦରେ ଭାରତ
Henamanjaree Swain
ନ୍ୟୁୟର୍କ : ଭାରତ ୨୦୨୬-୨୮ କାର୍ଯ୍ୟକାଳ ପାଇଁ ଜାତିସଂଘ ମାନବାଧିକାର ପରିଷଦ (ୟୁଏନଏଚଆରସି)କୁ ନିର୍ବାଚିତ ହୋଇଛି । ସପ୍ତମ ଥର ପାଇଁ ଭାରତ ଏହି ଗୌରବ ଅର୍ଜନ କରିଛି । ମଙ୍ଗଳବାର ଦିନ ଅନୁଷ୍ଠିତ ନିର୍ବାଚନର ଫଳାଫଳ ଘୋଷଣା କରି ୟୁଏନଏଚଆରସି ଏକ ସୋସିଆଲ ମିଡିଆ ପୋଷ୍ଟରେ କହିଛି ଯେ ଭାରତର ତିନି ବର୍ଷର କାର୍ଯ୍ୟକାଳ ୨୦୨୬ ଜାନୁଆରି ୧ରୁ ଆରମ୍ଭ ହେବ ।
ସଂଯୁକ୍ତ ରାଷ୍ଟ୍ରସଂଘରେ ଭାରତର ସ୍ଥାୟୀ ପ୍ରତିନିଧି ପାର୍ବଥନେନୀ ହରିଶ ସୋସିଆଲ ମିଡିଆ ପୋଷ୍ଟରେ ସମସ୍ତ ପ୍ରତିନିଧିମଣ୍ଡଳଙ୍କୁ ସେମାନଙ୍କର ବିପୁଳ ସମର୍ଥନ ପାଇଁ ଧନ୍ୟବାଦ ଜଣାଇଛନ୍ତି । ଭାରତ ଆଜି ସପ୍ତମ ଥର ପାଇଁ ୨୦୨୬-୨୮ କାର୍ଯ୍ୟକାଳ ପାଇଁ ମାନବାଧିକାର ପରିଷଦକୁ ନିର୍ବାଚିତ ହୋଇଛି ବୋଲି ସେ କହିଛନ୍ତି । ସେ କହିଛନ୍ତି ଯେ, ଏହି ନିର୍ବାଚନ ମାନବାଧିକାର ଓ ମୌଳିକ ସ୍ୱାଧୀନତା ପ୍ରତି ଭାରତର ଅଟଳ ପ୍ରତିବଦ୍ଧତାକୁ ପ୍ରତିଫଳିତ କରେ । ଆମେ ଆମର କାର୍ଯ୍ୟକାଳ ମଧ୍ୟରେ ଏହି ଉଦ୍ଦେଶ୍ୟ ପୂରଣ କରିବାକୁ ଅପେକ୍ଷା କରୁଛୁ ବୋଲି ସେ କହିଛନ୍ତି । ସଂଯୁକ୍ତ ରାଷ୍ଟ୍ରସଂଘ ମାନବାଧିକାର ପରିଷଦ ସମାନ ଭୌଗୋଳିକ ବଣ୍ଟନ ନିୟମ ଅନୁଯାୟୀ ତିନି ବର୍ଷର କାର୍ଯ୍ୟକାଳ ପାଇଁ ଜାତିସଂଘ ସାଧାରଣ ସଭା ଦ୍ୱାରା ନିର୍ବାଚିତ ୪୭ ସଦସ୍ୟ ରାଷ୍ଟ୍ର ନେଇ ଗଠିତ । ଭାରତ ୨୦୦୬ରେ ଏହାର ସୃଷ୍ଟି ହେବା ପରଠାରୁ ନିରନ୍ତର ପରିଷଦର ସଦସ୍ୟ ରହିଆସିଛି । ୨୦୧୧, ୨୦୧୮ ଓ ୨୦୨୫ରେ ତିନୋଟି ବାଧ୍ୟତାମୂଳକ ବିରତି ରହିଥିଲା । ୨୦୦୬ରେ ପ୍ରଥମ ପରିଷଦ ନିର୍ବାଚନରେ ଭାରତ ସର୍ବାଧିକ ସଂଖ୍ୟକ ଭୋଟ ସହିତ ନିର୍ବାଚିତ ହୋଇଥିଲା । ୧୯୦ ଭୋଟରୁ ୧୭୩ ଭୋଟ ପାଇଥିଲା । ସେବେଠାରୁ ଭାରତ ଛଅ ଥର ପାଇଁ ନିର୍ବାଚିତ ହୋଇଛି । ୨୦୦୬-୨୦୦୭, ୨୦୦୮-୨୦୧୦, ୨୦୧୨-୨୦୧୪, ୨୦୧୫-୨୦୧୭, ୨୦୧୯-୨୦୨୧ ଏବଂ ୨୦୨୨-୨୦୨୪ରେ ଭାରତ ସଭ୍ୟ ଥିଲା ।
