୯ ବର୍ଷର ନାବାଳିକାକୁ କୁକର୍ମ ; ବୃଦ୍ଧ ଗିରଫ
Jitendra Sahu
5302
ଭୁବନେଶ୍ୱର,୩ ।୯ : ଘରେ କେହି ନଥିବାର ସୁଯୋଗ ନେଇ ୫୫ ବର୍ଷର ବୃଦ୍ଧ ଘରେ ପଶି ୯ବର୍ଷର ନାବାଳିକାକୁ କୁକର୍ମ କରିବା ସହ ହତ୍ୟା ଧମକ ଦେଇ ଫେରାର ରହିଥିଲା ଅଭିଯୁକ୍ତ । ଏନେଇ ଏୟାରଫିଲ୍ଡ ଥାନାରେ ଅଭିଯୋଗ ପରେ ପୁଲିସ ପାକ୍ସୋ ଆକ୍ଟରେ ମାମଲା ରୁଜୁକରି ତଦନ୍ତ ଚଳାଇ ଅଭିଯୁକ୍ତକୁ ଖୋଜୁଥିବା ବେଳେ, ଆଜି ତାକୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି । ଗିରଫ ଅଭିଯୁକ୍ତ ହେଲା, ଏୟାରଫିଲ୍ଡ ଥାନା ଅଧିନ ଯୋଗେଶ୍ୱର ପାଟ୍ଟଣା ବେହେରା ସାହିର ଧଡିଆ ବେହେରା ।
ସୂଚନା ଯୋଗ୍ୟଯେ, ଅଭିଯୋଗକାରିଣୀ ଭୁବନେଶ୍ୱରର ଏକ ବେସରକାରୀ କଲେଜରେ କାର୍ଯ୍ୟ କରୁଥିବା ବେଳେ ତାଙ୍କ ସ୍ୱାମୀ ଏକ ରଙ୍ଗମିସ୍ତ୍ରୀ ଭାବେ କାର୍ଯ୍ୟକରନ୍ତି । ଗତ ୨ ତାରିଖରେ ଅଭିଯୋଗକାରିଣୀ ଏବଂ ତାଙ୍କ ସ୍ୱାମୀ ଘରର କାମ ସାରି ୯ ବର୍ଷର ଶିଶୁ କନ୍ୟାକୁ ଘରେ ଏକୁଟିଆ ଛାଡି ନିଜ ନିଜ କାର୍ଯ୍ୟକୁ ଯାଇଥିଲେ । ଏହି ସମୟରେ ଘରେ କେହି ନଥିବାର ସୁଯୋଗ ନେଇ ଘର ପାଖରେ ରହୁଥିବା ଅଭିଯୁକ୍ତ ଧଡ଼ିଆ ବେହେରା ତାଙ୍କ ଘରେ ପଶି ଘରର କବାଟ ବନ୍ଦ କରି ନାବାଳିକା କନ୍ୟାକୁ କୁକର୍ମ କରିଥିଲା । ପରେ ଏହି ବିଷୟରେ କାହାକୁ କହିଲେ ତାଙ୍କୁ ହତ୍ୟା କରିବାର ଧମକ ଦେଇ ଘରୁ ଚାଲିଯାଇଥିଲା । ପରେ ଅଭିଯୋଗକାରିଣୀ ଘରକୁ ଫେରି ଝିଅ କାନ୍ଦୁଥିବାର ଦେଖି, ତାଙ୍କୁ କଣ ହୋଇଛି ବୋଲି ପଚାରିବାରୁ ପୀଡ଼ିତା ତାଙ୍କୁ ଏହି ଘଟଣା ବିଷୟରେ ଜଣାଇଥିଲେ । ଏହାକୁ କେନ୍ଦ୍ର କରି ଅଭିଯୋଗକାରିଣୀଙ୍କ ଅଭିଯୋଗକୁ ଆଧାର କରି ପୁଲିସ ମାମଲା ରୁଜୁକରି ଆଜି ଅଭିଯୁକ୍ତକୁ ଗିରଫ କରିଛି ।
