ବେଆଇନ୍ ମାଟି ଚାଲାଣ, ୯ ଟ୍ରାକ୍ଟର ଜବତ
Rasmita Behera
କାକଟପୁର : ଅସ୍ତରଙ୍ଗରେ ରାଜସ୍ୱ ବିଭାଗରେ ଥିବା ବିଭିନ୍ନ ସରକାରୀ ଓ ଗୋଚର ଜମିରୁ ମାଫିଆମାନେ ମାଟି ଲୁଟ କରୁଥିବା ବେଳେ ରାସ୍ତା ଗୁଡିକ ନଷ୍ଟ ହେଉଥିବା ଦେଖିବାକୁ ମିଳୁଛି । ଗତ ରବିବାର ଦିନ ଅସ୍ତରଙ୍ଗ ତହସିଲ ଅଞ୍ଚଳର ଏକ ଗହୀର ବିଲରୁ ବେଆଇନ ମାଟି ବୁହାହେଉଥିବା ବେଳେ ଅସ୍ତରଙ୍ଗ ଥାନାଧିକାରୀ ରାଜେଶ ବଳିଆରସିଂ ନିଦେ୍ର୍ଦଶରେ ୯ଟି ଟ୍ରାକ୍ଟର ଜବତ କରାଯାଇଥିବା ସୂଚନା ମିଳିଛି । ଜବତ ଟ୍ରାକ୍ଟର ମଧ୍ୟରୁ ୫ଟି ପଞ୍ଜିକରଣ ହୋଇଥିବା ବେଳେ ୪ଟିର କୌଣସି ପଞ୍ଜିକରଣ ନମ୍ବର ନଥିବା ବେଳେ ଚାଳକ ମାନଙ୍କର ଚାଳକ ପ୍ରମାଣପତ୍ର ଅଛିକି ନାହିଁ ଯାଞ୍ଚ ପରେ ସାମ୍ନାକୁ ଆସିବ । ଅସ୍ତରଙ୍ଗ ଥାନାଧିକାରୀଙ୍କ ସୂଚନା ଅନୁସାରେ ଉକ୍ତ ଟ୍ରାକ୍ଟରଗୁଡିକ ଜବତ ପରେ ବେଆଇନି ମାଟି ଚାଲାଣ କରୁଥିବା ଅଭିଯୋଗରେ ମକଦ୍ଦମା ରୁଜୁ ହେବାସହ ଅଧିକ ତଦନ୍ତ ଜାରି ରହିଛି । ସ୍ଥାନୀୟ ଅଞ୍ଚଳର ଅନେକ ଜାଗାରୁ ପ୍ରଶାସନକୁ ଚକମା ଦେଇ ଶହ ଖାଲ ଜାଗା ପୋତିବା, ଇଟା ଭାଟିକୁ ଯୋଗାଇବା ପାଇଁ ଶହ ଟ୍ରିପ ମାଟି ଚୋରା ଚାଲାଣ ହେଉଥିବା ଦେଖିବାକୁ ମିଳୁଛି । ତେଣୁ ସରକାରୀ ଜାଗା, ଚାଷ ଜମିକୁ ସୁରକ୍ଷିତ ରଖିବା ପାଇଁ ରାଜ୍ୟ ସରକାର, ଜିଲ୍ଲା ପ୍ରଶାସନ ଓ ସ୍ଥାନୀୟ ପ୍ରଶାସନ କଠୋର ପଦକ୍ଷେପ ଗ୍ରହଣ କରିବାକୁ ସମାଜସେବୀମାନେ ଦାବି କରିବା ସହିତ ଥାନାଧିକାରୀଙ୍କ ଏପରି କାର୍ଯ୍ୟକୁ ପ୍ରଶଂସା କରିଛନ୍ତି ।
