ହଟିବ ଜଙ୍ଗଲ ଅନୁମତି ପ୍ରତିବନ୍ଧକ 

ଭୁବନେଶ୍ୱର : ଜଙ୍ଗଲ ଅନୁମତି ମିଳୁନଥିବାରୁ ଅନେକ ଜନକଲ୍ୟାଣମୂଳକ ପ୍ରକଳ୍ପଗୁଡିକ ଆଗେଇ ପାରୁନାହିଁ । କେଉଁଠି ଜିଏସଆଇ ପକ୍ଷରୁ ଖଣିଜ ଅନୁସନ୍ଧାନ କରାଯାଇପାରୁନାହିଁ କେଉଁଠି ରେଳ ପ୍ରକଳ୍ପରେ ବି ବାଧକ ସୃଷ୍ଟି ହେଉଛି । ଏହାକୁ ଆଖିଆଗରେ ରଖି ଆଜି ଉଚ୍ଚସ୍ତରୀୟ ସମନ୍ୱୟ ବୈଠକ ଅନୁଷ୍ଠିତ ହୋଇଛି । ସମ୍ଭାବ୍ୟ ପ୍ରତିବନ୍ଧକକୁ ଚିହ୍ନଟ କରିବା ସହ ତାହାକୁ ଦୂର କରିବା ପାଇଁ ତ୍ୱରିତ ନିଷ୍ପତ୍ତି ନେବାକୁ ନିର୍ଦ୍ଦେଶ ଦିଆଯାଇଛି । ରାଜଧାନୀ କ୍ଷେତ୍ର ରିଙ୍ଗ ରୋଡ୍‌ ରାମେଶ୍ୱରରୁ ଗୋବିନ୍ଦପୁର ଏବଂ ଗୋବିନ୍ଦପୁରରୁ ଟାଙ୍ଗୀ ନିର୍ମାଣ ଏବଂ ନେଭେଲି ଲିଗନାଇଟ୍‌ କର୍ପୋରେସନ (ଏନଏଲସି) ଅଧିନରେ ଉଡା ପାଉଁଶ ଡାଇକ୍‌ ପ୍ରକଳ୍ପ ପାଇଁ ପ୍ରତିବନ୍ଧକ ଦୂର କରିବାକୁ ବନାଞ୍ଚଳ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି । ଜଙ୍ଗଲ ବିଭାଗର ଅତିରିକ୍ତ ମୁଖ୍ୟ ସଚିବ ସତ୍ୟବ୍ରତ ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ବରିଷ୍ଠ ଅଧିକାରୀ କେ.ମୁରୁଗେସନ, ଲିଙ୍ଗରାଜ ଓତା, ଜେ.ପି. ମହାକୁଡ, ବିଜୟ କୁମାର, ବୀରେନ୍ଦ୍ର ସିଂହ ପ୍ରମୁଖ ଉପସ୍ଥିତ ଥିଲେ ।

• ଜଙ୍ଗଲ ବିଭାଗର ଉଚ୍ଚସ୍ତରୀୟ ବୈଠକ
• ୭ ଜିଏସଆଇ ଓ ୨ ରେଳବାଇ ପ୍ରକଳ୍ପ ନେଇ ଆଲୋଚନା
• ରାଜଧାନୀ ରିଙ୍ଗରୋଡ଼ ପ୍ରତିବନ୍ଧକ ଦୂର ପାଇଁ ନିର୍ଦ୍ଦେଶ
  
  

ଆନ୍ତଃବିଭାଗୀୟ ସମନ୍ୱୟକୁ ସୁଦୃଢ଼ କରିବା ପାଇଁ ଅତିରିକ୍ତ ମୁଖ୍ୟସଚିବ ଶ୍ରୀ ସାହୁ ଗୁରୁତ୍ୱାରୋପ କରିଥିଲେ । ସମ୍ଭାବ୍ୟ ପ୍ରତିବନ୍ଧକୁ ଚିହ୍ନଟ କରିବା ସହ ତାହାକୁ ଦୂର କରିବା ପାଇଁ ଆଞ୍ଚଳିକ ମୁଖ୍ୟ ବନ ସଂରକ୍ଷକ, ବିଭାଗୀୟ ବନ ଅଧିକାରୀ ଏବଂ କ୍ଷେତ୍ରସ୍ତରୀୟ ଅଧିକାରୀମାନଙ୍କୁ ପ୍ରାରମ୍ଭିକ ପର୍ଯ୍ୟାୟରେ ସମ୍ଭାବ୍ୟ ପ୍ରତିବନ୍ଧକଗୁଡ଼ିକୁ ସକ୍ରିୟ ଭାବରେ ଚିହ୍ନଟ ଓ ଦୂର କରିବାକୁ ନିର୍ଦ୍ଦେଶ ଦେଇଥିଲେ । ତେବେ ଜଙ୍ଗଲ ସଂରକ୍ଷଣ ମାନଦଣ୍ଡ ସହିତ ସାଲିସ କରାଯିବ ନାହିଁ ବୋଲି କୁହାଯାଇଛି । ଜଙ୍ଗଲ ଅଧିକାର ଆଇନ ଅନୁଯାୟୀ ଅଧିକାର ସମାଧାନ, କ୍ଷତିପୂରକ ବନୀକରଣ ଆବଶ୍ୟକତା ଏବଂ ଜଙ୍ଗଲ ଜମିର ସଠିକ ସୀମା ନିର୍ଦ୍ଧାରଣ ସମେତ ବନ ବିଭାଗ ମଞ୍ଜୁରୀ ପ୍ରଦାନ ଆଦି ସମ୍ପର୍କରେ ଆଲୋଚନା ହୋଇଥିଲା । ଜିଆଇଏସ୍‌-ଆଧାରିତ ମ୍ୟାପିଂ, ପ୍ରସ୍ତାବଗୁଡ଼ିକର ଡିଜିଟାଲ୍‌ ତଦାରଖ ଉପରେ ଗୁରୁତ୍ୱାରୋପ କରାଯାଇଛି । ପ୍ରତି ମାସ ୧୨ରେ, ପିଏମଜି ପ୍ରଗତି (ପ୍ରକଳ୍ପ ତଦାରଖ ଗୋଷ୍ଠୀ) ଅଧୀନରେ ପଡ଼ି ରହିଥିବା ପ୍ରକଳ୍ପଗୁଡ଼ିକ ଉପରେ ତାଙ୍କ ଅଧ୍ୟକ୍ଷତାରେ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହେବ । ନୋଡାଲ୍‌ ଅଧିକାରୀମାନେ ଜଙ୍ଗଲ ଜମି କିସମ ପରିବର୍ତ୍ତନ ପ୍ରସ୍ତାବଗୁଡ଼ିକୁ ଶୀଘ୍ର ପ୍ରକ୍ରିୟାକରଣ କରିବେ । ଏହି ଉଚ୍ଚସ୍ତରୀୟ ସମନ୍ୱୟ ବୈଠକରେ ଭାରତୀୟ ଭୂତାତ୍ତ୍ୱିକ ସର୍ବେକ୍ଷଣର ୭ ଅନୁସନ୍ଧାନକାରୀ ଖନନ ପ୍ରକଳ୍ପର ସ୍ଥିତି ବିଷୟରେ ବିସ୍ତୃତ ଆଲୋଚନା କରାଯାଇଥିଲା । ଶିମିଳିପାଳ ଉତ୍ତର ବନ ବିଭାଗ ଅଧୀନରେ ଦୁଧିଆସୋଲ ପଶ୍ଚିମ ବ୍ଲକରେ ତମ୍ବା-ନିକେଲ ଏବଂ ସମ୍ପୃକ୍ତ ମୂଲ୍ୟବାନ ଧାତୁ ଖଣିଜକରଣ ପାଇଁ ଅନୁସନ୍ଧାନ ଖନନ ନିମନ୍ତେ ପ୍ରସ୍ତାବ, କେଶରପୁର ଦକ୍ଷିଣ ବ୍ଲକରେ ତମ୍ବା ଏବଂ ସମ୍ପୃକ୍ତ ମୂଲ୍ୟବାନ ଧାତୁ ଖଣିଜକରଣ ପାଇଁ ଅନୁସନ୍ଧାନ ଖନନ ପାଇଁ ପ୍ରସ୍ତାବ, କୁମାରଡୁବି-ବ୍ଲକରେ ଟାଇଟାନିୟମ ଏବଂ ଭାନାଡିଫେରସ୍‌ ମାଗ୍‌ନେଟାଇଟ ଖଣିଜକରଣ ପାଇଁ ଅନୁସନ୍ଧାନ ଖନନ ପାଇଁ ପ୍ରସ୍ତାବ, କେନ୍ଦୁଝର ବନ ବିଭାଗ ଅଧୀନରେ ରୁଡକେଲା ବ୍ଲକରେ ମାଙ୍ଗାନିଜ ଏବଂ ଲୁହା ପଥର ପାଇଁ ଅନୁସନ୍ଧାନ ଖନନ ପାଇଁ ପ୍ରସ୍ତାବ, କୁଣ୍ଡ୍ରୁପାଣି ବ୍ଲକରେ ମାଙ୍ଗାନିଜ ଏବଂ ଲୁହା ପଥର ପାଇଁ ଅନୁସନ୍ଧାନ ଖନନ ପାଇଁ ପ୍ରସ୍ତାବ, କାସିଆ ପଶ୍ଚିମ ବ୍ଲକରେ ଲୁହା ପଥର ପାଇଁ ଅନୁସନ୍ଧାନ ଖନନ ପାଇଁ ପ୍ରସ୍ତାବ, କଟକ ବନ ବିଭାଗ ଅଧୀନରେ ସୁକିନ୍ଦା ଉପତ୍ୟକା ଅଞ୍ଚଳରେ କାଂସ-କୁମାରଦାହ ସେକ୍ଟରରେ ନିକେଲ ଏବଂ ସମ୍ପୃକ୍ତ ଧାତୁ ପାଇଁ ଅନୁସନ୍ଧାନ ଖନନ ପାଇଁ ପ୍ରସ୍ତାବ ଉପରେ ଆଲୋଚନା ହୋଇଥିଲା । ଦକ୍ଷିଣ ପୂର୍ବ ରେଳବାଇର ଦୁଇଟି ରେଳ ପ୍ରକଳ୍ପର ସ୍ଥିତି ଉପରେ ମଧ୍ୟ ଆଲୋଚନା କରାଯାଇଥିଲା । ଝାରସୁଗୁଡାକୁ ଏମସିଏଲ ରେଳ ସାଇଡିଂକୁ ସଂଯୋଗ କରୁଥିବା ଡବଲ୍‌ ରେଳ ଲାଇନ ଫ୍ଲାଏଓଭର ନିର୍ମାଣ, ପାସେଞ୍ଜର ୟାର୍ଡ ଏବଂ ଧୁତ୍ର ୟାର୍ଡ ପାଇଁ ୧୨.୭ ହେକ୍ଟର ଜଙ୍ଗଲ ଜମିର ପରିବର୍ତ୍ତନ ପାଇଁ ପ୍ରସ୍ତାବ ଓ ଝାରସୁଗୁଡା-ବରପାଲି-ସରଡେଗା ଫି-ଲ ୱାର୍କସ-ରେଳ ସଂଯୋଗୀକରଣ  ଉପରେ ବି ଆଲୋଚନା ହୋଇଛି । ଅତିରିକ୍ତ ମୁଖ୍ୟ ସଚିବ ଶ୍ରୀ ସାହୁ ରାଜଧାନୀ କ୍ଷେତ୍ର ରିଙ୍ଗ ରୋଡ୍‌ ରାମେଶ୍ୱରରୁ ଗୋବିନ୍ଦପୁର ଏବଂ ଗୋବିନ୍ଦପୁରରୁ ଟାଙ୍ଗୀ ନିର୍ମାଣ ପାଇଁ ଏବଂ ନେଭେଲି ଲିଗନାଇଟ୍‌ କର୍ପୋରେସନ (ଏନଏଲସି) ଅଧୀନରେ ଉଡା ପାଉଁଶ ଡାଇକ୍‌ ପ୍ରକଳ୍ପ ପାଇଁ ପ୍ରତିବନ୍ଧକ ଦୂର କରିବାକୁ ବନାଞ୍ଚଳ ଅଧିକାରୀମାନଙ୍କୁ କହିଥିଲେ ।