ସମ୍ଭାବ୍ୟ ବର୍ଷା ପାଇଁ ଜିଲ୍ଲାପାଳଙ୍କ ଆଭାସୀ ମାଧ୍ୟମରେ ଜରୁରୀ ବୈଠକ : ସଂଗୃହିତ ଧାନ ସୁରକ୍ଷିତ ରଖିବାକୁ ନିଦେ୍ର୍ଦଶ
Rasmita Behera
ବାଲେଶ୍ୱର : ଆସନ୍ତା ୧୯ ରୁ ୨୧ ତାରିଖ ପର୍ଯ୍ୟନ୍ତ ସମ୍ଭାବ୍ୟ ପ୍ରବଳ ବର୍ଷା ହେବାର ପୂର୍ବାନୁମାନ କରାଯାଇଥିବାରୁ ପ୍ରସ୍ତୁତି ପଦକ୍ଷେପ ସମ୍ପର୍କରେ ଆଲୋଚନା କରିବା ପାଇଁ ଆଜି ଜିଲ୍ଲାପାଳ ସୂର୍ଯ୍ୟବଂଶୀ ମୟୂର ବିକାଶଙ୍କ ଅଧ୍ୟକ୍ଷତାରେ ଆଭାସୀ ମାଧ୍ୟମରେ ଏକ ଜରୁରୀ ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ବର୍ଷାରୁ ଅମଳ ଧାନକୁ ସୁରକ୍ଷା ଦେବା ପାଇଁ ଜିଲ୍ଲାପାଳ ଗୁରୁତ୍ୱାରୋପ କରିଥିଲେ । ଏହି ସମୟରେ ଧାନ ସଂଗ୍ରହଣକୁ ସୁବ୍ୟବସ୍ଥିତ କରିବା ପାଇଁ ସମସ୍ତ ମଣ୍ଡିଙ୍କୁ କଡା ନିଦେ୍ର୍ଦଶ ଦିଆଯାଇଛି । ବର୍ତ୍ତମାନ ଖୋଲା ସ୍ଥାନରେ ଗଚ୍ଛିତ ଥିବା ସମସ୍ତ ଧାନକୁ ତୁରନ୍ତ ଆଚ୍ଛାଦିତ ଅଞ୍ଚଳକୁ ସ୍ଥାନାନ୍ତରିତ କରିବା କିମ୍ବା ପଲିଥିନ୍ କଭରରେ ପର୍ଯ୍ୟାପ୍ତ ପରିମାଣରେ ସୁରକ୍ଷିତ ରଖିବା ଆବଶ୍ୟକତା ଥିବା ଜିଲ୍ଲାପାଳ ମତ ପ୍ରକାଶ କରିଥିଲେ ।
ବାଲେଶ୍ୱର ଓ ନୀଳଗିରି ଉପ ଜିଲ୍ଲାପାଳଙ୍କୁ ନିଜ ନିଜ କ୍ଷେତ୍ରରେ ପଲିଥିନ୍ ଉପଲବ୍ଧତାର ତୁରନ୍ତ ମୂଲ୍ୟାଙ୍କନ କରିବାକୁ ଏବଂ ଧାନ ଷ୍ଟକର ଜରୁରୀକାଳୀନ ବ୍ୟବହାର ପାଇଁ ପର୍ଯ୍ୟାପ୍ତ ଯୋଗାଣ ନିଶ୍ଚିତ କରିବାକୁ ନିଦେ୍ର୍ଦଶ ଦେଇଥିଲେ ।
ସଂରକ୍ଷଣ ନିଦେ୍ର୍ଦଶାବଳୀର ଅନୁପାଳନ ଯାଞ୍ଚ କରିବା ପାଇଁ କ୍ଷେତ୍ର ପରିଦର୍ଶନ କରିବା ସହିତ ସୁରକ୍ଷାମୂଳକ ପଦକ୍ଷେପ କାର୍ଯ୍ୟକାରୀ କରିବା ପାଇଁ ଚାଷୀ ଏବଂ ମିଲ୍ ମାଲିକମାନଙ୍କ ସହିତ ସମନ୍ୱୟ ସ୍ଥାପନ କରିବା ପାଇଁ କୃଷି ବିଭାଗର ଅଧିକାରୀ, ବ୍ଲକ ଉନ୍ନୟନ ଅଧିକାରୀ, ତହସିଲଦାର ଏବଂ ସ୍ଥାନୀୟ ଜନପ୍ରତିନିଧିମାନଙ୍କୁ ନିୟୋଜିତ କରାଯିବା ପାଇଁ ଜିଲ୍ଲାପାଳ ନିଦେ୍ର୍ଦଶ ଦେଇଛନ୍ତି । ବୈଠକରେ ବାଲେଶ୍ୱର ଉପଜିଲ୍ଲାପାଳ ପ୍ରଥମେଶ ଅରବିନ୍ଦ ରାଜେ ସିର୍କେ, ନୀଳଗିରି ଉପଜିଲ୍ଲାପାଳ ଶୁଭଶ୍ରୀ ରଥ, ଜିଲ୍ଲା ଜରୁରୀକାଳୀନ ଅଧିକାରୀ ସାଇ କୃଷ୍ଣ ଜେନାଙ୍କ ସମେତ ସମସ୍ତ ବିଡ଼ିଓ, ତହସିଲଦାର ଓ ବିଭାଗୀୟ ଅଧିକାରୀମାନେ ଯୋଗ ଦେଇଥିଲେ ।
